Read Falam Chin MATTHAI 5 Bible Online

MATTHAI 5 - Falam Chin bible

MATTHAI 5

¹Jesuh in mipi a hmuh tikah tlangpar ah a hung kai; cutawkah cun a to ih a dungthluntu pawl a hnenah an ra.

²Cule a kam a kau ih hiti in thu a zirh:

³“Thlarau lamah ka farah ti a thei awtu pawl cu mi thluasuak an si; Ziangahtile vancung Uknak cu anmah ih ta a si.

⁴Ninghang lungsia pawl cu mi thluasuak an si; Ziangahtile Pathian in a hneem hai ding.

⁵Lungnemmi pawl cu mi thluasuak an si; Ziangahtile Pathian ih kam ciami an co ding.

⁶Pathian ih duhnak tuah dingih a hiarhaaltu pawl cu mi thluasuak an si; Ziangahtile Pathian in an lung di a riamter ding.

⁷Mi zaangfah thiamtu pawl cu mi thluasuak an si; Ziangahtile Pathian in anmah a zaangfah ve ding.

⁸Thinlung a thiangmi pawl cu mi thluasuak an si; Ziangahtile Pathian an hmu ding.

⁹Remnak a tuahtu pawl cu mi thluasuak an si; Ziangahtile Pathian ih fahniang tiah kawh an si ding.

¹⁰Pathian duhnak tuah ruangih hremnak a tuartu pawl cu mi thluasuak an si; Ziangahtile vancung Uknak cu anmah ih ta a si.

¹¹“Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si.

¹²Nan lungawi in nan aipuang uh, ziangahtile nan hrangah tuarman tampi vancung ah ret a si. Nan hlanih profet pawl khal cu bangtuk in hrem an tuar zo.

¹³“Nannih cu mi phunkip hrangah cite nan si. Sihmansehla cite cu a alnak a ziam asile alter sal a theih nawn lo. Ṭhathnemnak zianghman a neih nawn lo ruangah hlon ding le pal men ding lawng a si.

¹⁴“Nannih cu leilung pumpi hrangah tleunak nan si. Tlangpar ih tohmi khua cu thuh a theih lo.

¹⁵Zohman in mei-inn an van tikah khengkuum an khuh dah lo. Mei-inn vannak tung parah an vang. Cutiin inn sungih a ummi zate hrangah tleunak a si.

¹⁶Cubangtuk in nan tleunak cu mi hmaiah tleuter ding nan si. Cuticun thil ṭha nan tuahmi cu mi in an hmu ding ih vanih a ummi nan Pa kha an thangṭhat ding.

¹⁷“Moses Daan pawl le profet pawl ih thuzirhmi siatsuah dingah a ra, tiah i ruat hlah uh. Cupawl siatsuah dingah ka ra lo, an zirhmi pawl kimter dingah ka ra sawn a si.

¹⁸Hihi cing ṭha uh: lei le van a um sung cu Daan sungih daan terek bik pakhat hman a hlo lo ding, ziang hmuahhmuah a kim ṭheh hlan cu[4] pakhatte hman a hlo lo ding.

¹⁹Curuangah zokhal sisehla thukham sungih a thupi lo bik pakhatte hman kha a thlun lo ih mi dang khal thlun lo dingin a zirh ve a si ahcun amah cu vancung Uknak ah mi tenau a si ding. Cule zokhal sisehla Daan kha a thlun ih mi dang khal thlun ve dingih a zirh a si ahcun amah cu vancung Uknak ah mi thupi a si ding.

²⁰Fiangtein ka lo sim: Pathian duhmi tuahnak ah Daanthiam pawl le Farasi pawl hnakih nan fel sawn lo ahcun vancung Uknak ah nan lut thei lo ding.

²¹“Hlanlaiah cun ‘Mi va that hlah, mi a thattu cu thuṭhennak a tuar ding a si,’ an rak timi nan thei zo.

²²Asinain kei cun: a unau parah a thin a hengtu cu thuṭhennak a tuar ding; zokhal sisehla a unau kha ‘Zianghman ih ṭhahnem lo,’ a titu cu thuṭhentu hmaiah suahpi a si pei ih a unau kha, ‘Mi aa,’ a titu cu hell meisa sungah a tla ding tiah phan a um a si, tiah ka ti.

²³Curuangah biakṭheng ah laksawng Pathian hnenih pek na tum laiah na unau pakhatkhat na parah thinhengnak a nei ti na thei a si ahcun,

²⁴biakṭheng hmaiah na laksawng cu taanlawk awla zamrang zetin na unau hnenah feh tahratin remnak va tuah aw; cule ra sal awla na laksawng cu Pathian hnen ah pe aw.

