Read Falam Chin MATTHAI 4 Bible Online

MATTHAI 4 - Falam Chin bible

MATTHAI 4

¹Cule Jesuh cu Satan ih hniksak dingah Thlarau in ramṭhing ah a fehpi.

²Ni sawmli le zan sawmli rawl loih a um hnuah Jesuh cu a ril a rawng ngaingai.

³Cutikah Satan a hnenah a ra ih, “Pathian Fapa ngaingai na si ahcun hi lungto pawl hi saang ah cang dingin thu pe aw,” tiah a ti.

⁴Asinain Jesuh cun, “Ca Thianghlim in ‘Milai nunnak cu rawl lawngin a si lo. Pathian hmurka in a suakmi ṭongkam in a si sawn,’ a ti,” tiah a let.

⁵Cule Satan in Jesuh cu Jerusalem Khawpi Thianghlim ih Biakinn zim ah a fehpi ih,

⁶a hnenah, “Pathian Fapa na si ahcun hitawk ihsin dawp aw, ziangahtile Ca Thianghlim ah, ‘Pathian in na kiangih a ummi vancungmi pawl thu a pe ding, An kut in an lo dom ding ih na ke cu lungto thawn a khawng aw lo ding,’ tin a um,” tiah a ti.

⁷Asinain Jesuh cun, “Ca Thianghlim in ‘Bawipa na Pathian cu na hniksak lo pei,’ a ti a si,” tiah a let.

⁸Cule Satan in Jesuh kha tlang saangpi parah a fehpi ih leilung tlun ram hmuahhmuah kha an maksaknak thawn a hmuh ṭheh.

⁹Cuih hnuah Satan cun, “Na khuk bilh tahratin i biak ahcun hi hmuahhmuah hi ka lo pe ding,” tiah a ti.

¹⁰Cutikah Jesuh in, “Satan, tlan aw, ziangahtile Ca Thianghlim in ‘Bawipa na Pathian na biak pei ih amah lawng na rian pei,’ a ti a si,” tiah a let.

¹¹Cule Satan cun a tlansan; cuih hnuah vancungmi pawl in an rung tuamhlawm.

¹²Johan kha thawng ah an thlak ti a theih tikah Jesuh cu Galilee ah a feh.

¹³Nazareth ah um loin Kapernaum khua ih um dingin a feh. Kapernaum khua cu Zebulun le Naftali phun pawl ram sung Galilee Tili kapih a ummi khua a si.

¹⁴Hitiih a umnak cu profet Isaiah ih a rak sim ciami kimternak dingah a si. Isaiah cun:

¹⁵“Zentail mi pawl ih umnak Galilee ram sung, Jordan tiva ral khatih um, Tipi lamah, Zebulun le Naftali ram,

¹⁶Khawthim sungih a ummi pawl in, Tleunak maksak an hmu ding. Thihnak ram thim sungih a ummi pawl parah tleunak a suak ding,” tiah a rak ti.

¹⁷Cuih tikcu ihsin Jesuh in, “Nan sual sir uh, ziangahtile vancung Uknak a nai zo,” tiah thusim hram a thok.

¹⁸Jesuh cu Galilee Tili kapih a feh rero laiah ngakaitu unau pahnih, tili sungah sur vorh in nga an kaih rero kha a hmu. Cuih unau pahnih cu Simon (Piter tiih kawhmi) le a nau Andru an si.

¹⁹Jesuh cun, “Ka hnenah ra uhla mikaitu ah ka lo tuah ding,” a ti.

²⁰Hmakhatteah an sur pawl cu an tanta ih amah cu an thlun.

²¹A feh vivo ih Zebedi fapa pahnih Jeim le Johan teih unau a hmu. Anmah cu an pa Zebedi thawn an lawng sungah an um ih an sur pawl an tholh rero. Jesuh cun a vun ko ih,

²²hmakhatte ah an lawng le an pa tanta in Jesuh cu an thlun.

²³Jesuh cu Galilee peng khuazakip ah a feh ih sinakok kipah thu a zirh vivo. Vancung Uknak Thuthang ṭha a sim vivo ih natnak a phunphun a tuartu pawl kha a damter vivo.

²⁴A thuhla cu Siria ram hmuahhmuah tiangin a thang thluh; curuangah cun natnak le harsatnak a phunphun a tuartu, khawsia-ih polhmi pawl, merainat nei pawl le a zengmi pawl kha a hnenah an ratpi ih an zate in a damter ṭheh.

²⁵Galilee le Dekhapolis[3] peng, Jerusalem le Judea peng le Jordan tiva ral ihsin mi tampi an ra ih amah cu an thlun.