Read Falam Chin MATTHAI 26 Bible Online

MATTHAI 26 - Falam Chin bible

MATTHAI 26

¹Hi thu pawl Jesuh in a zirh ṭheh tikah a dungthluntu pawl hnenah,

²“Nan theih vekin tuih hnu ni hnih ah Lantak Puai a si ding ih Milai Fapa cu thinglamtah parih khencih dingah pek a si ding,” tiah a ti.

³Cule puithiam upa pawl le upa dang pawl cu Puithiam Saang Kaiafas inn ah an tong aw ih,

⁴Jesuh kha kai ih that dingah a thupte in an tawlrel.

⁵“Puai sungah cun kan that lo pei, mipi an buai pang ding,” an ti.

⁶Jesuh cu Bethani khua, phaarnat a rak tuartu Simon inn ah a um ih,

⁷rawl a ei laiah nunau pakhat a hnenah a ra ih alabaster[18] thawl khattein mankhung zet zihmui a kenmi kha Jesuh lu ah a toih.

⁸Cumi cu dungthluntu pawl in an hmuh tikah an thin a heng ih, “A va pamhmai ve!

⁹Hi zihmui cu tangka tampi ah zuar in a man kha mifarah pek ding sawn a si naón,” an ti.

¹⁰Cutiih an ti kha Jesuh in a theih tikah an hnenah, “Ziangah so hi nunau nu cu nan hnaihnok rero? Ka hrangih a tuahmi hi thil ṭha le thil mawi zet a si.

¹¹Mifarah cu nan hnenah an um ringring ding, asinain kei cu nan hnenah ka um ringring lo ding.

¹²Ka parih zihmui a toihmi hi ka ruak phum dingih a timtuahnak a si.

¹³Thungai in ka lo sim: Thuthang ṭha an simnak leilung tlun khuazakip ah hi nu ih a tuahmi hi amah hngilh lonak dingah sim a si ringring ding,” tiah a ti.

¹⁴Cule dungthluntu lakih pakhat a si mi Judas Iskariot an timi cu puithiam upa pawl hnenah a feh ih,

¹⁵“Nan hnenah Jesuh ka lo pek asile ziangso in pek ding?” tiah a sut. Annih in tangka sawmthum an siar ih Judas cu an pek.

¹⁶Cuih ni thokin Jesuh zuar theinak dingah Judas cun tikcu ṭha lawng a hngak.

¹⁷Thilnu rawi lo sangreu Puai ni hmaisa bik ni ah dungthluntu pawl cu Jesuh hnenah an ra ih, “Khuitawkah so Lantak Puai rawl ei tlaangnak cu kan lo tuah sak ding?” tiah an sut.

¹⁸Anih in, “Khawpi sung mi pakhat pa ih inn ah va feh uhla ‘Sayapa in ka tikcu a kim zo; ka dungthluntu pawl thawn na inn ah Lantak Puai kan tuah ding, a ti,’ va ti uh,” tiah a ti.

¹⁹Jesuh sim vek cun dungthluntu pawl cun Lantak Puai zanriah cu an tiimlaam.

²⁰Zanlam ah Jesuh le a dungthluntu pawl cu rawl ei dingah an to khawm.

²¹Zanriah an ei rero laiah Jesuh in, “Fiangtein ka lo sim: nanmah lakah pakhat in i zuar ding,” tiah a ti.

²²Dungthluntu pawl cu an riah a sia ngaingai ih pakhat hnu pakhat in, “Bawipa, keimah ka si maw?” tiah an ti fingfing.

²³Jesuh in, “Keimah thawn khengkhat sungih saang a hnimtu in i zuar ding a si.

²⁴Ca Thianghlim ih a simcia vekin Milai Fapa cu a thi ding, asinain Milai Fapa a zuartu pa cu a hmakhua a va pit so! Cupa cu a nu ih pum sungin suak loin rak um sawnta sehla amah ih hrangah a ṭha sawn ding naón!” tiah a ti.

²⁵Mi zuartu Judas in, “Sayapa, na ti sanmi cu kei ka si maw?” tiah a sut. Cutikah Jesuh in, “Nangmah in na sim zo,” tiah a let.

²⁶Rawl an ei laiah Jesuh in saang cu a lak ih thla a cam hnuah a phel ih a dungthluntu pawl hnenah a pek. “Lak uhla ei uh; himi hi ka taksa a si,” tiah a ti.

²⁷Cuih hnuah khuathai a lak ih Pathian hnenah lungawi thu a sim hnuah an hnenah a pek. “Nan zatein in uh;

²⁸himi hi ka thisen a si. Pathian thukam hngettertu le mitampi sual ngaithiamnak hrangih ka thletmi thisen a si.

