Read Falam Chin MATTHAI 27 Bible Online

MATTHAI 27 - Falam Chin bible

MATTHAI 27

¹Zingthlapit ah puithiam upa pawl hmuahhmuah le Judah upa pawl in Jesuh cu that dingah an tawlrel.

²Thir cikcin in an khih hnuah an hruai ih Rom Acozah bawi Mangki Pilat kut ah an pek.

³Mi phiartu Judas in Jesuh cu thu an ṭhen ih mawh an pek ti kha a theih tikah a sir-aw ih tangka sawmthum kha puithiam upa le Judah upa hnenah a va khirh sal.

⁴“Mawhnak nei lo pa thihnak thleng tiangin ka phiar ruangah ka sual tuk a si,” tiah a va ti. Annih in, “Cucu ziangso kannih kan poisat? Na duhnak in va tuah ko,” tiah an ti.

⁵Judas in tangka sawmthum cu Biakinn sungah a hlonta ih a suak. A va feh ih amah le amah a hngawng in a awk that aw.

⁶Puithiam upa pawl in cuih tangka cu an sar ih, “Hi tangka hi thisen tangka a si ruangah biakinn tangka retnak sungih ret ding cu kan Daan in a duh lo,” tiah an ti.

⁷A thuhla an rel ih zate lungkimnak in cuih tangka cu Beel Tuahtu ih lo leinak ah an hmang ih cuih lo cu ramdangmi pawl phumnak thlaanmual ah an hmang.

⁸Curuangah cuih lo cu tuih ni tiangin, “Thisen Lo,” tiah kawh a si lai.

⁹Cuticun profet Jeremiah ih a rak simmi cu a kim. Profet Jeremiah in, “Israel mi pawl in cupa leinak ah an lungkim in an khiahmi tangka sawmthum cu an lak ih,

¹⁰Bawipa in thu i pekmi vekin beel tuahtu lo leinak ah an hmang,” tiah a rak ti.

¹¹Jesuh cu Rom Acozah Mangki bawi hmaiah cun a ding ih Mangki bawipa cun, “Judah mi pawl ih Siangpahrang na si maw?” tiah a sut. Jesuh in, “Nangmah in na ti si!” tiah a sawn.

¹²Asinain puithiam upa le Judah mi upa dang pawl ih sual an puhmi pawl cu zianghman a let lo.

¹³Curuangah Pilat in, “Sual an lo puhmi hmuahhmuah hi na thei lo maw?” tiah a ti.

¹⁴Asinain Jesuh cun kam khat hman a sawn duh lo; curuangah Mangki bawipa cu a khawruah a har ngaingai.

¹⁵Lantak puai tinte in Mangki bawipa cun, misenpi in suakseh tiah an ngenmi thawngtla pakhat kha a suahter daan a si.

¹⁶Culai ah mi kipih theihmi thawngtla pakhat a um ih a hmin cu Jesuh Barabbas a si.[21]

¹⁷Misenpi an tonkhawm awk tikah Mangki bawi Pilat cun, “Zoso lo thlah sak ningla nan duh? Jesuh Barabbas maw Messiah timi Jesuh so?” tiah a sut.

¹⁸Judah upa pawl in an nahsiik ruang meenah Jesuh cu a kut ah an thlenter a si, ti kha Pilat in fiangtein a thei.

¹⁹Pilat cu thuṭhennak innpi sungih a to laiah a nupi in, “Mawhnak zianghman a nei lo pa kha a parah zianghman rak tuah hlah. Ziangahtile tuihsun ka mang ah amah ih ruangah tuarnak tampi ka tong a si,” tiah thu a rak cah.

²⁰Puithiam upa pawl le a dang upa pawl in misenpi kha an forh hai ih misenpi in Barabbas thlah ih Jesuh that dingah Pilat kha an dil.

²¹Asinain Pilat cun, “Himi pahnih lakah zoso thlah ningla nan duh?” tiah misenpi kha a sut lala. Misenpi in, “Barabbas,” tiah an ti.

