Read Falam Chin MATTHAI 13 Bible Online

MATTHAI 13 - Falam Chin bible

MATTHAI 13

¹Cuih sun thotho ah Jesuh cu inn ihsin a suak ih tili kapah a va feh ih a to hnuah thu a zirh.

²A kiangkapih a ra khawmmi misenpi pawl an tam tuk ruangah lawng sungah a lut ih a to. Misenpi pawl cu tili kapah cun an ding.

³Thuṭhimnak hmangin thu tampi a zirh: “Voikhat ah mi pakhat cu thlaici vorh dingah a feh.

⁴Thlaici cu lo sungih a vorh tikah ṭhenkhat cu lamzin parah an tla ih cu pawl cu vate in an ei ṭheh.

⁵A ṭhenkhat cu leilung malnak lungsedaap lakah an tla ih leilung a sah lo ruangah thlaici cu hmakhatte ah an ṭo.

⁶Asinain ni a sat tikah a ṭo pekte pawl cu an thi sal; an hram in leilung thukpi ih hram a thlak thei lo ruangah an car lohli.

⁷Thlaici a ṭhenkhat cu hlingbur lakah an tla ih an kho naón hlingbur cun a zaap ruangah an ṭhang thei lo.

⁸Sikhalsehla thlaici ṭhenkhat cu leilung ṭhatnak ah an tla ih ṭhenkhat cu a let zakhat, ṭhenkhat cu a let sawmruk, ṭhenkhat cu a let sawmthum in rawl a suak,” tiah a sim.

⁹Jesuh cun, “Theihnak hna a neitu in thei uh,” tiah a ti.

¹⁰Cun dungthluntu pawl a hnenah an ra ih, “Mipi hnenih thu na sim tikah ziangah so tahṭhimnak na hman ṭheu?” tiah an sut.

¹¹Jesuh in an hnenah, “Vancung Uknak thuthuuk theih theinak cu nan hnenah pek a si zo. Asinain mipi hnenah cun pek a si lo.

¹²Ziangahtile a neimi hnenah a hleifuan ih a neih tiangin pek beet a si ding ih a nei lomi hnen ihsin a neihsunte hman kha lak sak a si hrih ding.

¹³Ziang ruangah an hnenih ka ṭong tikah thuṭhimnak ka hmang tile annih cun an zoh naón an hmu thei lo, an ngai naón an thei thei lo.

¹⁴Curuangah profet Isaiah ih simmi kha an parah a kim a si. Profet Isaiah cun: ‘Hi minung pawl in an ngai rero ding naón an thei thei lo ding. An zoh rero ding naón an hmu thei lo ding.

¹⁵Ziangahtile an thinlung a pit tuk, an thutheihnak hna a pit ih an mit khal an meng lo a si. Cu bangtuk in rak si hlah hai sehla an mit in an hmu ding, an hna in an thei ding ih, an thinlung khal in an thei thiam ding. Cuticun ka lamah an her ding ih ka damter hai ding a si, tiah Pathian in a ti’, tiah a sim.

¹⁶“Asinain nannih cu ziangtluk mi vannei so nan si! Nan mit in a hmu ih nan hna khal in a thei.

¹⁷Fiangtein ka lo sim: nan hmuhmi le nan theihmi hi profet tampi le Pathian minung tampi in hmuh le theih an rak duhzet ve naón an rak hmu thei lo ih an rak thei thei fawn lo.

¹⁸“Curuangah hi thlaici vorh tahṭhimnak ih tican hi ngai uhla thei uh.

¹⁹Lamzin tluan ih a tlami thlaici pawl cu vancung Uknak thu a thei naón a tican a thei thei lotu pawl an si. An thinlung sungih tuhmi kha Miṭha lo pa in a laksak sal a si.

²⁰Lungsedaap lakih a tlami thlaici cu vancung Uknak thu an theih vete in lungawi zetin a pomtu an si.

