Read Falam Chin MARKA 1 Bible Online

MARKA 1 - Falam Chin bible

MARKA 1

¹Pathian Fapa Jesuh Khrih ih Thuthang ṭha cu hiti in a si.

²A thokah profet Isaiah in: “Pathian in ‘Na hmaiah ka palai ka thlah ding; Na hrangih lamzin sialtu dingah,’

³Mi pakhat cu ramṭhingah a au ih, ‘Bawipa ih hrangah lamzin sial uh, A fehnak ding lamzin kha dingter uh,’ a ti,” tiah a ngan.

⁴Curuangah Johan cu ramṭhing ihsin a ra ih baptisma a pek hai ih thu tla a sim phah vivo. Mipi pawl kha, “Nan sualnak sir uhla baptisma lak uh. Cuticun Pathian in nan sualnak a lo ngaithiam ding,” tiah a ti.

⁵Judea peng le Jerusalem khawpi ihsin mi tampi Johan ih thusimmi ngai dingah an ra. An sualnak an phuang ih Jordan tiva ah baptisma a pek hai.

⁶Johan cu kalauk hmulih tahmi hnipuan a hruk ih a taai ah savun taikhap a khap. A rawl eimi cu kharbok le hramlak khuaitizu an si.

⁷Mipi hnenah, “Ka dungih a ra dingmi pa cu keimah hnakin a nasa sawn a si. Kun tahrat in a kedam hri phoih saktu ding hmanah kei cu ka tlak lo.

⁸Kei cun tidai in baptisma ka lo pek. Asinain anih cun Thlarau Thianghlim in baptisma a lo pek hai ding,” tiah a ti.

⁹Cuih hnu rei loteah Galilee peng Nazareth khua ihsin Jesuh cu a ra ih Jordan tiva ah Johan in baptisma a rak pek.

¹⁰Jesuh cu ti sung ihsin a hung suah vete in van a ong aw ih Thlarau cu thuro bangin a parih a rung fut kha a hmu.

¹¹Van ihsin aw pakhat a rung thang ih, “Nangmah cu ka duhdawtmi ka Fapa na si. Na parah ka lung a kim ngaingai,” tiah a run ti.

¹²Hmakhatteah Jesuh cu ramṭhing ah Thlarau in a fehter ih

¹³cutawkah ni sawmli a um ih Satan in a hniksak. Ramsa pawl thawn an um. Asinain vancungmi pawl in an rung tuamhlawm.

¹⁴Johan kha thawngih an thlak hnuah Jesuh cu Galilee ah a feh ih Pathian ih Thuthang ṭha a sim.

¹⁵“Tikcu a kim zo ih Pathian Uknak a nai zo. Nan sualnak pawl sir uhla Thuthang ṭha cu zum uh,” tiah a ti.

¹⁶Jesuh cu Galilee Tili kapih a feh laiah ngakaitu pahnih Simon le a nau Andru kha sur in nga an kaih rero laifang a hmu.

¹⁷Jesuh in an hnenah, “I thlun uhla milai kaitu ah ka lo tuah ding,” a ti.

¹⁸Hmakhatteah an sur an taan ih amah cu an thlun.

¹⁹Hla deuh a va feh ih Zebedi ih fapa Jeim le Johan te unau hnih a hmu. Anmah cu an lawng sungah an um ih an sur an tholh rero.

²⁰Jesuh in a hmuh vete in an pahnih in a ko. Cuticun an pa Zebedi le an hlawhfa pawl cu lawng sungah cun an taan ih Jesuh cu an thlun.

²¹Jesuh le a dungthluntu pawl cu Kapernaum khua ah an ra ih a thaisun Sabbath ni ah Jesuh cu pumkhawmnak inn Sinakok ah a feh ih thu a zirh.

²²A thuzirh daan a theitu pawl cu an mang a bang ngaingai, ziangahtile Daanthiam pawl vek a si lo, anih cun thunei zetin a zirh a si.

