Read Falam Chin MATTHAI 24 Bible Online

MATTHAI 24 - Falam Chin bible

MATTHAI 24

¹Jesuh cu a tho ih Biakinn ihsin a feh laiah a dungthluntu pawl a hnenah an ra ih Biakinn an rak sak daan a makzia kha an relpi.

²Jesuh in, “Asi, hipawl hi zohhnik uh. Fiangtein ka lo sim: hi lungto pakhat hman hi a umnak keel ah a um nawn lo ding; a zate in balthlak ṭheh an si ding,” tiah a ti.

³Jesuh cu Olif tlang parih a to laiah a dungthluntu pawl a thupte in a hnenah an ra ih, “Hi thil hi ziangtikah so a can ding? Cun na rat salnak caan le san cemnak langtertu ziang thil so a um ding, in simhnik?” tiah an sut.

⁴Jesuh in, “Ralring uh, zohman in lo bum hlah hai seh.

⁵Mi tampi ka hmin in an ra ding ih, ‘Keimah hi Messiah cu ka si,’ tiah an ti ding ih mi tampi an bum ding.

⁶Lam naite ah siseh, lam hlapi ah siseh, raldonak thawmvang nan thei ding, asinain va phang hlah uh. Cubangtuk thil cu a um ding, asinain a netnak a thleng tinak a si hrih lo.

⁷Ram khat le ram khat, peng khat le peng khat an do aw ding. Leilung tlun hmun kipah paam le linghnin a um ding.

⁸Cubangtuk thil pawl cu nauhrin nat thok bangtuk a si.

⁹“Cun an lo kai ding ih hrem ding le thah dingah mi kut ah an lo thlen ding. Keimah ruangah miphun kip in an lo hua ding.

¹⁰Cutikah mi tampi in an zumnak an bansan ding. Pakhat le pakhat an zuar aw ding ih an hua aw ding.

¹¹Cule profet deu tampi an suak ding ih mi tampi an bum ding.

¹²Sualnak a karh ding ih mi tampiih duhdawtnak cu a ṭumsuk ding.

¹³Sikhalsehla a netnak tiang a dinghnget theitu cu rundam a si ding.

¹⁴Cun miphun hmuahhmuah ih theih ṭheh dingah hi vancung Uknak Thuthang ṭha hi leilung tlun khuazakip ah phuan a si ding. Cuih hnuah a netnak cu a si ding.

¹⁵“Profet Daniel in a rak sim ciami, ‘Tuksumza Thil-borhhlawh,’ cu nan hmu ding. Cuih Thil-borhhlawh cu hmun thianghlim ah a ding ding. (Hi ca a siartu: a sim duhmi hi theithiam aw.)

¹⁶Cule Judea ramih a ummi pawl cu tlangpar ah tlan hai seh.

¹⁷A inn parih a ummi cu innsung thilri lak dingah ṭum hlah seh.

¹⁸Lo ih a ummi pa cu a puan lak dingah kir hlah seh.

¹⁹Cuih caan le cuih ni ah nunau favun le naukai neimi nunau pawl hrangah ziangtlukin so a har ding.

²⁰Thlatang caan le Sabbath ni ngelcel ih thinphang in nan tlan ciamco lonak dingah Pathian hnenah thlacam uh!

²¹Ziangahtile leilung hramthok ihsin tuih ni tiang a thlengmi ṭihnungza harsatnak hnakin a ṭihnung sawnmi a thleng ding ih cuvek ṭihnungzet harsatnak cu tuih hnu khalah a thleng nawn lo ding.

²²Cuih tikcu caan cu Pathian in tawiter loin rak um sehla zohman an luat lo ding. Asinain Pathian in a hrilmi pawl hrangah a caan cu a tawiter ding.

²³“Cule mi pakhatkhat in, ‘Zoh uh, hinah Messiah a um,’ a si lole ‘Khinah a um,’ tiah an lo ti le va zum hlah uh.

²⁴Ziangahtile Messiah deu le profet deu pawl an suak ding ih khawruahhar le hmuhsaknak mak ngaingai an tuah ding ih a cang thei tawkin Pathian ih hrilciami pawl hman an bum ding.

²⁵Ciing ringring uh! A hlankhan in ka lo simcia a si.

²⁶“Mi in, ‘Zoh uh, ramṭhing ah a um,’ tiah an lo ti a si ahcun va feh hlah uh. ‘Hi tawkah hin a thup aw,’ an ti khalle va zum hlah uh.