²²“Cuti asile Messiah timi Jesuh hi ziangtin ka tuah pei?” tiah Pilat in a sut. “Thinglamtah parah that aw!” tiah an zatein an ti.

²³Asinain Pilat in, “Ziang sualnak so a tuah?” tiah a sut hai. Cutikah, “Thinglamtah ah khenbet aw!” tiah an au thei patawp in an au ciamco.

²⁴Pilat in cutiih suh rero kha a ṭhathnemnak a um lo ih misenpi in hnaihnawhnak riangri an suakter pang ding ti a hmuh ruangah tidai lak tahratin mizapi hmaiah a kut a kholh ih, “Hi mawh nei lo pa thihnak ah hin kei ka tel lo! Nanmah ih tuahmi a si,” tiah a ti.

²⁵Cutikah misenpi cun, “Hi pa thihnak ih thisen cu kanmah le kan tesinfa pawl parah thleng ko seh,” tiah an ti.

²⁶Cuticun Pilat in an hrangah Barabbas cu a thlah sak; cule Jesuh cu a thawiter hnuah thinglamtah parih that dingin an kut ah a pek.

²⁷Cule Pilat ih ralkap pawl in Jesuh cu Mangki bawipa ih inn ah an fehpi ih misenpi pawl cu a kiangah an ra khawm.

²⁸A hnipuan an hlit ih puansen an sinter.

²⁹Cule hlingih tuahmi lukhuh a lu ah an khumter; cun a vorhlam kut ah fung an kenter. A hmaiah an khuk bilh tahrat in hmuhsuamnak thawn, “Judah Siangpahrang a nun khua sau hram seh,” an ti.

³⁰An cil an phui, funghreu an lak ih a lu ah an vuak.

³¹Cutiin an hmuhsuam ṭheh hnuah a puan cu an hlit ih amah ih hnipuan an hrukter sal. Cule thinglamtah parih thah dingah an hruai.

³²Cutiih an feh laiah Sairin khua mi Simon kha an tong ih ralkap pawl in Jesuh thinglamtah kha hramhram in Simon an putter.

³³Golgotha an timi hmun an thleng. Golgotha ti cu, “Luruh Hmun,” tican a si.

³⁴Cutawkah Jesuh cu hnitkha vekih a khami thawn rawimi sabitti an pek; a tep ih a in duh lo.

³⁵Jesuh cu thinglamtah ah an khen ih a hnipuan cu camcawhfung zuukin an zem aw.

³⁶Cuih hnuah an to ih amah cu an kil.

³⁷“Hi pa cu Judah Siangpahrang Jesuh a si,” tiah sual an puhnak kha an ngan ih a lu tlunah an tar.

³⁸Cun mi ṭha lo damiah pahnih Jesuh thawn thinglamtah parah an khen ve; pakhat a vorhlam ah, a dang pakhat a kehlam ah an thlai.

³⁹A kiangkapih a suksotu pawl tla in an diriam in an lu an sut hnawh ih,

⁴⁰“Biakinnpi bal tahratin ni thum sungah ka sak sal ding na ti a si lo maw! Pathian Fapa na si ahcun nangmah le nangmah run awla thinglamtah par ihsin rung ṭum aw he!” tiah an dekcok.

⁴¹Cubangtuk in puithiam upa pawl le Daanthiam pawl le Judah upa pawl in an hmuhsuam ih,

⁴²midang cu a hum thei, asinain amah le amah cu a hum aw thei lo! Israel Siangpahrang a si lo maw si? Atu rori ah hin thinglamtah par ihsin a rung ṭum a si ahcun kan zum ding a si!

⁴³Pathian a rinsan ih Pathian Fapa ka si a ti si! Pathian in a hum duh maw kan zoh hnik pei cu!” tiah nautat ṭong in an ti.