²⁹Fiangtein ka lo sim: ka Pa ih Uknak sungah nanmah thawn sabit thar ka in sal hlan lo hi sabit cu ka in nawn lo ding,” tiah a ti.

³⁰Cule hla an sak ih Olif Tlangah an feh.

³¹Cule Jesuh in an hnenah, “Tuih zan rori ah nan zatein nan tlanhlo ding ih keimah lawng in tan ding; ziangahtile Ca Thianghlim in ‘Pathian in tuukhal kha a that ding ih tuurual cu ṭhekdarh ṭheh an si ding,’ a ti a si.[19]

³²Asinain thihnak ihsin thawhter sal ka si tikah Galilee ah nan hmaiah ka feh ding,” tiah a ti.

³³Piter in Jesuh hnenah, “Midang tlan ṭheh hman hai sehla kei cu ka tlan lo ding,” tiah a ti.

³⁴Jesuh in Piter hnenah, “Thungai in ka lo sim: tuih zan ar a khuan hlanah ‘Amah cu ka thei lo a si,’ tiah voi thum tiang i phatsan ding,” tiah a ti.

³⁵Piter in, “Na hnenih thi ve ding ka si hmanah ka lo phatsan dah lo ding,” a ti. Dungthluntu dang pawl khal in cuti cun an ti ciar.

³⁶Cule Jesuh cu a dungthluntu pawl thawn Gethsemane an timi hmuan ah an feh ih an hnenah, “Khitawk ih thla ka va cam sungah hinah rak to uh,” tiah a ti.

³⁷Piter le Zebedi fapa pahnih kha a fehpi. A riah a sia ih a thinlung a nuam lo ngaingai.

³⁸Cule an hnenah, “Ka thinlung hi riahsiatnak in a khat tuk ih a kuai ṭheh ding a bang. Hinah um uhla itthat loin i hngak uh,” tiah a ti.

³⁹Hlat deuh ah a va feh ih leilung ah a bok ih, “Ka Pa, a cang thei a si ahcun hi tuarnak khuathai hin i luatter hram aw! Asinain ka duh vekin si hlah seh, na duh vekin si ko seh,” tiah thla a cam.

⁴⁰Cun dungthluntu pathum hnenah a ra kir tikah an pathum in an itthat kha a hmu ih Piter hnenah, “Ziangtin so it loin nazi pakhat sung hman in hngak thei lo?

⁴¹Sualforhnak sungih tla lo dingin itthat loin thlacam uh. Thinlung cun a duh naón taksa cu a thazaang a der a si!” tiah a ti.

⁴²Jesuh cu a feh sal ih thla a cam lala. “Ka Pa, hi khuathai hin luat a theih lo ih ka in tengteng a ṭul a si ahcun na duh vekin si ko seh,” a ti.

⁴³Dungthluntu pathum hnenah a ra kir sal ih an rak itthat thotho; an mit an meng thei hrimhrim lo.

⁴⁴Jesuh cun a taanta hai ih a cam keel in voithumnak thla a cam.

⁴⁵Cule dungthluntu pathum hnenah cun a ra kir ih, “Nan itthat ih nan cawl lai hrih maw si? Zoh uh! Milai Fapa cu misual pawl kut sungih thlenter a sinak tikcu a thleng zo.

⁴⁶Tho uhla feh uhsi. Zoh uh, i zuartupa cu hinah a thleng zo,” tiah a ti.

⁴⁷Jesuh a ṭong rero laiah dungthluntu hleihnih lakih a tel ve mi Judas cu a ra thleng. Amah thawn hmun khatah puithiam upa pawl le Judah mi upa dang pawl ih thlahmi miburpi kha ralnam le talhtum pawl keng in an ra.

⁴⁸Mi phiartu cun misenpi kha theihthiamnak a rak simcia ih, “Ka hnam dingmi pa cu nan kaih duhmi pa a si ih nan kai pei!” tiah a ti.

⁴⁹Judas in Jesuh cu a pan vurvo ih, “Sayapa, na parah daihnak um ko seh,” a ti phah in a hnam.

⁵⁰Jesuh in, “Ka rual, na tummi cu tuah zaang sawn aw,” tiah a ti. Cule miburpi an ra thleng ih Jesuh cu an kaih hnuah fektein an ṭem.

⁵¹Jesuh thawn a ummi lakah pakhat pa in a ralnam a zuuk ih Puithiam Saang ih salpa kha a hna a sah thlak.

⁵²Cutikah Jesuh in, “Na nam cu a kawm sungah khum sal aw. Ralnam a hmangtu cu ralnam in an thi ve ding.

