Read Falam Chin MATTHAI 28 Bible Online

MATTHAI 28 - Falam Chin bible

MATTHAI 28

¹Sabbath ni a liam ih a thaizing zingthlapit ah Mari Magdalene le a dang Mari cu thlaan zoh dingah an feh.

²Hmakhatteah nasa zet in ling a hnin. Bawipa ih vancungmi pakhat cu vancung ihsin a rung ṭum ih thlaan sangka khar lungphengpi cu a ṭhawn ih a parah a to.

³A hmuihmel cu nimthla bangtuk a si ih a hnipuan cu vur bangin a vaar.

⁴Thlan kiltu pawl cu an ṭih tukah an khur ih mithi bangtuk an si.

⁵Vancungmi cun nunau pawl hnenah, “ṭih hlah uh; thinglamtah parih an thahmi Jesuh nan hawl ti ka thei.

⁶Hinah a um lo, a rak simcia bangtuk in thihnak ihsin thawhter sal a si zo. An phumnak hmun hi ra zohhnik uh.

⁷Zamrang in va feh uhla a dungthluntu pawl kha ‘Thihnak ihsin thawhter a si zo; nan hmaiah Galilee ah a feh ding ih cutawkah nan hmu ding!’ tiah va sim uh. Ka lo simmi hi hngilh hlah uh,” tiah a ti.

⁸Curuangah zamrang zetin thlaan ihsin an tlung; an ṭih phah, an lung a awi phah, cuticun dungthluntu pawl sim dingah an tlan.

⁹Rinlopi-ah Jesuh in a tong hai ih, “Nan hnenah daihnak um hram seh,” tiah a ti. An va pan ih a ke an va pom ih an biak.

¹⁰Jesuh in an hnen ah, “Nan thinphang hlah uh. Ka unau pawl kha Galilee ih feh dingin va sim uh. Cutawkah in tong ding!” tiah a ti.

¹¹Cutiih nunau pawl an feh laiah, thlaan kiltu ralkap hrekkhat pawl cu khawpi sungah an feh ih puithiam upa pawl hnenah thlaan ih thil a cangmi hmuahhmuah kha an sim.

¹²Puithiam upa pawl le Judah mi upa pawl an tong aw ih thu an ruatkhawm. Ralkap pawl kha nawhthuh paisa tampi an pek ih,

¹³“Kan ihthat sungah zanah a dungthluntu pawl an ra ih a ruak kha an fir a si, nan ti pei.

¹⁴Cumi cu Mangki bawipa in a theih khalle nan phan ding zianghman a um lo, mawhnak an nei lo tiah kan lo simsak ding,” tiah an ti.

¹⁵Thlan kiltu ralkap pawl in paisa cu an lak ih an simmi vekin an tuah. Cuih thu cu Judah mi pawl cun tuihsun tiangin an rel ṭheumi a si.

¹⁶Dungthluntu hleikhat pawl cu Jesuh ih a fial bangtuk in Galilee tlang parah an feh.

¹⁷Amah cu an hmu ih an biak, asinain a hrek cun an zum lo.

¹⁸Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo.

¹⁹Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh.

²⁰Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.