²¹Lungawi zetin an pom naón an sungah thukpi a pil lo ih rei an daih lo. An pommi thu ruangah harsatnak le hremnak a ra thlen tikah an let sal lohli.

²²Hlingbur lakih a tlami thlaici pawl cu vancung Uknak thu a thei naón hi leilung tlun nunnak thuhla ah donhar ih a ummi pawl an si. Sum le saw an duhnak in cuih thu cu a tuam ih rah an nei thei lo.

²³Leilung ṭha ih a tlami thlaici pawl cu vancung Uknak thu a hna in a thei ih a tican tla a thei thiamtu pawl an si. Annih cun rah an nei ih a ṭhen cu a let zakhat, a ṭhen cu a let sawmruk, a ṭhen cu a let sawmthum tiang an rah a si,” tiah a sim.

²⁴Jesuh in tahṭhimnak dang pakhat a sim lala ih, “Vancung Uknak cu hi bangtuk hi a si. Mi pakhat in a lo sungah thlaici ṭha a vorh.

²⁵Zan khatah mi hmuahhmuah an ihthat sungah a ralpa a ra ih rawl ci lak ahcun hrampi ci a vorhta ih a tlanhlo.

²⁶Thlai kho cu an hung ṭhang ih an vuih tikah hrampi khal cu an lang ve.

²⁷Cule a hnen-um pawl a hnenah an ra ih, ‘Bawipa, na lo sungih na vorhmi cu thlaici ṭha an si lo maw? Khuiinso hrampi hi an rat?’ tiah an sut.

²⁸Anih in, ‘Himi a tuahtu cu kan ralpa a si,’ tiah a sawn. Annih cun, ‘Hrampi cu kan va bawt pei maw?’ tiah an sut sal.

²⁹Cutikah anih in, ‘Bawt hlah uh, ziangahtile hrampi nan bawt zawng ah rawl kung tla nan bawtcih pang ding.

³⁰Rawl laak a cut hlan lo rawl kung le hrampi cu ṭhang tlang ko hai seh. Cule rawl latu pawl kha hmaisabik ah hrampi bawt uhla nan tom hnuah ur uh; cuih hnuah rawl cu khawm uhla ka cuam sungah thun uh,’ ka ti hai ding,” tiah a sim.

³¹Jesuh in tahṭhimnak dang pakhat a sim sal. “Vancung Uknak cu hi bangtuk a si. Mi pakhat in anṭam ci a lak ih a lo sungah a vorh.

³²Thlaici hmuahhmuah lakah a fate bikmi thlaici a si. Asinain a kho ih a ṭhan tikah cun rawl kung lakah a tum bikmi a si. Thingkung bangtuk a si ih vate pawl tla an ra ih a hnge lakah bu an sak,” tiah a ti.

³³Jesuh in tahṭhimnak pakhat an hnenah a sim sal. “Vancung Uknak cu nunau pakhat in thilnu malte a lak ih sangphut reel khat sungih a rawimi bangtuk a si. Cuih thilnu malte cun saang bawm khat cu a zatein a thoter ṭheh a si,” tiah a ti.

³⁴Jesuh in hi bangtuk thu pawl hi misenpi hnenih a sim tikah tahṭhimnak a hmang ṭheu. Tahṭhimnak hmang loin an hnenah ziang hman a sim dah lo.

³⁵Hi vekih a simnak cu profet ih simmi kha a kim theinak dingah a si. Profet ih sim mi cu: “An hnenih ka ṭong tikah tahṭhimnak ka hmang ding; Leilung hramthok ihsin theih dah lomi thil kha an hnenah ka phuang ding,” ti a si.

³⁶Jesuh cun misenpi kha a fehsan ih inn sungah a lut. Cutikah a dungthluntu pawl a hnenah an ra ih, “Lo sungih hrampi tahṭhimnak kha a tican in sim aw,” tiah an ti.

³⁷Jesuh in, “Thlaici ṭha a vorhtu cu Milai Fapa a si.