⁴⁴Amah thawn an khenbetmi damiah pawl tla in cu bangtuk cun an nautat ve.

⁴⁵Sun laitak fangah ramsung pumpuluk ah thimkhawzing a tlung ih nazi pathum sung a thim.

⁴⁶Zanlam nazi pathum ah Jesuh cu napi in a au ih, “Eli, Eli, lema sabakthani?” a ti;[22] a tican cu, “Ka Pathian, Ka Pathian, zianghrangah i tlansan?” ti a si.

⁴⁷Cutawkih a dingmi hrekkhat pawl in an thei ih, “Elijah a ko a si,” tiah an ti.

⁴⁸An lakah pakhat pa cu a va tlan vurvo ih tidai a hawp thei zetmi puan a va lak ih sabit sungih a hnim hnuah funghreu parah a ṭemcih ih Jesuh cu a inter zik.

⁴⁹Asinain midang in, “Um hrih, amah run dingah Elijah a rat le rat lo kan zohhnik pei,” tiah an ti.

⁵⁰Jesuh cu napi in a au sal ih a hnuk a cat.

⁵¹Cule Biakinn puanzar cu a tlunlam ihsin a hnuailam tiang ṭhen hnih ah a tlek. Leilung a hnin ṭheh, lungpi an kuai ṭheh,

⁵²thlaan pawl an ong aw ih a rak thi ciami Pathian mithiang pawl an tho sal.

⁵³An thlaan ihsin an suak ih Jesuh cu thlaan in a thawhsal hnuah Khua Thianghlim sungah an lut ih mi tampi hmaiah an lang.

⁵⁴Ral bawipa pakhat le amah thawn Jesuh a kiltu ralkap pawl in linghnin le thil dang a cangmi hmuahhmuah kha an hmuh tikah an tuk a sum ih, “Hi pa hi Pathian Fapa taktak a si,” tiah an ti.

⁵⁵Galilee ram ihsin Jesuh a rak thluntu le a rak bawm ṭheutu nunau tampi an um ih a hlat nawn in an rak cuan.

⁵⁶Cuih nunau lakah cun Mari Magdalene, Jeim le Josef ih nu Mari le Zebedi nupi tla an tel.

⁵⁷Zanlam a hung si tikah Arimathea khua ihsin milianpa pakhat a ra thleng. A hmin cu Josef a si ih Jesuh dungthluntu pakhat a si ve.

⁵⁸Pilat a va tong ih Jesuh ruak kha a dil. Jesuh ruak cu Josef hnenih pek dingah Pilat in thu a pek.

⁵⁹Cuticun Josef in Jesuh ruak cu a lak ih puan thar nemtein a tuam ih,

⁶⁰amah ih thlaan dingih lungkhermi thlaan thar sungah a phum. Cuih hnuah lungphengpi in thlaan kaa cu a kharta ih a fehsan.

⁶¹Mari Magdalene le a dang Mari cu cutawk ahcun thlaanlam hoi in an to.

⁶²A thaisun Sabbath ni ah puithiam upa le Farasi pawl in Pilat an tong ih,

⁶³“Bawipa, hi thuphanpertu pa hin a nun laiah ‘Nithum hnuah ka tho sal ding,’ tiah a rak ti.

⁶⁴Curuangah a thlaan kha ṭhatein ni thumnak ni tiang kilter aw; culole a dungthluntu pawl in a ruak kha an fir pei ih misenpi pawl kha thihnak ihsin a tho sal zo a si, tiah an bum ding. Hi neta bumnak hi a hmaisa bumnak hnakin a poimawh sawn ding a si,” tiah an ti.

⁶⁵Pilat cun, “A kiltu Rom ralkap pawl ret uhla thlaan kha a him thei tawkin tuah uh,” tiah a ti.

⁶⁶Curuangah an feh ih thlaan cu a him thei tawkin an tuah; thlan khar lungpheng kha tacik an khen ih a lengin ṭha zetin an kilter.