Read Falam Chin MATTHAI 16 Bible Online

MATTHAI 16 - Falam Chin bible

MATTHAI 16

¹Sadusi le Farasi ṭhenkhat cu Jesuh hnenah an ra ih, a sual hawl duh ah, “Pathian ih umpi mi na si ahcun hmuhsaknak tuah hnik aw,” tiah an ti.

²Asinain Jesuh cun, “Ni a tlak tikah ‘Van a sen le nikhua a ṭha ding,’ tiah nan ti.

³Cun zing thlapit ah ‘Van kam a sen ih a dup asile khua a dur ruangah ruah a sur ding,’ nan ti. Van zoh tahratin ni khua ṭhat le siat ding nan sim thei, asinain tuih caan khihhmuhtu pawl hi nan theithiam fawn lo![11]

⁴Tuih san minung hi mi ṭha lo le Pathian poisa lo pawl nan va si so! Mangbangza tuah dingah in fial, asinain ka tuah lo ding. Nan hrangah Jonah thu siar lo mangbangza dang a um lo ding,” tiah a ti. Cutiin a suak ih a feh.

⁵Dungthluntu pawl cu tili an tan ih khatlam ral an thleng; annih in saang ken an hngilh.

⁶Jesuh in an hnenah, “Daithlang hlah uh! Farasi le Sadusi pawl ih thilnu khi ralring uh,” tiah a ti.

⁷“Sang kan ken lo ruangah hi bangtuk in a sim a si pei,” tiah pakhat le pakhat an ti aw.

⁸Cutiih an rel ruri cu Jesuh in a theih tikah, “saang nan neih lo thu cu ziangah so nan rel duh rero? Nan zumnak a va mal so!

⁹Nan thei thei hrih lo maw? Mi thawng nga hrangah saang hlom nga ka phel kha nan thei nawn lo maw? An hlah mi bawm ziangzat nan sar ti nan cing nawn lo maw?

¹⁰Mi thawngli hrangih saang hlom sarih kha nan cing lai maw? An hlah mi bawm ziangzatso nan sar kha?

¹¹Nan hnenih ka simmi hi saang thu a si lo tihi ziangah so nan theih thei lo? Farasi le Sadusi pawl ih thilnu hi ralring uh,” tiah a ti.

¹²Cutikah a dungthlun pawl in, “Ralring uh,” tiah a timi kha saangih rawimi thilnu si loin Farasi le Sadusi pawl ih zirhnak thilnu a si sawn, ti kha an thei thiam sal.

¹³Jesuh cu Sisaria Filipi peng ah a feh ih cu tawkah a dungthlun pawl kha, “Mi in Milai Fapa hi zo a si in ti so?” tiah a sut.

¹⁴Annih in, “Mi ṭhenkhat in baptisma petu Johan a si an lo ti, mi ṭhenkhat in Elijah a si an lo ti. A ṭhenkhat cun Jeremiah, a si lole profet pakhatkhat a si ding an lo ti,” tiah an let.

¹⁵Jesuh in, “Nannih in teh! Kei hi zo a si in ti so?” tiah a sut.

¹⁶Simon Piter in, “Nang cu a nungmi Pathian ih Fapa Messiah na si,” tiah a ti.

¹⁷Cutikah Jesuh in, “Johan fapa Simon, mi vannei na si! Ziangahtile hi thu cu minung hnen ihsin na ngahmi a si lo, vancung i a um ka Pa in na hnenih a phuanmi a si.

¹⁸Ka lo sim Piter, nang cu lungto na si; hi lungpi parah hin ka kawhhran ka din ding ih thihnak hman in a neh thei dah lo ding.

¹⁹Vancung Uknak tawhfung ka lo pe ding ih leilung tlunih na khammi cu vancungah kham a si ve ding ih leilung tlunih na onmi cu vancung khalah on a si ve ding,” tiah a ti.

²⁰Cule Jesuh in a dungthlun pawl kha Messiah a si ti zohman sim lo dingin thu a pek.

²¹Cuih caan thokin Jesuh in a dungthluntu pawl hnenah, “Jerusalem ah ka feh ding ih hotu pawl, puithiam upa pawl le Daan zirhtu pawl ih kut ah harnak ka tong ding. In that ding, asinain ni thum hnuah thawhter sal ka si ding,” tiah fiangtein a sim.

²²Piter in Jesuh cu a dang deuhah a hruai ih a mawhthluk. “Bawipa, Pathian in duh hram hlah seh. Hi bangtuk cu na parah thleng hram hlahseh,” tiah a ti.

²³Jesuh cu a her ih Piter hnenah, “Nang Satan, ka hnen ihsin tlan aw! Ka fehnak lamzin khamtu na si, ziangahtile hi bangtuk na ruahnak hi Pathian hnen ihsin a rami a si lo, milai hnenin a rami a si,” tiah a ti.

²⁴Cun Jesuh in a dungthluntu pawl hnenah, “Zokhal keimah thlun a duhtu cu amah ih duhnak kha taan in a thinglamtah phur in i thlun seh.

²⁵Ziangahtile zokhal mah nunnak hum a duhtu cu a nunnak a sung ding; asinain keimah ruangah a nunnak a liamtu cun a nunnak a hum ngah ding.

²⁶Mi pakhat in leilung pumpuluk co khalsehla a nunnak a hloh ahcun ziang ṭhathnemnak so a um? Zianghman a ṭhahnem lo! A nunnak kha zianghman in a lei thei sal nawn lo ding.

²⁷Milai Fapa hi a Pa ih sunlawinak le vancungmi pawl thawn a ra cing ding ih mi hmuahhmuah kha an hnaṭuanmi vekin ṭuanman a pek ding.

²⁸Fiangtein ka lo sim: Milai Fapa hi Siangpahrang vekin a rat nan hmuh hlan lo nanmah lakah a thi lo dingmi nan um,” tiah a ti.