³⁸Lo cu hi leilungpi hi a si; thlaici ṭha cu vancung Uknak a cotu minung pawl an si ih hrampi cu Mi ṭha lo pa ih milai pawl an si.

³⁹Hrampi ci a vorhtu kan ral cu Satan a si. Rawlkhawm caan cu san cemnak caan a si ih rawlkhawmtu pawl cu vancungmi an si.

⁴⁰Hrampi cu an khawm ih meisa in an ur ṭheh; cu bangtuk in san cemnak caanah cun a si ve ding.

⁴¹Milai Fapa in a Uknak sung ihsin mi a sualtertu le thil ṭha lo a tuahtu pawl a lengih suahhlo dingah a vancungmi pawl a thlah ding.

⁴²Cumi pawl cu meisa sungah an paih ding ih cutawkah ṭap-ai in an hacang an rial ding.

⁴³Cun Pathian ih minung pawl cu an Pa Pathian ih Uknak sungah ni bangin an tleu ding. Theihnak hna a neitu in thei uh,” tiah a ti.

⁴⁴“Vancung Uknak cu lo sungih thuhmi hlawnthil bangtuk a si. Cuih hlawnthil cu mi pakhatkhat in a hmuh tikah ṭhatein a khuhta ih lungawi aipuang in innih a neihmi hmuahhmuah kha a zuar ih cuih lo cu a lei,” tiah Jesuh in a sim.

⁴⁵“Vancung Uknak cu hi bangtuk a si. Sum tuahtu pakhat in keplung mankhung a hawl.

⁴⁶A man a khung taktakmi keplung a hmuh tikah a neihmi dang hmuahhmuah kha a zuar ih cuih lung cu a lei,” tiah a sim.

⁴⁷“Vancung Uknak cu tili sungih vorhmi sur bangtuk a si. Nga kaitu hrekkhat in an sur cu tili sungah an vorh ih nga phunkim an awk.

⁴⁸An sur a khah tikah ti kapah an hnuk ih an tohmun in nga cu an hril; nga ṭha pawl cu an bawm sungah an san ih nga ṭha lo cu an hlon.

⁴⁹Cu bangtuk in san cemnak caanah cun a si ding; vancungmi pawl an feh ding ih mi ṭha pawl lak ihsin mi ṭha lo pawl cu an khawm ding ih,

⁵⁰meisa sungah an hlon ding. Cutawkah an ṭap an raak ding ih an hacang an rial ding a si,” tiah a ti.

⁵¹Misenpi pawl cu Jesuh in, “Hi thu hmuahhmuah hi nan thei thei maw?” tiah a sut. Annih in, “Kan thei,” tiah an sawn.

⁵²Cutikah Jesuh in, “Cu a si ahcun vancung Uknak thu a zir zomi Daan zirhtu pohpoh cu a thilri retnak inn sung ihsin thil hlun le thil thar a hun suahtu, inn neitu pa bangtuk a si,” tiah a sim.

⁵³Jesuh in hi tahṭhimnak pawl a sim ṭheh tikah cutawk ihsin a suak ih,

⁵⁴a khua ah a tlung. An sinakok ah thu a zirh hai ih a thu a theitu pawl cu an mang a bang ngaingai. “Hi bangtuk fimnak hi khuitawk in so a lak?” tiah an sut aw. “Hi bangtuk mangbangza hi ziangtinso a tuah thei?

⁵⁵Lettama fapa a si lo maw? Mari kha a nu a si lo maw? Jeim, Josef, Simon le Judas kha a naule an si lo maw?

⁵⁶A far le tla hitawk ah an um ṭheh a si lo maw? Khui-inso hi bangtuk hi a lak?” tiah an ti.

⁵⁷Cuti cun Jesuh cu an hnong. Jesuh in an hnenah, “Profet cu amah ih suahnak khua le innsang siar lo hmun dangah cun upatnak a tong a si,” tiah a ti.

⁵⁸Zumnak an neih lo ruangah cutawkah cun mangbangza tampi a tuah lo.