²⁷Ziangahtile nisuahnak ihsin ni tlaknak tiang hmakhat ih a tleu zukzomi nimthlakau vekin Milai Fapa cu a ra ding a si.

²⁸“Miruak umnak kipah langta an khawm aw ding.

²⁹“Cuih harsat caan a cem hnuah cun ni a thim ding, thlapi a vang nawn lo ding, van ihsin arsi pawl an tla ding ih vanih a ummi cah-nak huham pawl cu an fehnak lamzin ihsin an pial ding.

³⁰Cutikah Milai Fapa rat ding theihthiamnak van ah a lang ding; Milai Fapa cu vancung mero parin cah-nak huham le sunlawinak tumpi thawn a rat kha an hmu ding ih leilung tlun miphun zakip an ṭap ding.

³¹A ringzetmi tawtawrawt an tum ding ih leilung kil li ah a vancungmi pawl a thlah ding; vanhram khatlam deng ihsin khatlam deng tiangih ummi hrilciami pawl a finkhawm ding.

³²“Theipi kung thuhla in fim lo zirhseh. Theipi cu a hnge pawl an hung hring ih a hnah no tete tla an hung cerh tikah ṭhal tikcu a nai a si ti nan thei.

³³Cuvekin hi thil hmuahhmuah nan hmuh tikah a tikcu a naizet thlang ih a thleng cing ding ti nan thei pei.

³⁴Ciing ṭha uh: atu sanih a nunglai mi hmuahhmuah an thih ṭheh hlanah hi thil hmuahhmuah hi an kim ṭheh ding.

³⁵Lei le van cu an cemral ding naón ka ṭongkam cu a cem dah lo ding.

³⁶“Cuih ni le caan cu vanih a um mi vancungmi in siseh, Fapa in siseh, zohman in an thei lo; Pa lawng in a thei.

³⁷Noah san laiih thil a cangmi vekin Milai Fapa ratnak caanah cun a cang ve ding.

³⁸Tilik a tlun hlanah cun minung pawl cun an ei an in ih nupi an ṭhi, pasal an nei; Noah lawng sung a lut ni tiang nuam zetin an um.

³⁹Cutiin tilik in a fen hlo ṭheh hlan tiang ziang a cang ding ti zohman in an thei lo. Cuvek ṭhiamṭhiam in Milai Fapa a rat tik khalah a si ding.

⁴⁰Cuih caan a thlen tikah lo ah mi pahnih hna an ṭuan ding ih pakhat cu lakhlo a si ding ih pakhat cu taanta a si ding.

⁴¹Nunau pahnih sum an deng ding; pakhat cu lakhlo a si ding ih pakhat cu taanta a si ding.

⁴²“Curuangah ralring in um uh; ziangahtile ziang tikah nan Bawipa a ra ding ti nan thei lo.

⁴³Inn neitu pa in fifir a ratnak ding tikcu a theih ahcun it loin a kil ding ih fifir pa cun a inn bauh in a lut thei lo ding, ti cu nan theihmi a si.

⁴⁴Curuangah ralring tein um uh, ziangahtile Milai Fapa cu nan rin lo laifangah a ra ding a si.

⁴⁵“Cuti asile zo bik so rintlak le a fimmi hnen-um cu a si ding? Rintlak le a fimmi hnen-um cu a bawipa in hnen-um dang pawl hotu ah ṭuanvo a pek ih a tikcu hmantein hnen-um dang pawl rawl a pe theitu pa kha a si ding.

⁴⁶Ṭhateih a hna a ṭuan rero laifangah a bawipa a ra kir a si ahcun ziangtluk in so cuih hnen-um pa cu a lung a awi ding?

⁴⁷Thungai in ka lo sim: cuih hnen-um pa cu a bawipa in a thilri hmuahhmuah kilkhawitu ah a ret ding.

⁴⁸Sikhalsehla hnen-um fel lomi a si ahcun, ka bawipa cu a ra tlung hrih lo ding, a rei lai paam ding tiah a ti ding ih

⁴⁹hnen-um dang pawl kha a hmuhsuam, a thawi pei ih zuri pawl thawn ei le in in an um ding.

⁵⁰Cule a bawipa cu a rin lo ni le a theih lo caanah ruah lopi in a ra kir ding.

⁵¹A bawipa in cupa cu a dawi ding ih mititeraw pawl umnak hmunah a kuat ding; cutawkah ṭap-ai in a hacang a rial ding a si,” tiah a ti.