Read Falam Chin MATTHAI 25 Bible Online

MATTHAI 25 - Falam Chin bible

MATTHAI 25

¹Jesuh in, “Cuih caanah cun vancung Uknak cu mopa hmuak dingah an mei-inn thawn a fehtu fala pahra bangtuk a si ding.

²Cuih fala pahra sungah panga cu an aa ih a dang panga cu an fim.

³Fala aa pawl cun mei-inn an keng naón zinan an keng lo.

⁴A fimmi pawl cun an mei-inn khattein zinan an keng.

⁵Mopa cu a thlen a tlai ruangah fala pawl cu an sing ih an itthat.

⁶“Zanṭim a si tikah, ‘Mopa a ra! Tho uhla va hmuak uh,’ tiah au thawm a thang.

⁷Fala pahra cu an ṭhang ih an mei-inn cu an timtuah.

⁸Cule fala aa pawl cun fala fim pawl hnenah, ‘Kan mei-inn an mit cuahco thlang, nan zinan in ṭhen ve uh,’ tiah an dil.

⁹Fala fim pawl cun, ‘A cang lo ding, nannih ceem in zinan kan keng lo. Dawr ah va feh uhla va lei uh,’ tiah an ti.

¹⁰Curuangah fala aa pawl cu zinan lei dingah dawr ah an va feh; an feh sungah mopa cu a rak thleng. Ralringte in a rak um ciami fala panga pawl cu mopa thawn nupiṭhit rawldarnak puai sungah an lut ih sangka an khar.

¹¹“Cuih hnuah fala dang pawl cu an ra thleng ih ‘Bawipa, bawipa, sangka in rak on hram aw,’ tiah an au.

¹²‘Thungai in ka lo sim: nannih ka lo thei hai lo,’ tiah mopa in a ti,” tiah a sim.

¹³Jesuh in, “Cutiin a ni le a caan nan theih lo ruangah ralringte in hngak uh,” tiah a netnak ah a ti.

¹⁴Jesuh in, “Cuih caanah vancung Uknak cu hi bangtuk in a si ding. Voikhat ah mipa pakhat a um ih khual tlawn a tum. A feh hlanah a hnen-um pawl a ko ih a thilri pawl a kilkhawiter.

¹⁵An thil titheinak zat ciarin an hnenah a pek: pakhat pa hnenah sui tangka thawng nga a pek, a dang pakhat hnenah thawng hnih a pek ih a dang pakhat pa hnenah thawng khat a pek. Cuih hnuah khual a tlawng.

¹⁶Sui tangka thawng nga a ngahtu hnen-um pa cu hmakhatte ah a feh ih sum a tuah ih a miat thawng nga a ngah.

¹⁷Cubangtuk in thawng hnih a ngahtu pa khal in a miat thawng hnih a ngah ve.

¹⁸Sikhalsehla tangka thawng khat a ngahtu pa cu a feh ih khur a laih hnuah a bawipa ih tangka cu a phum.

¹⁹“Caan reipi hnuah an bawipa cu a ra kir ih an tangka hman daan thuhla fianter dingah an rel khawm.

²⁰Sui tangka thawng nga a ngahtu pa cu a ra ih a miat thawng nga a ra pek. ‘Bawipa sui tangka thawng nga i pek. Zohhnik! Hinah a miat thawng nga ka ngahmi khal ka lo pe,’ tiah a ti.

²¹A bawipa in ‘Hnen-um ṭha, rintlak zet hnen-um na si! Malte parah rinsantlak na si ruangah tampi kilkhawitu-ah ka lo tuah ding. Ra awla na bawipa lungawinak sungah hin ra tel ve aw,’ tiah a ti.

²²Cule thawng hnih pekmi pa a ra lut ih ‘Bawipa i pekmi kha sui tangka thawng hnih a si. Zohhnik! Hinah a miat ka ngahmi a dang thawng hnih khal a um,’ tiah a ti.

²³A bawipa in ‘A ṭha, hnen-um ṭha le rinsantlak hnen-um na si. Malte parah rinsantlak na si ruangah tampi kilkhawitu-ah ka lo tuah ding. Ra awla na bawipa lungawinak sungah hin ra tel ve aw,’ tiah a ti.

²⁴Cule thawng khat a ngahtu pa a ra lut ih ‘Bawipa, nang cu mi tifekfek na si ti ka thei; na tuh lonak ah a rah na la ih na vorh lonak khalah rawl na khawm.