²³Cuih caanah khawsia in a polhmi mipa pakhat cu Sinakok ahcun a ra ih,

²⁴“Nazareth mi Jesuh, ziangso kannih in hai? Kanmah siatsuah dingah maw na rat? Zo na si ti ka lo thei: Pathian ih thlahmi Mi Thianghlim na si,” tiah a au ciamco.

²⁵Jesuh in khawsia cu, “Daite in um aw! Kha pa sung in suak aw!” tiah thu a pek.

²⁶Khawsia in cupa cu nasa zetin a thin ih ring zetin a auter hnuah a suak.

²⁷Mipi cu an mang a bang ngaingai ih pakhat le pakhat, “Ziangvek thu so a si? Zirhnak thar phun khat maw a si? Hi pa hi khawsia parah thu a nei ih ‘Suak uh!’ a tile an suak fawn,” tiah an ti aw.

²⁸Cuticun Jesuh thuhla cu Galilee peng khuazakip ah zamrang zetin a thang.

²⁹Jesuh le a dungthlun pawl cu Jeim le Johan tel in, sinakok ihsin an feh ih Simon le Andru inn lam pan in an feh.

³⁰Simon ih pizon kha khurhnat in a na ih a tho thei lo; Jesuh a thlen vete in a nat thuhla cu an sim.

³¹Mina hnenah cun a feh ih a kut a kai ih a thawhter. A khurhnat cu a reh lohli ih anmah a tuamhlawm thei.

³²Ni a tlak ih zanlam a si tikah mipi in mina hmuahhmuah le khawsia ih polhmi pawl kha Jesuh hnenah an rat pi.

³³Cuih khua ih mi hmuahhmuah cu cuih inn hmai ahcun an ra tong khawm aw ṭheh.

³⁴Jesuh in an natnak phunphun kha a damter ih an sungih khawsia pawl tla a dawisuak ṭheh. Khawsia pawl cu kam khatte hman a ṭongter lo; ziangahtile zo a si ti kha an thei.

³⁵A thaizing, zingthlapit ni suah hlanah, Jesuh cu a tho ih inn ihsin a suak. Hnarpawn ah a suak ih mi um lonak ah thla a cam.

³⁶Asinain Simon le a rualpi pawl cu amah hawl ah an feh ih,

³⁷an va hmuh tikah a hnenah, “Mi hmuahhmuah in an lo hawl,” tiah an sim.

³⁸Asinain Jesuh in, “Hi kiangkap khua pawl khalah kan feh vivo ding, an hnenah thu ka sim ve ding, ziangahtile cucu ka rat hnawhsanmi a si,” tiah a ti.

³⁹Curuangah Galilee peng pumpuluk tlawng in sinakok ah thu a sim vivo ih khawsia pawl a dawi suak vivo a si.

⁴⁰Phaarnat in a na mipa pakhat cu Jesuh hnenah a ra ih a khuk bilh in, “Na duh a si ahcun i thiangter thei ko,”[1] tiah bomnak a dil.

⁴¹Jesuh cun a zaangfah ngaingai ih a kut in a hei dawh hnuah a tham ih, “Ka lo thiangter duh zet a si, thiang thlang aw,” tiah a ti.

⁴²Hmakhatteah a phaarnat cu a dam ih a thiang.

⁴³Cule Jesuh in cupa cu a fehter ih, fektein thu a tiam,

⁴⁴“Ngai aw! Hi thu hi zohman na sim lo pei. Puithiam hnenah va feh vurvo awla rak lo zohseh; cule mi hmuahhmuah in a dam a si ti an lo theihnak dingah Moses thupekmi vekih thawinak va pe aw,” tiah fektein thu a tiam.

⁴⁵Asinain cupa cu a feh ih a damnak thu cu hmunkip ah a than vivo. Cuih thu a rel tamtuk ruangah Jesuh cu khawsungah mi hmuhhngan in a feh thei nawn lo. Hnarpawn fianhrial sawnah amah lawng a um ih cutawkah hmunkip ihsin mi in an ra pan.