Read Falam Chin MATTHAI 19 Bible Online

MATTHAI 19 - Falam Chin bible

MATTHAI 19

¹Cuih thu pawl cu Jesuh in a sim ṭheh tikah Galilee ihsin a suak ih Judea ram, Jordan tiva khatlam ralah a feh.

²Mi tampi in an thlun ih cutawkah mina tampi a damter.

³Farasi mi hrekkhat a hnenah an ra ih a sual hawl duh ah, “Ziangvek thu khalah mipa in a nupi maak dingah kan Daan in a thlah maw?” tiah an sut.

⁴Jesuh in, “A hramthokah Seemsuahtu in nu le pa a tuah, ti kha Ca Thianghlim sungah nan siar dah lo maw?

⁵Cutawkah Pathian in ‘Cu a si ruangah mipa in a nu le a pa a taanta pei ih a nupi thawn an kom aw ding; cuti cun annih pahnih cu pakhat ah an cang pei,’ a ti.

⁶Curuangah annih cu pahnih an si nawn lo, pakhat an si. Pathian ih a kommi cu zohman in ṭhen hlah hai seh,” tiah a ti.

⁷Farasi pawl in, “Cuti asile ziangah so Moses in ‘Mipa in a nupi kha maaknak ca pe-aw sehla fehter seh,’ tiah daan in pek?” tiah an sut.

⁸Jesuh in, “Thuzirh nan har tuk ruangah Moses in nupi maak theinak thu a lo pekmi a si. Asinain a hlanah cun cuvek a rak si lo.

⁹Fiangtein ka lo sim: mi pakhat in a nupi kha mipa dang thawn zum tlak loin a um ti siar lo, a maak ih nupi dang a ṭhit asile cupa cu ṭaangṭawm sualnak tuahtu a si,” tiah a ti.

¹⁰Dungthluntu pawl in, “Nupi le pasal karlakah hi bangtuk si ding a si ahcun ṭhi aw loin um lawlaw hai sehla a ṭha sawn,” tiah Jesuh cu an ti.

¹¹Cutikah Jesuh in, “Cuih nan timi cu mi hmuahhmuah hrangah a si lo; Pathian ih vo zemmi pawl hrang lawngah a si.

¹²Mipa in nupi an ṭhit lonak san cu a thu a phunphun a um; mi hrek cu cutiih um dingah an suahpimi a si; mi hrek cu nupi ṭhi lo dingah tilpermi an si ih mi hrek cu vancung Uknak ih ruangah nupi ṭhi loin an um. Cubangtuk ih a thlun theitu pawl cun hi thuzirhnak hi thlun ko hai seh,” tiah a ti.

¹³Mi ṭhenkhat in an faate pawl kha Jesuh in an lu parah kut suangin thla camsak dingah an rak hruai; asinain dungthluntu pawl in an rak kawk.

¹⁴Jesuh in, “Nauhak pawl cu ka hnenah ra ko hai seh, dawn hlah uh; ziangahtile vancung Uknak cu hi bangtuk pawl hrangah a si,” tiah a ti.

¹⁵An lu parah a kut a suan hnuah cutawk ihsin a feh.

¹⁶Voikhat ah mi pakhat Jesuh hnenah a ra ih, “Sayapa, kumkhua nunnak co dingah ziang thil ṭha so ka tuah ding?” tiah a sut.

¹⁷Jesuh in, “Thil ṭha thu ah ziangah so i sut? Miṭha Pakhat lawng a um. Nunnak co na duh ahcun thukham pawl thlun aw,” tiah a ti.

¹⁸Tlangvalpa cun, “Ziangbangtuk thukham so?” tiah a sut. Jesuh in, “Mi that hlah; ṭaangṭawm sualnak tuah hlah; ruk ru hlah, a dik loin mi sual puh hlah;

¹⁹na nu le na pa upat aw; na inn hnen kha nangmah na duhdawt awk vekin duhdaw aw,” tiah a ti.

²⁰Tlangvalpa in, “Hi thukham pawl cu ka thlun thluh zo. Ziang so ka tuah hrih ding?” tiah a sut.

²¹Jesuh in a hnenah, “Mi famkim si na duh ahcun va feh awla na neihmi hmuahhmuah zuar tahratin na ngahmi tangka cu mi farah pawl va ṭhen aw; cuticun vancung ah hlawnthil na nei ding. Cuih hnuah i thlun aw,” tiah a ti.

²²Cumi cu tlangvalpa in a theih tikah riah sia in a kir, ziangahtile milian zet a si.

²³Cutikah Jesuh in a dungthluntu pawl hnenah, “Fiangtein ka lo sim: milian hrangah vancung Uknak sungih luh cu a har ngaingai a si.

²⁴Ka lo sim sal: Kalauk pakhat ṭhim hnakua sungih luh hnakin milian pakhat Pathian Uknak sungih luh a har sawn,” tiah a ti.

²⁵Cumi cu dungthluntu pawl in an theih tikah an mang a bang ngaingai ih, “Cuti asile zoso runnak a ngah thei ding,” tiah an sut.

²⁶Jesuh cun hmaitontein a zoh hai ih an hnenah, “Himi hi minung hrangah cun a si thei lomi a si, sikhalsehla Pathian hrangah cun ziang hmuahhmuah a cang thei,” tiah a ti.

²⁷Cule Piter in, “Ziangtinkim taan in nangmah kan lo thlun zo. Ziang so kan ngah ding?” tiah a sut.

²⁸Jesuh in an hnenah, “Fiangtein ka lo sim: San Thar a thlen ih Milai Fapa cu a tokham sunglawi parih a to tikah cun nannih ka dungthluntu hleihnih hi Israel miphun hleihnih uktu si ve dingah tokham parah nan to ve ding.

²⁹Cule zokhal keimah ih hrangah nu le pa siseh, faate siseh, unau siseh, farnu siseh, inn siseh, lo siseh, a taantatu cu a let zakhat in a ngah sal ding ih kumkhua nunnak pek a si ding.

³⁰Sikhalsehla atuih hmaisa bik a si mi pawl hi neta bik an si leh ding; atuih neta bik a si mi pawl hi hmaisa bik an si ding,” tiah a ti.