Read Falam Chin MATTHAI 21 Bible Online

MATTHAI 21 - Falam Chin bible

MATTHAI 21

¹Jesuh le a dungthluntu pawl cu Jerusalem an naih vivo thlang. Olif tlang ih Bethphage khua an thleng. A dungthluntu pahnih hmaiah a hei thlah ih,

²hiti in thu a cah. “Nan hmaiih khua ah va feh uhla laakpi an hrenmi a faate thawn nan hmu lohli ding. A hri phoih uhla ka hnenah rak hruai uh.

³‘Mi in ziangah so nan hruai,’ an lo tile, ‘Bawipa in a ṭul a si,’ va ti uh. Cuticun hmakhatte ah an lo thlah ko ding,” tiah a ti.

⁴Himi cu profet ih a rak sim ciami kimternak dingah a si. Profet cun:

⁵“Zion khawpi khi sim uh, Na siangpahrang cu na hnenah a ra lai; Amah cu mi lungnem a si ih laak parah a to. Laak note parah a to a si, ti uh,” tiah a ti.

⁶Curuangah dungthluntu cu an feh ih Jesuh simmi vekin an tuah.

⁷Laak le a faate cu an rak hruai ih an zaang ah an puan an dam ih Jesuh cu a to.

⁸Mi tampi in Jesuh fehnak ding lamzin ahcun an puan an rak phah ih mi dang pawl in hnahsawl an lak ih lamzin ahcun an phah ve.

⁹Jesuh hmaiih a fehmi pawl siseh, a dunglam ihsin a thluntu pawl siseh, an zate in: “Hosanna! David Fapa cu thangṭhat uh! Bawipa ih hmin in a rami cu Pathian in thlawsuah pe ko seh! Hosanna! Pathian cu van a saangbik ah thangṭhat uh!” tiah an au ciamco.

¹⁰Jesuh cu Jerusalem khawsungih a luh tikah a khua pumpuluk in an au celcel ih, “Hi pa hi zoso a si?” tiah khua mi pawl in an sut.

¹¹Cutikah misenpi pawl cun, “Hi pa cu Galilee ram Nazareth khuami profet Jesuh a si,” tiah an ti.

¹²Jesuh cu Biakinn sungah a lut ih cutawkih thil a zuartu le a leitu pawl kha a dawi ṭheh. Tangka thlengtu pawl ih cabuai pawl le laileng zuartu pawl ih tokham pawl cu a linglet ṭheh.

¹³Cule an hnenah, “Ca Thianghlim sungah Pathian in, ‘Ka Inn cu thlacamnak inn ti a si ding,’ tiah a ti. Asinain nannih cun fifir relhnak kua ah nan tuah,” tiah a ti.

¹⁴Mitcaw le kebai pawl Biakinn sungah cun a hnenah an ra ih a damter.

¹⁵Thil maksak a tuahmi le Biakinn sungih nauhak pawl in, “David Fapa cu thangṭhat uh,” tiih an aumi cu puithiam upa pawl le Daanthiam pawl in an hmuh tikah an thin a heng ngaingai.

¹⁶Curuangah Jesuh kha, “An au reromi hi na thei maw?” tiah an sut. Jesuh in, “Thei tuk e! Ca Thianghlim sungah, ‘Nauhak le naute pawl sungin thangṭhatnak famkim na suakter,’ tiih nganmi kha nan siar dah lo maw?” tiah a ti.

¹⁷Jesuh cun a tlansan hai ih Jerusalem khawpi sung ihsin a suah hnuah Bethani khua ah a feh ih cunah a riak.

¹⁸A thaizing zingpitah Jesuh cu Jerusalem khawpi lamah a feh sal ih lamzin ah a ril a rawngzet.

¹⁹Lamzin kiangah theipi kung pakhat a hmu ih a hei pan; asinain a hnah siar lo ziang hman a hmu lo. Curuangah theipi cu, “Ziangtik hmanah rah nawn hlah,” tiah a ti. Hmakhatteah theipi kung cu a ro ṭheh.

²⁰Cumi cu a dungthluntu pawl in an hmuh tikah an mang a bang ngaingai. “Ziangtin so cutluk zamrangin a ro ṭheh?” tiah an sut.

²¹Jesuh in, “Fiangtein ka lo sim: rinhmainak nei lo tein nan zum taktak ahcun hi theipi kung parih ka tuahmi hi nannih khal in nan tuah thei ve ding. Himi lawng si loin hi tlang hman hi ‘ṭhawn awla tifinriat sungah dawp aw,’ nan ti le nan ti vekin a cang ding.

²²Nan zum ngaingai ahcun thlacamnak thawn nan dilmi hmuahhmuah cu nan ngah ding,” tiah a ti.

²³Jesuh cu Biakinn sungah a ra sal ih thu a zirh rero laiah puithiam upa pawl le hotu pawl a hnenah an ra ih, “Ziangah so hi bangtuk thil hi na tuah? Zo in so thu a lo pek?” tiah an sut.

²⁴Jesuh in, “Thu pakhat ka lo sut ve ding ih in let thei a si ahcun zo ih thu in hi bangtuk thil hi ka tuah ti ka lo sim hai ding,” tiah a ti.