²⁵Cuti a si ruangah ka lo ṭih ih na tangka cu leilung sungah ka phum. Zohhnik! Hinah a um ko,’ tiah a ti.

²⁶Cutikah a bawipa in ‘Nang hnen-um ṭha lo, mi zee pa! Thlaici ka tuh lonak ah ka aat ih ka vorh lonak ah ka khawm cu na thei taktak maw si?

²⁷Cuti a si ahcun ziangah so ka tangka cu ka ra kir tikih tangka ṭhang thawn ka ngah theinak dingah tangka retnak ah na rak ret lo?

²⁸Hiti a si ruangah hi pa hnenih tangka cu la uhla thawng hra a neitu pa hnenah pek uh.

²⁹Ziangahtile a neitu pawl cu pek belh an si ding ih a hleifuan in an nei ding. Asinain zianghman a nei lo pa hnen in a neihsunte hman kha lak sak a si ding.

³⁰Hi ṭhathnemnak nei lo hnen-um pa hi a leng khawthimnak ah hlon uhla cutawkah ṭap-ai in a hacang rial seh,’ tiah a ti.

³¹Jesuh in, “Milai Fapa cu Siangpahrang vekin a sunlawinak le vancungmi hmuahhmuah thawn a rat tikah siangpahrang tokham parah a to ding.

³²Miphun hmuahhmuah a hmaiah khawm ṭheh an si ding. Cule tuukhal in tuu le me a ṭhen bangin mi hmuahhmuah cu a ṭhen ding.

³³Mi ṭha pawl cu a vorhlam ah a ret ding ih mi ṭha lo pawl cu a kehlam ah a ret ding.

³⁴Cule Siangpahrang cun a vorhlamih a ummi pawl hnenah ‘Ra uh, ka Pa ih a thlawsuahmi pawl! Ra uhla leilung seemtir ihsin nan hrangih rem ciami vancung Uknak hi ra co uh.

³⁵Ziangahtile ka ril a rawn tikah ei ding rawl in pek; ka ti a haal tikah in ding tidai in pek; mikhual ka si laiah nan inn ah in tlunter;

³⁶hnipuan nei lo ka si tikah hnipuan in pek; ka nat laiah in tuamhlawm; thawng ka tlak laiah in veh,’ tiah a ti ding.

³⁷Cule miding pawl cun, ‘Bawipa ziangtikah so na rilrawn kan lo hmuh ih rawl kan lo pek; na ti a haal kan lo hmuh ih tidai kan lo pek?

³⁸Ziangtikah so mikhual na si kan lo hmuh ih kan innih kan lo tlunter; hnipuan na neih loih hnipuan kan lo pek?

³⁹Ziangtikah so na nat le thawng na tlak kan lo hmuh ih kan lo veh?’ tiah an ti ding.

⁴⁰Siangpahrang in, ‘Thungai in ka lo sim: hi ka unau pawl lakah nauta bik parih nan tuahmi cu ka parah nan tuah a si,’ a ti ding.

⁴¹“Cule a kehlam ih a ummi pawl hnenah cun ‘Nannih Pathian ih camsiatmi pawl, ka hnen in tlanhlo uh. Satan le a dungthlun pawl hrangih ngaihtuahmi a mit dah lomi meisa sungah vung feh uh.

⁴²Ziangahtile ka ril a rawng naón rawl in pe lo; ka ti a hal naón in ding tidai in pe lo;

⁴³mikhual ka si laiah nan inn ah in tlungter lo; hnipuan nei lo ka si laiah hnipuan in pe lo; ka naa ih thawng ka tlak laiah in tuamhlawm lo,’ tiah a ti ding.

⁴⁴Cule annih in ‘Bawipa, ziangtikah so na ril a rawn, na ti a haal, mikhual na si, hnipuan nei lo in na um, na nat i thawng na tlak kan lo hmuh ih kan lo bom duh lo?’ tiah an ti ding.

⁴⁵Siangpahrang in, ‘Thungai in ka lo sim: mi nauta bik pakhat nan bom duh lo kha, keimah in bawm duh lo a si,’ a ti ding.

⁴⁶Cuih hnuah cupawl cu kumkhua hrem hmun ah an feh ding ih mi ding pawl cu kumkhua nunnak ah an feh ding,” tiah a ti.