Read Falam Chin MATTHAI 10 Bible Online

MATTHAI 10 - Falam Chin bible

MATTHAI 10

¹Jesuh in a dungthluntu hleihnih kha hmun khatah a ko ih thlarau ṭha lo dawihlo theinak le natnak le dam lonak a phunphun damter theinak huham a pek.

²Tirhthlahmi hleihnih ih hmin pawl cu, hmaisabik ah Simon (Piter timi) le a nau Andru; Zebedi ih fapa Jeim le a nau Johan;

³Filip le Bartholomeo; Thomas le siahkhongtu Matthai; Alfias ih fapa Jeim le Tadias;

⁴Phunṭan Simon le Jesuh a zuartu Judas Iskariot tla an si.

⁵Hi hleihnih pawl cu Jesuh in a thlah ih ṭhatein thu a cah hai. “Zentail ram ah va feh hlah uhla Samaria khawsung ah va lut hlah uh.

⁶Cuhnakin a hlomi tuu run Israel mi pawl hnenah nan feh pei.

⁷Feh uh la, ‘Vancung Uknak a nai zo,’ tiah va sim uh.

⁸Mina damter uh, mithi thoter sal uh, phaarnat a neimi pawl damter uhla khuavang pawl dawihlo uh. Man loin nan ngahmi kha man loin va pe uh.

⁹Nan kordip ah sui tangka siseh, ngun tangka le dar tangka siseh, pai hlah uh.

¹⁰Nan khualtlawnnak lamzin hrangah rawl dilnak ah cawdip siseh, angki hlei siseh, kedam le kianghrol siseh, keng hlah uh. Hnaṭuantu pa cu a sammi hmuahhmuah pek thluh a si ding.

¹¹“Khawpi siseh, khawte siseh nan thlen tikah lungawite ih tlun-inn a lo ontu inn ah lut uhla nan feh sal hlan tiang cuih inn ah va cam uh.

¹²Inn sungih nan luh tikah ‘Nan hnenah daihnak um hram seh,’ tiah va ti uh.

¹³Cuih inn sung mi pawl in tlun-inn an lo on asile daihnak hrang mal nan sawm sakmi cu cuih inn ah umseh. Asinain tlun-inn an lo on lo asile daihnak malsawmnak cu la kir sal uh.

¹⁴Cule zokhal in tlun-inn an lo on lo ih nan thu khal an ngai duh lo asile cuih hmun cu tlansan uhla nan ke ih leivut cu thingthlata uh.

¹⁵Thungai in ka lo sim: thuṭhennak Ni ah Pathian in cuih khua mi pawl hnakin Sodom le Gomorrah khua mi parah zaangfahnak tam deuh a nei ding a si,” tiah a sim.

¹⁶“Ngai uh! Cinghnia hraang rual lakih tuu thlah bangtuk in ka lo thlah a si. Curuangah rul vekin fimkhur uhla thuro vekin nan nun nem uh.

¹⁷Ralring uh, ziangahtile nanmah a lo kaitu dingah mi an suak ding; zungah an lo thlenpi ding ih sinakok ah an lo vuak ding.

¹⁸Keimah ih ruangah uktu le siangpahrang pawl hmaiah an lo thlenpi ding ih anmah le Zentail mi pawl hnenah ka thu thantertu nan si ding.

¹⁹Thuṭhennak hmunih thlenpi nan si tikah ziangso ka sim ding ti le ziangtinso ka sim ding, tiin nan donhar hlah uh. A tikcu a kim tikah nan sim dingmi cu theihter nan si leh ding.

²⁰Ziangahtile a ṭongtu ding cu nanmah si loin nan sung ihsin a ṭongtu nan Pa ih Thlarau ṭongkam a si ding.

²¹“Mi in anmah ih unau lala kha that dingah midang kut ah an thlengter ding. Pale pawl khal in an faate tlunah cu bangtuk ṭhiamṭhiam in an tuah ding. Faale pawl khal in an pale pawl an ral ding ih midang kut ah an thlen ding.