²⁵“Johan in baptistma a pek kha Pathian thu in maw minung thu in so a pek,” tiah a sut. Cutikah anmah lakah pakhat le pakhat el awknak a um ih, “Ziangtin so kan ti ding? Pathian thu in kan ti asile, ‘Ziangah so Johan cu nan zum lo,’ in ti ding.

²⁶Asinain minung thu in kan ti lala khalle Johan cu mi hmuahhmuah in profet a si tiah an zum fawn ih misenpi pawl in kanmah lehlam ziangmaw tiin in ti pang ding, ti phan a um fawn!” an ti.

²⁷Curuangah, “Kan thei lo,” tiah Jesuh cu an let. Cule Jesuh in, “Cuti a si ahcun kei khal in ziangthu in hi bangtuk thil hi ka tuah, ti ka lo sim ve lo ding,” tiah a ti.

²⁸Jesuh in, “Ziangtin nan ruat? Voikhat laiah mi pakhat in fapa pahnih a rak nei. A fapa upa hnenah a feh ih, ‘Ka fa, tuihsun ah sabit hmuan ah va feh awla hna va ṭuan aw,’ tiah a fial.

²⁹A fapa cun, ‘Ka duh lo,’ tiah a el; asinain nehhnu ah a sir-aw sal ih sabit hmuanah cun a feh.

³⁰Cule a fapa nauta pa hnenah a feh sal ih sabit hmuan feh a fial ve. Cupa cun, ‘E law, ka pa,’ tiah a ti; asinain a feh lo.

³¹Hi fapa pahnih lakah hin zo in so an pa ih duhnak a tuah?” tiah a sut. Annih in, “A fapa upa,” tiah an let. Cutikah Jesuh in, “Fiangtein ka lo sim: siahkhongtu le hlawhhlang pawl hi nan hlanah Pathian Uknak sungah an lut ding.

³²Ziangahtile baptistma petu Johan cu a dikmi lamzin hmuh dingah nan hnenah a ra naón nan zum lo; sikhalsehla ngunkhuai khongtu le hlawhhlang pawl cun an zum. Cumi nan hmuh hnu hmanah nan thinlung nan thleng cuang lo, zum khal nan zum cuang lo,” tiah a ti.

³³Jesuh in, “Hi tahṭhimnak thu hi ngai hrih uh. Voikhat ah ram neitu pakhat a um ih sabit hmuan a tuah. Cuih a hmuan cu hawi in a kulh, sabit sawrnak ah khur a laih ih a kilnakah parthlam a sak. Cuih hnuah sabit hmuan ṭuantu pawl hnenah a saan ih amah cu khual tlawn ah a feh.

³⁴Sabit rah lawh caan a cut tikah a covo hlam dingah a hmuan a saangtu pawl hnenah cun a sal pawl a thlah.

³⁵Sabit hmuan a saangtu pawl in a sal pawl cu an kaih ih pakhat an vuak, pakhat an that ih a dang pakhat cu lungto in an deng.

³⁶Lo neitu pa cun a sal pawl tam deuh in a thlah lala; asinain hmuan saangtu pawl cun a hlan vek thotho in an rak tuahsiat.

³⁷A netnak ah a fapa a thlah, “Ka fapa hi cu an hmaisong rori ding,” tiah a ruat.

³⁸Asinain hmuan saangtu pawl cun a fapa an hmuh tikah, “Hi pa hi hmuan neitu ih fapa a si. Ra uh, kan that pei ih a thilri kan co pei,” tiah an ti aw.

³⁹A fapa cu an kai ih hmuan lengah an dirsuak ih an that.

⁴⁰“Hmuan neitu pa a rat tikah cuih hmuan saangtu pawl cu ziangtin a tuah ding tiah nan ruat?” tiah a sut.

⁴¹Annih in, “Cubangtuk mi ṭha lo pawl cu a that ding ih a covo hman teih a pe theitu ding midang hnenah a hmuan cu a san ding,” tiah an sawn.

⁴²Jesuh in an hnenah, “Ca Thianghlim ih a timi hi nan siar dah lo maw? Ca Thianghlim in: ‘Inn saktu pawl in santlai lo tiih an hnonmi lungto cu A thupi bikmi lungto ah a cang riangri; Himi cu Bawipa ih tuahmi a si, kan mithmuh ah a mawi zetmi a si,’ a ti.

⁴³“Fiangtein ka lo sim: Pathian Uknak hi nan hnen ihsin lak a si ding ih rah ṭhateih a suahtertu ding pawl hnenah pek a si ding,” tiah a ti.

⁴⁴“Zokhal hi lungto parih a tlami cu a kuai ṭheh ding ih hi lungto ih a rialmi poh cu leivut bangin an dip ṭheh ding,”[15] tiah a ti.

⁴⁵Jesuh simmi tahṭhimnak pawl cu puithiam upa le Farasi mi pawl in an theih tikah anmah ih thuhla a sim ti kha an thei.

⁴⁶Curuangah Jesuh cu kaih an tum. Asinain mipi in Jesuh cu profet a si tiah an ruah ruangah mipi pawl an ṭih ih an kai ngam lo.