⁵³Ka Pa hnenah bomnak ka dil a si ahcun hmakhatte ah vancungmi ralkap bur[20] hleihnih hnakih tam a run thlah thei ti hi na thei lo maw?

⁵⁴Asinain cu bangtuk in sisehla Ca Thianghlim in a cang ding tiih a sim ciami cu ziangtinso a kim thei ding?” tiah a ti.

⁵⁵Cule Jesuh in miburpi hnenah cun, “Kei hi rukru maw ka si, ralnam le talhtum thawn keimah kai dingih nan rat ciamco? Nitinte Biakinn ah ka to ih thu ka lo zirh ṭheu laiah zohman in in kai fawn lo.

⁵⁶Sikhalsehla profet pawl in Ca Thianghlim sungih an nganmi a kim theinak dingah hi bangtuk in a cang a si,” tiah a ti. Cuihsin dungthluntu pawl cun an taan ih an tlansan ṭheh.

⁵⁷A kaitu pawl in Jesuh cu Puithiam Saang Kaiafas inn ah an fehpi ih cutawkah cun Daanthiam pawl le Judah upa pawl an tong aw khawm.

⁵⁸Piter in a hlat nawn ihsin Puithiam Saang ih tual tiang a thlun. Tual ah a vung lut ih ziang bangtuk in thil a cang ding ti zoh duh ah ralvengtu pawl hnenah a to.

⁵⁹Puithiam upa pawl le Khonsil upa pawl in Jesuh cu an thah theinak dingah an zatein a sual an hawl.

⁶⁰Thuphan per tahratin a mawhnak hawltu tampi an ra suak naón a sualnak an hmu thei cuang lo. A netnak ah mi pahnih an ra suak ih,

⁶¹“Hi pa hin ‘Pathian Biakinn hi ka bal ding ih ni thum ah ka sak thei sal ding,’ a ti,” tiah an ra ti.

⁶²Cutikah Puithiam Saang a ding ih Jesuh cu, “Hitiin sual an lo puh hi a leh ngaihnak na thei lo maw?” tiah a sut.

⁶³Asinain Jesuh cu daitein a um. Cule Puithiam Saang cu a hung ṭong sal ih, “A nungmi Pathian hmin saal in siatcam in ka lo ti: Pathian fapa Messiah na si maw si lo so, sim hnik,” tiah a ti.

⁶⁴Jesuh in, “Nangmah in na sim zo! Asinain thungai in ka lo sim: tuih thokin Milai Fapa hi Ziangkimtithei ih vorhlam ah to in nan hmu pei ih vancung mero par ihsin a rat khal na hmu ding,” tiah a ti.

⁶⁵Cuvete in Puithiam Saang cun a hnipuan a thlek ih, “Cumi cu Pathian thangsiat a si! Thutheitu dang kan ṭul nawn lo. Pathian a thangsiat daan cu atu nan thei zo!

⁶⁶Ziangtin nan ruat?” tiah a sut. Annih in, “A mawh rori, thah ding a si,” an ti.

⁶⁷Cule a hmaiah cil an phui ih an thawi ih an beng. Cule a bengtu pawl in,

⁶⁸“Maw Messiah, profet bangin in sim hnik he! Zoso a lo bengtu!” tiah an ti.

⁶⁹Piter cu innleng tual ih a to laiah Puithiam Saang ih hnen-um nunau pakhat a ra ih, “Nangmah khal hi Galilee mi Jesuh thawn a pawl-awmi na si,” tiah a ti.

⁷⁰Asinain Piter in mizapi hmaiah cun a el ih, “Na ṭongmi hi ziang thu a si ti ka thei lo,” tiah a let.

⁷¹Cule Piter cu kotka lamah a va feh. Hnen-um nunau dang in a hmu ih, “Hi pa hi Nazareth mi Jesuh thawn a ummi a si,” tiah cu tawkih a rak ummi mipi pawl hnenah a ti.

⁷²Piter cun a el sal ih, “Siatcam in ka sim: hi pa hi ka theihmi a si lo,” a ti.

⁷³Caan malte hnuah cutawkih a dingmi pawl in Piter cu, “Phat duh hlah, nang khal an hnenih telmi na si ko. Na aw cawi in a lang a si,” tiah an ti.

⁷⁴Cule Piter in, “Siatcam in thudik ka sim a si. Thudik lo ka sim a si le Pathian in i hrem seh! Hi pa hi ka thei hrimhrim lo,” tiah a ti. Cuṭheh vete in ar a khuang ih,

⁷⁵Piter in Jesuh ih a rak sim ciami, “Ar a khuan hlanah ka thei lo a si, tiah voithum tiang i phatsan ding,” a timi kha a vun mang sal. Piter cu khawlengah a suak ih thinlung na zetin a ṭap.