²²Keimah ruangah mikip in an lo hua ding. Sikhalsehla a netnak ni tiang a ṭang theitu cu runsuak an si ding.

²³Khua pakhat ah an lo hrem asile khua dangah va tlan uh. Fiangtein ka lo sim: Milai Fapa a ra thlen hlanah Israel ram sung khua hmuahhmuahih nan hnaṭuanmi cu nan ṭheh man lo ding.

²⁴“A saya hnakin a tum sawnmi tlawngta zohman an um lo. A bawipa hnakin a tum sawnmi sal zohman an um lo.

²⁵Curuangah tlawngta pakhat cu a saya tluk a si ahcun lungkim ding a si ko; sal khal a bawipa tluk a si ahcun lungkim ding a si ko. Innsang ih lu bik kha khawsia bawi Beelzebul tiih kawh a si ahcun innsang sung um midang pawl cu cuhnakih hmin sia deuh in kawh an si ding.

²⁶“Curuangah milai ṭih hlah uh. Atuih thuh-mi hi on ṭheh a si ding ih thuthup hmuahhmuah khal phuan ṭheh a si leh ding.

²⁷Khawthim lakih ka lo simmi hi sun khawvang ah sim sal uhla a thup ih nan theihmi hi innpar ihsin phuang uh.

²⁸Taksapum a that thei naón thlarau a that thei lotu pawl cu va ṭih hlah uh. Takpum le thlarau a pahnih in hell sungih a that theitu Pathian kha va ṭih sawn uh.

²⁹Paisasen pakhat in sunṭam pahnih nan lei thei a si lo maw? Asinain cuih sunṭam pakhat hman cu nan Pa ih thu loin leilung ah a tla lo.

³⁰Nannih sinsin cu nan samphang hman a siar ṭheh a si.

³¹Curuangah nan thin phang hlah uh. Sunṭam tampi hnakin nan man a khung sawn a si.

³²“Mi pakhat in mipi hmaiah ka minung a sinak kha a ṭanpi ngam a si ahcun vancung ka Pa hmaiah amah kha ka ṭanpi ve ding.

³³Sikhalsehla mipi hmaiih i hnongtu cu vancung ka Pa hmaiah ka hnong ve ding.

³⁴“Leilung tlunah remnak thlentertu ah a ra tiah i ruat hlah uh. Remnak tuahtu ah ka ra lo, ralnam kengin ka ra sawn a si.

³⁵Pa le fapa, nu le fanu, ni le vah[8] pawl ral awter dingah ka ra a si.

³⁶Mi pakhat ih ral ṭihnung bik cu amah ih innsang mi an si ding.

³⁷“Zokhal sisehla, keimah hnakin a nu le a pa a duh sawntu cu i thluntu dingah a tlak lo. Keimah hnakin a fanu siseh, a fapa siseh, a duh sawntu cu i thluntu dingah a tlak lo.

³⁸Zokhal sisehla amah ih thinglamtah phur tahratin ka dungih i thlun lotu cu ka minung si dingah a tlak lo.

³⁹Amah ih nunnak hum a tumtu cu a nunnak a sung ding, asinain keimah ruangih a nunnak a liamtu cu a nunnak a hum ngah ding.

⁴⁰“Nanmah tlun-inn a lo ontu cu keimah tlun-inn ontu a si ve; keimah tlun-inn i ontu cun keimah thlahtu khal a on ve a si.

⁴¹Pathian thusimtu tlun-inn a ontu cu Pathian thuphurtu tlun-inn a on ruangah a thusimmi ṭhatman a ṭawm ve ding. Miṭha pakhat kha mi ṭha a si ruangih tlun-inn a ontu cu cuih miṭhapa ih ṭhatman a ṭawm ve ding.

⁴²Fiangte in ka lo sim: ka dungthluntu pawl lakih nauta bik kha ka dungthluntu a si ruangih tidai khuat khat a petu cu ṭhatman a ngah tengteng ding,” tiah a ti.