Read Falam Chin MATTHAI 15 Bible Online

MATTHAI 15 - Falam Chin bible

MATTHAI 15

¹Cule Farasi hrekkhat le Daanthiam ṭhenkhat pawl cu, Jerusalem ihsin Jesuh hnenah an ra ih,

²“Ziangah so na dungthluntu pawl in kan pupa pawl ih in zirhtami daan an buar? Rawl an ei hlanah a daan vekin an kut an kholh lo,” tiah an ti.

³Jesuh in, “Cuti asile ziangah so nannih teh nanmah ih thuzirhmi lawng nan thlun ih Pathian thukham sawn nan buar?

⁴Pathian in, ‘Nan nu le nan pa upat uh,’ a ti. ‘A nu siseh, a pa siseh a camsiattu cu thah a si pei,’ tiin a ti.

⁵Asinain nannih ih nan zirhmi cu: mi pakhatkhat in a nu maw, a pa maw bomnak dingah thil a neihmi kha, ‘Himi cu Pathian ta a si,’[10] a ti ahcun,

⁶a nu siseh, a pa siseh a bawm a ṭul nawn lo, tiah nan ti. Cu bangtuk in nanmah ih thuzirhmi nan thlun ih Pathian thukham sawn ziang hmanah nan siar lo.

⁷Nannih titer-aw pawl! Profet Isaiah in nanmah ih thuhla a rak simmi hi a va dik lawmmam so! Isaiah in,

⁸‘Himi pawl hin an kaa lawng in in upat ih an thinlung ngaingai cun in hlat zet a si.

⁹Milai ih tuahcopmi daan kha, Pathian pekmi daan vekin an zirh ruangah, Keimah in biak rero khal hi ṭhathnemnak zianghman a nei lo, tiah Pathian in a ti,’ tiah a sim,” a ti.

¹⁰Cule Jesuh in mi tampi a hnenah a ko ih, an hnenah, “Ngai uhla theihnik uh!

¹¹Minung a baaltertu hi a kaa ihsin a lutmi thil an si lo, a kaa ihsin a hung suakmi in mi a baalter sawn a si,” tiah a ti.

¹²Cule a dungthluntu pawl a hnenah an ra ih, “Na ṭongmi in Farasi pawl an thin a natter, ti hi na thei maw?” tiah an ti.

¹³Jesuh in, “Vancung i a ummi ka Pa in a phun lomi kung cu bawt ding a si ko.

¹⁴Anmah ruangah nan hnaihnok hlah seh! Annih tla cu hotu mitcaw pawl an si; mitcaw in mitcaw a hruai ahcun an pahnih in khursungah an tla ding,” a ti.

¹⁵Piter in, “Cuih na ṭongmi cu fiangtein in sim aw,” tiah a ti.

¹⁶Jesuh in an hnenah, “Midang pawl hnakin nan fim deuh cuang lo maw si?

¹⁷Nan thei thei lo maw? Mi kaa sungin a lutmi thil cu a pumpi ah a thleng ih cuticun a lengah a lansuak.

¹⁸Asinain a kaa in a suakmi cu a thinlung sung ihsin a hung suakmi a si ruangah cumi in minung a baalter a si.

¹⁹Ziangahtile mi a thattertu, ṭaangṭawm sualnak a tuahtertu, nupa sualnak a tuahtertu, ruk a rutertu, thuphan a pertertu, le mi a thangsiattertu ruahnak siava hmuahhmuah cu a thinlung sung ihsin a suakmi an si.

²⁰Hi pawl in milai cu a baalter a si. Sikhalsehla rawl ei hlanih kut kholh lo cun mi a baalter lo,” tiah a ti.

²¹Jesuh cu cutawk ihsin a suak ih Tai-ar le Sidon khua kiangkap ah a feh.

²²Cuih ramih a ummi Kanaan nunau pakhat in Jesuh hnenah a ra ih, “Maw David fapa, i zaangfah aw. Ka fanu cu khawsia in a polh ih vansaanglam in a um,” tiah a ra ṭahhnawh.

²³Asinain a hnenah Jesuh in kam khat hman a sawn lo. A dungthluntu pawl an ra ih, “Hi nu hi dawihlo aw! In thlun ringring ih in auh ciamco,” tiah Jesuh cu an dil.

²⁴Cutikah Jesuh in, “Israel mi tuu hlo pawl hrang lawngah thlah mi ka si,” tiah a ti.

²⁵Cutikah cuih nunau nu cu Jesuh ke hramah a ra bok ih, “Bawipa, i zaangfah hramhram ko aw!” tiah a ti.

²⁶Jesuh in, “Nauhak rawl lak tahratin uico pek cu a dik lo a si,” tiah a sawn.

²⁷Nunau nu in, “Asi, bawipa, na timi cu a dikmi a si. Sikhalsehla bawi pawl ih cabuai ihsin a tlami rawl ṭilfuan cu uico tla in an ei ṭheu ko a sisi!” tiah a let.

²⁸Cutikah Jesuh in, “Minu, na zumnak cu a nasa a si. Na duhmi cu tuahsak na si pei,” tiah a ti. Culaifang ah a fanu cu a rak dam.

²⁹Jesuh cu cutawk ihsin a suak ih Galilee Tili kapin a feh. Tlang parah a hung kai ih cunah a to.

³⁰Mi tam ngaingai in amah cu an pan. Ke-awl, mitcaw, mizeng, ṭong thiam lo le a na mi tampi Jesuh ke hramah an rak hruai. Jesuh in an zatein a damter.

³¹Ṭong thiam lomi an ṭong thei, mizeng an dam, ke-awl pawl ṭhatein an feh thei ih mitcaw tla in khua an hmuh sal kha mipi in an hmuh tikah an khawruah a har ngaingai ih Israel Pathian an thangṭhat.

³²Jesuh in a dungthlun pawl kha a hnenah a ko ih, “Hi miburpi hi ka hnenah ni thum sung an um zo ih rawl ei ding zianghman an neih lo ruangah ka zaang an fak ngaingai. Rawl do ta loih tlunter cu ka duh lo, lamzin ah an ṭaamsawl ṭheh ding,” tiah a ti.

³³Dungthluntu pawl cun, “Milai hizat daar dingah hi ramṭhing ahhin khuitawk rawl so kan va lak ding?” an ti.

³⁴Jesuh in, “saang hlom ziangzatso nan neih?” tiah a sut. Annih in, “saang hlom sarih le nga fatete malte lawng a um,” tiah an ti.

³⁵Jesuh in misenpi cu leilung ah a toter.

³⁶Cun saang hlom sarih le nga malte cu a lak ih Pathian hnenah lungawi thu a sim hnuah a phel ih a dungthlun pawl a pek. Dungthluntu pawl in mipi hnenah an zem sin.

³⁷An zatein an ei ih an khopzet. Cule an hlahmi kha dungthluntu pawl in an sar ih bawm sarih a khat.

³⁸A eitu pawl cu nunau le nauhak siarcih loin pacang hlir thawngli an si.

³⁹Cuih hnuah Jesuh in mipi cu a tlunter ih amah cu lawng sungah a lut ih Magadan peng ah a feh.