Read Falam Chin MATTHAI 17 Bible Online

MATTHAI 17 - Falam Chin bible

MATTHAI 17

¹Ni ruk hnuah Jesuh in Piter le Jeim le a nau Johan kha tlang saangpi parah a kaipi ih anmah lawng an um.

²Cule an mithmuh rori ah Jesuh cu a hmuihmel a thleng aw; a hmai cu ni bangin a tleu ih a hnipuan cu mi tlet thei khopin a raang.

³Cuih hnuah dungthluntu pathum cun Moses le Elijah kha Jesuh thawn thu ruah aw rero in an hmu.

⁴Cule Piter in, “Bawipa, hitawk ih kan um hi a ṭha tuk; na duhmi a si ahcun riahbuk pathum in ka sak ding; pakhat cu na hrangah, pakhat cu Moses hrangah, pakhat cu Elijah hrangah,” tiah Jesuh hnenah a ti.

⁵Cutiih a ṭong rero laiah a tleu zetmi mero in a run zeel hai ih mero sungin aw pakhat in, “Hi pa cu ka duhdawt zetmi ka Fapa a si; a parah ka lung a kimzet, a thu ngai uh,” tiah a ti.

⁶Cuih aw cu dungthluntu pawl in an theih tikah an ṭih tuk ih leilung ah an bok.

⁷Jesuh cu a ra ih a tham hai. “Tho uh, ṭih hlah uh,” a ti.

⁸Cutikah an hun zoh ih Jesuh lawng a si kha an hmu.

⁹Tlangpar ihsin an rung ṭum tikah Jesuh in, “Hi nan hmuhmi hi Milai Fapa thihnak ihsin thawhter a si hlan cu zohman nan sim lo pei,” tiah feltein a cah.

¹⁰Cule dungthluntu pawl in Jesuh cu, “Ziangah so Daanthiam pawl in Elijah a ra hmaisa ding tiah an ti?” tiah an sut.

¹¹Jesuh in, “Elijah cu a ra hmaisa taktak ding ih ziang hmuahhmuah amah in a rak timtuah cia ding a si.

¹²Asinain ka lo sim: Elijah cu a ra thleng zo ih mi in zo a si ti an theih lo ruangah an duhtawk in an tuahsiat a si. Cuvek thotho in Milai Fapa khal hi an tuahsiat ve ding,” a ti.

¹³Cutikah dungthluntu pawl in a simmi hi baptisma petu Johan ih thuhla a si, ti kha an thei thiam.

¹⁴Misenpi hnenih an kir sal tikah mi pakhat cu Jesuh hnenah a ra ih a hmaiah khukbil tahratin,

¹⁵“Bawipa, ka fapa hi zaangfah hram aw. Merai a nei ih a nat a thawh tikah cun awloksong ngaingai a si; meisa sung le tidai sung tla ah a paih aw ṭheu.

¹⁶Na dungthluntu pawl hnenah ka ratpi naón an damter thei lo,” tiah a ti.

¹⁷Jesuh in, “Maw zumnak mal le misual mipalh pawl! Ziangtik tiangso ka lo umpi hrih ding? Ziangtik tiangso ka lo zawi hrih hai ding? Nauhak pa cu ka hnenah ratpi uh,” tiah a ti.

¹⁸Jesuh in khawsia cu suak dingin a kawk ih nauhakpa ih sung ihsin khawsia cu a suak; cu ihsin nauhak pa cu a dam.

¹⁹Cun dungthluntu pawl cu zohmanih theih loin Jesuh hnenah an ra ih, “Ziangah so kannih hmuah in kan dawi suak thei lo?” tiah an sut.

²⁰Jesuh in, “Nan zumnak a mal ruangah a si. Fiangtein ka lo sim: anṭam ci tia zumnak nan neih ahcun hi tlang hi ‘Hitawk ihsin khi tawkah ṭhawn aw,’ nan ti ahcun a ṭhawn ding. Ziang hmuahhmuah nan tuah thei ding a si,” tiah a ti.[12]

²²Dungthluntu pawl cu an zatein Galilee ih an tonkhawm awk tikah Jesuh in an hnen ah, “Milai Fapa hi milai kutah pek a si cing ding ih an that ding.

²³Asinain ni thum ni ah thawhter sal a si ding,” tiah a sim. Dungthluntu pawl cu an riah a sia ngaingai.

²⁴Jesuh le a dungthluntu pawl cu Kapernaum khua an thlen tikah biakinn ngunkhuai khongtu pawl Piter hnenah an ra ih, “Nan Sayapa hin biakinn ngunkhuai a pe maw?” tiah an sut.

²⁵Piter in, “Asi, a pe,” tiah a ti. Piter cu inn sungih a luh tikah Jesuh a ṭong hmaisa ih, “Simon, ziangtin na ruat? Hi leitlun siangpahrang hnenah zo in so ramdang ihsin thil luhpi man, a si lole ngunkhuai an pek? Ramsung mi in maw, ramdang mi in so?” tiah a sut.

²⁶Piter in, “Ramdang mi in,” tiah a let. Jesuh in, “A ṭha, cuti a si ahcun ramsung mi cun pek a ṭul lo tinak a si cu!

²⁷Asinain hi mi pawl thinhengter kan duh lo. Curuangah tili ah va feh awla sio va thlak aw. Na awh hmaisa bikmi nga kaa sungah nang le kei hrangah biakinn ngunkhuai pek ding tawkin tangka na hmu ding. Cumi cu la awla va pe aw,” tiah a ti.