Read Falam Chin MATTHAI 11 Bible Online

MATTHAI 11 - Falam Chin bible

MATTHAI 11

¹Jesuh in a dungthluntu hleihnih pawl hnenah thu a sim ṭheh tikah cutawk hmun ihsin a suak ih a kiangkap khawsungah thuzirh ding le thuphuang dingah a feh.

²Thawng sung ihsin baptisma petu Johan in Khrih hnaṭuanmi thuhla kha a theih tikah amah thluntu ṭhenkhat pawl a thlah ih,

³“A ra ding, an timi cu nangmah hi na si maw, a si lole midang kan hngak hrih ding maw?” tiah Jesuh cu an sut.

⁴Cutikah Jesuh in, “Va feh uhla nan hmuhmi le nan theihmi hi Johan hnenah cun va sim uh:

⁵mitcaw in khua an hmu, ke-awl pawl an feh thei, miphaar pawl tla an thiang, hnaset pawl an hna a ong, mithi thawhter sal an si ih mifarah hnenah Thuthang ṭha phuan a si.

⁶Keimah ih thuhla ah hin thinlung ṭhukṭhunnak a nei lotu cu mi thluasuak an si,” tiah a ti.

⁷Johan ih dungthluntu pawl an feh sal hnuah Jesuh in misenpi hnenah Johan ih thu cu a sim. “Johan hnenah nelrawnih nan va feh tikah ziang hmu dingin so nan ruah awk? Thli in a sem ruangih a kur reromi phaikung maw?

⁸Ziang zoh dingah so nan feh? Hnipuan mawi zetzet a hrukmi pa zoh dingah maw? Cubangtuk hnipuan a hruktu cu siangpahrang innih ummi an si.

⁹I sim hnik uh, ziang hmu dingin so nan feh? Profet zoh dingah maw? Asi, profet nan hmu. Asinain nan hmuhmi hi profet hnakin a tum sawn a si.

¹⁰Ziangahtile Johan thuhla hi Ca Thianghlim in, ‘Pathian in na hrangih lamzin sialtu dingah na hmaiah ka palai ka thlah ding a si, a ti,’ tiah a ngan.

¹¹Fiangtein ka lo sim. Nunau ih hrinmi lakah baptisma petu Johan tlukih a tummi zohman an um dah lo. Sikhalsehla vancung Uknak ih mitenau bik hman khi Johan hnakin a tum sawn lai a si.

¹²Johan ih thusim caan thokin atu tiang vancung Uknak cu dodalnak nasa zet a tong ih mi hel-hlong pawl in hramhram in laak an tum.

¹³Khuahlan ihsin Johan san tiang profet pawl le Moses Daan pawl in hi vancung Uknak thu hi an sim.

¹⁴An thu simmi nan zum duh a si ahcun Johan hi a ra ding tiih rak sim ciami Elijah kha amah hi a si.

¹⁵Curuangah theihnak hna a neitu in thei uh.

¹⁶“Tuih san minung pawl hi ziang thawn so ka tahṭhim ding? Anmah cu thil zuarnak hmunih a tomi nauhak pawl an bang. Nauhak bur khat in a dang nauhak bur khat hnenah,

¹⁷‘Mopuai khuangdar kan lo tumsak naón nan laam duh lo! Mithi phumnak hla kan sak khalle nan ṭap duh cuang lo,’ an ti.

¹⁸Johan a rat tikah rawl a ul ih sabitti khal in loin a um tikah mi hmuahhmuah in ‘A sungah khawsia a lut a si,’ an ti.

¹⁹Cun Milai Fapa a ra ih a ei le a in an hmuh tikah mi hmuahhmuah in, ‘Hi pa hi zohhnik uh! Mi hrong dang le rawlpham zu-in pa hi; siahkhongtu pawl le misual pawl ih rualpi a si,’ an ti. Asinain Pathian ih fimnak cu a dik a si ti kha a hnaṭuannak in a langter,” tiah a ti.

²⁰Jesuh ih mangbangza tam bik a tuahnak khuami pawl in an sualnak an sir awk cuang lo ruangah a kawk hai.

²¹“Maw Khorazin khua, na van a va duai ve! Maw Bethsaida khua, na van a va duai ve! Nan sungih mangbangza ka tuahmi pawl hi Tai-ar khua le Sidon khua ah rak tuah sisehla cuih khawsungmi pawl cun an sualsirnak langternak ah khumdip hnipuan hrukin vutcam an phulh awknak a reipi zo ding.

²²Fiangtein ka lo sim: Thuṭhennak Ni ah Pathian in nannih hnakin Tai-ar le Sidon khuami pawl parah zaangfahnak tam sawn a nei ding.

²³Cun nang Kapernaum khua! Van tiangih hlirso awk na duh maw? Hell sungah hlon na si ding! Na sungih tuahmi mangbangza pawl hi Sodom khua ah tuah rak sisehla siat loin tuihsun tiang hi a hmun hrih ding!

²⁴Fiangtein ka lo sim: Thuṭhen Ni ah nang hnakin Sodom khua parah Pathian in zaangfahnak tam sawn a nei ding a si,” tiah a ti.

²⁵Culai ahcun Jesuh in, “Maw Ka pa, lei le vanih Bawi! Mifim le mithiam hnen ihsin na rak thuh ringringmi kha atu-ah zianghman a thiam lomi hnenih na langter ruangah ka lo lawm a si.

²⁶Asi, Ka pa, hi bangtuk ih si ding hi na duhmi a rak si.

²⁷“Ka Pa in ka kut sungah ziang hmuahhmuah i pek ṭheh zo. Pa siar lo zohman in Fapa an thei lo; cule Fapa le Fapa in thei ve hai seh tiih a hrilmi pawl siar lo, zohman in Pa an thei lo.

²⁸“Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding.

²⁹Ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding.

³⁰Ziangahtile keiih kawn phurh cu a nuam ih ka thil khal a zaang a si,” tiah a ti.