²⁵“Mi pakhatkhat in a lo khiing ih zungih a lo thlenpi a si ahcun, zung nan thlen hlan a tikcu um laiah amah thawn remnak va tuah aw. Zung a lo thlenpi hnuah cun thuṭhentu kut ah a lo pe ding ih thuṭhentu in palik hnenah a lo pe lala ding ih thawng ah thlak na si ding.

²⁶Fiangtein ka lo sim: an lo cawhmi tangka na kuan ṭheh hlan lo thawng sungah na um ding.

²⁷“Ṭaangṭawm sualnak nan tuah lo pei, an ti ṭheumi nan thei.

²⁸Asinain kei cun: nunau kha hahio mit in a zohtu cu a thinlung in cu nu thawn ṭaangṭawm sualnak a tuah zo, tiah ka lo ti.

²⁹Curuangah na vorhlam mit in a lo sualter asile phorh awla hlon aw. Na ruangpi hell sungih hlon tuar hnak cun na taksa ṭhen pakhatkhat na sun cu na hrangah a ṭha sawn.

³⁰Na vorhlam kut in a lo sualter le sattan awla hlon aw. Na ruangpi hell sungih hlon tuar hnak cun na kutke pakhatkhat tan a si cu na hrangah a ṭha sawn.

³¹“Zokhal in a nupi a maak asile maaknak ca ken seh, timi nan thei.

³²Asinain kei cun: mi pakhat in a nupi kha, mipa dang thawn sualnak ruangah siar lo, a maak asile, a nupi cu pasal a neih tikah ṭaangṭawm sualnak tuahtu a siter. Curuangah cupa cu mi sual a si. Cutiih a maak minu a ṭhitu pa khal ṭaangṭawm sualnak tuahtu a si ve.

³³“Khuahlan laiah cun ‘Nan thukam pelhter hlah uh, Bawipa hnenih thu nan kammi cu tuah suak uh,’ an ti ṭheumi nan thei.

³⁴Asinain kei cun hiti in ka lo sim: thukamnak nan tuah tikah ziangtik hmanah siatcam in tuah hlah uh. Vancung hmin saal in thu kam hlah uh, ziangahtile Pathian tonak a si.

³⁵Leilung hmin saal khal in thu kam hlah uh, ziangahtile Pathian ke retnak a si. Jerusalem hmin saal khal in kam hlah uh, ziangahtile Siangpahrang maksak umnak khawpi a si.

³⁶Nan lu saal khal in thu kam hlah uh, ziangahtile nan lu parih sam phangkhat hman kha nan dumter thei lo ih nan rangter thei fawn lo.

³⁷‘A si,’ ‘asilo,’ ti lawng hi sim uh; cuih hlei cu mi ṭha lo Khawsia hnen ihsin a suakmi an si.

³⁸“Mit ai ah mit, ha ai ah ha, tiih an simmi cu nan thei.

³⁹Sikhalsehla kei cun hiti in ka lo sim. A lo tisiattu parah phulei va sam hlah uh; mi pakhatkhat in na vorhlam biang ah a lo beeng asile na kehlam biang khal tun lawlaw aw.

⁴⁰Cule mi pakhatkhat in na angki duh ah thuṭhennak zung tiang a lo thlenpi asile na kawt angki khal pe lawlaw aw.

⁴¹Cun a lo uktu ralkap pakhatkhat in a thilri peng khat phur dingin a lo fial a si ahcun peng hnih tiang va phurhsak aw.

⁴²Mi pakhatkhat in thil pakhatkhat a lo dil a si ahcun va pe aw; na thil cawi a duhtu hnenah va coih aw.

⁴³“Nan rualpi nan duhdawt pei ih nan ral pawl nan hua pei,” timi cu nan thei zo.

⁴⁴Asinain kei cun hiti in ka lo sim: nan ral pawl duhdaw uhla a lo hremtu pawl hrangah thla cam uh;

⁴⁵cuticun vancungih a ummi nan Pa ih fa nan si ding. Ziangahtile Pathian in mi ṭha le mi ṭha lo tlunah bangrep in ni a tlangter ih thil ṭha a tuahtu le thil sia a tuahtu tlunah bangraan in ruah a surter.

⁴⁶A lo duhtu lawng nan duh a si ahcun ziangah so Pathian in laksawng a lo pek ding? Siahkhongtu hman in cu bangtuk cun an tuah ve a si!

⁴⁷Nan rualpi ṭha pawl lawng nan biak ṭhat a si ahcun mi dang nan hleihnak ziangso a um cuang? Pathian bia lomi hman in cuvek cu an tuah a sisi!

⁴⁸Vancung ih a um nan Pa a famkim vekin nannih khal nan famkim ve pei.