Read Falam Chin MATTHAI 6 Bible Online

MATTHAI 6 - Falam Chin bible

MATTHAI 6

¹“Biaknak lamih thil ṭha nan tuahmi hi mi in in hmu hai seh tiin mizapi hmaiih tuah lo dingin ralring uh. Cutiih mipi hmaiih nan tuah ahcun vancungih a ummi nan Pa hnen ihsin ṭhatman ziang hman nan ngah lo ding.

²“Curuangah mi tlasam hnenah thil pakhatkhat nan ṭhen tikah mititeraw pawl in sinakok le zalamzin ih an tuah vekin tawtawrawt tum in uang aw hlah uh. Annih cun mipi pawl ih lom dingah an tuah. Fiangtein ka lo sim: an ngah dingmi cu an ngah ṭheh zo.

³Sikhalsehla nannih cun mi tlasam nan bawm tikah nan vorhlam kut ih tuahmi kha nan kehlam kut khal in theih lo dingin va tuah uh.

⁴Cuticun a thupte ih nan tuahmi a hmutu nan Pa in ṭhatman a lo pek ding.

⁵“Thla nan cam tikah mititeraw pawl vekin cam hlah uh. Annih cun mi hmuahhmuah in in hmu hai seh tiin sinakok le zalampi ah ding tahratin thlacam an duh ngaingai. Fiangtein ka lo sim: an ngah dingmi an ṭhatman cu an ngah ṭheh zo.

⁶Sikhalsehla nannih cu thla nan cam tikah nan innkhaan sungah lut uhla sangka nan khar hnuah mithmuh lomi nan Pa hnenah thla cam uh. Cule a thupte ih nan tuahmi a hmutu nan Pa in nan ṭhatman a lo pe ding.

⁷“Thla nan cam tikah Pathian thei lomi pawl ih sullam nei tuk lomi ṭong tampi an ṭong vekin va tuah hlah uh. Annih cun reipi thla an cam tikah Pathian in a thei cuang ding tiah an ruat.

⁸Anmah vek va si hlah uh. Nan ṭulmi cu nan dil hlan ihsin nan Pa in a thei cia zo.

⁹Curuangah hi bangtuk in thla nan cam pei: ‘Vancung ih a ummi kan Pa, na hmin thianghlim cu upat si ko seh;

¹⁰Na Uknak thleng hram seh; Vancung i na duhnak tuah a si bangin leitlun khalah tuah si ve seh.

¹¹Nitin kan ṭulmi rawl in pe aw.

¹²Mi in kan parah sualnak an tuah ih kan ngaidam bangtuk in, Kanmah ih sualnak khal in ngaidam ve aw.

¹³A harmi hniksaknak tuarter loin, siatnak ihsin in hum hram aw.’[5]

¹⁴“Nan parah sualnak a tuahtu pawl nan ngaidam a si ahcun vancungih a ummi nan Pa in a lo ngaidam ve ding.

¹⁵Sikhalsehla midang sualnak nan ngaidam lo a si ahcun nan sualnak cu nan Pa in a lo ngaidam ve lo ding.

¹⁶“Rawl nan ulh tikah mititeraw pawl vekin riahsia mithmai in um hlah uh. Mihrek in rawl an ulh kha mi hmuahhmuah in in thei hai seh tiah an mithmai in an langter. Fiangtein ka lo sim: an ngah dingmi an ṭhatman an ngah ṭheh zo a si.

¹⁷Nannih cu rawl nan ulh tikah nan hmai phiah in nan sam tla ṭhatein hriat uh.

¹⁸Cuticun zohman in rawl nan ulh kha an lo thei lo ding ih mithmuh lo nan Pa lawng in a lo thei ding. A thupte ih nan tuahmi a hmutu nan Pa in ṭhatman a lo pek ding.

¹⁹“Tlap le nget ih a siatsuah theinak le rukru pawl in an bauh ih an ruk theinak hi leitlun ah nan sumsaw khawl hlah uh.

²⁰Tlap le nget ih a siatsuah thei lonak le rukru pawl in an bauh ih an ruk thei lonak vancung ah nan sumsaw cu khawl sawn uh.

²¹Ziangahtile nan sumsaw umnak ah nan thinlung khal a um ve ding.

²²“Mit cu taksa ruangpi hrangah mei-inn a si. Nan mit a fim le nan taksa ruangpi cu a tleu ṭheh ding.

²³Sikhalsehla nan mit a ṭhat lo ahcun nan ruangpi cu thimnak sungah a um ding. Cuti a si ruangah nan sungih tleunak cu thimnak a si ahcun ziangtluk ṭihnungza so thimnak cu a si ding!

²⁴“Zokhal in bawi pahnih a rian thei lo. Pakhat a duh ding ih pakhat a hua ding. Pakhat hnenah rintlak zetin a um ding ih pakhat cu a hmuhsuam ding. Pathian le tangka nan rian tlang thei lo ding.

²⁵“Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khal in taksa ruangpi hi a thupi sawn lo maw?

²⁶Van ih a zuangmi vate khi zohhnik uh; annih in thlaici an tuh lo, rawl khal an khawm lo ih cuam sung khalah an khawl lo. Asinain vancungih a ummi nan Pa in a cawm thluh a si. Vate hnakin tampi nan sunglawi sawn a si lo maw?

²⁷Nan donhar ruangah nan nunnak caan tawite tal nan sauter thei maw?

²⁸“Cun ziangah so hnipuan thu ah nan don a har? Hramlakih pangpar khi zohhnik uh; hna an ṭuan lo, pathnuk in thiam an tak fawn lo.

²⁹Asinain atu-ah ka lo sim: siangpahrang Solomon hman, kha tlukin a lian naón, a lennak le a hnipuan in hi pangpar ih mawinak a tluk lo a si.

³⁰Tuihsun ah a nung ih thaisun ah meisa sungih paih ding hrampi hman a ceimawitu Pathian cun cuih pawl hnakin nannih cu a lo thuam sawn lo ding maw? Nan zumnak a va mal lawmmam so!

³¹“Curuangah ‘Ei in ding le sinfen ding tla khui-in so ka ngah ding,’ tiin donhar in um hlah uh.

³²Hi pawl cu Pathian thei lo khawvel pawl ih an helhkam ringring mi an si. Vancung ih a ummi nan Pa in hi thil pawl nan ṭulzia cu a thei a si.

³³Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si.

³⁴Curuangah thaisun hrangah donhar in um hlah uh; thaisun in donharnak amah tawkin a nei ve ding. Ni ni khat ih a phurhmi harsatnak tlunah a dang beetcih ding a si lo.