Read Falam Chin MARKA 14 Bible Online

MARKA 14 - Falam Chin bible

MARKA 14

¹Lantak puai le Thilnu telh lo sang puai a kimnak dingah ni hnih lawng a duh. Puithiam upa pawl le Daanthiam pawl in Jesuh kha a thupte in kai ih thah theinak lamzin an hawl.

²Asinain, “Puai tikcu lai ahcun kan tuah lo pei, misenpi pawl in hnaihnawhnak an suahter pang ding,” tiah an ti.

³Jesuh cu Bethani khua, phaarnat a rak tuartu Simon inn ah a um ih rawl a ei laiah nunau nu in alabaster[12] thawl pakhat in a mankhung zetmi rimhmui a khatin a rak keng. Cuih thawl cu a khuai ih rimhmui cu Jesuh lu ah a toih.

⁴Cutawkih a ummi mi ṭhenkhat pawl cu an thin a heng ih, “A va pamhmai ve!

⁵Rimhmui cu ngun tangka zathum[13] hnakih tam ah zuar in cuih tangka cun mifarah bawm sehla a ṭha sawn lo maw?” tiah pakhat le pakhat an ti aw ih cu nu cu an mawhthluk ciamco.

⁶Cutikah Jesuh in, “Zianghman ti hlah uh! Ziangah so nan buaipi rero? Hi nu hin thil ṭha le thil mawi a tuah a si.

⁷Mifarah cu kumkhua nan hnenah an um ding ih nan duh ahcun ziangtik khalah nan bawm thei. Asinain kei cu nan hnenah ka um ringring lo ding.

⁸A tuah thei tawk a tuah zo. Ka taksa pum parah rimhmui a toihmi hi keimah vuinak dingah a hlankhan in a timtuah ciami a si.

⁹Fiangtein ka lo sim: leilung pumpuluk Thuthang ṭha an simnak kipah hi a tuahmi hi amah theihnak ah an sim ringring ding,” tiah a ti.

¹⁰Cule dungthluntu hleihnih lakih pakhat Judas Iskariot cu Jesuh zuar dingah puithiam upa pawl hnenah a feh.

¹¹An hnenih a ṭongmi pawl an theih tikah an lung a awi ngaingai ih tangka pe dingin thu an rak kam. Cule Judas cun Jesuh a zuar ngah ih an kut sung a thlenter theinak dingah caan ṭha a bawh.

¹²Thilnu rawi lo Sang Puai ni khatnak ni, Lantak Puai rawldonak hrangih tuu faate pawl an thah ni ah dungthluntu pawl in, “Khuiah so Lantak Puai zanriah kan lo timtuah sak ding na duh?” tiah Jesuh kha an sut.

¹³Cule Jesuh in mi pahnih a thlah ih hiti in thu a cah, “Khawsung ah va feh uhla tithawl in tidai a phurtu pa thawn nan tong aw ding. Amah cu thlun uhla,

¹⁴a luhnak innih inn neitupa hnenah ‘Sayapa in amah le a dungthluntu pawl Lantak Puai zanriah an hil tlaangnak ding inn khaan khuiso a si? tiah va sut uh, in ti,’ va ti uh.

¹⁵Cule anih in tlunta khaan tumpi a lo hmuh ding. Ziang hmuahhmuah ṭhate le kimteih timtuah ciami khaan a si ding ih cunah cun zanriah ei tlaangnak ding cu va tuah uh,” tiah a ti.

¹⁶Dungthluntu pawl cu an pok ih khawsung an thlen tikah Jesuh ih sim ciami bangtuk in ziang hmuahhmuah an hmu. Cunah Lantak Puai zanriah cu an tuah.

¹⁷Zanlam a si tikah Jesuh cu a dungthluntu hleihnih thawn an ra thleng.

¹⁸Cabuai ih rawl an ei laiah Jesuh cun, “Fiangtein ka lo sim: Nanmah lakah pakhat, keimah thawn rawl a ei tlangtu pa in i zuar ding,” tiah a ti.

¹⁹Dungthluntu pawl cu an thin a nuam lo ngaingai ih pakhat hnu pakhat in, “Na tisanmi hi kei ka si lo, ti aw?” tiah an ti fingfing.

²⁰Jesuh in, “Nanmah hleihnih lakah a telmi, keimah thawn kheng khat sungih sang a hnimtu pa a si ding.

²¹Milai Fapa cu thihnak a tuar ding, tiah Ca Thianghlim ih a ti vekin a thi ko ding. Asinain hi Milai Fapa a zuartu hrangah cun a hmakhua a pit a si! Suak lo lawlaw in rak um sehla amah ih hrangah cun a ṭha sawn ding naón!” tiah a ti.

²²Zanriah an ei laiah Jesuh in sang a lak ih thla a cam hnuah sang cu a phel ih a dungthluntu pawl hnenah a pek. “Hi hi ka taksa a si; Lak uhla ei uh,” tiah a ti.

²³Cuih hnuah hai a lak ih Pathian hnenah lungawinak thla a cam hnuah an hnenah a pek ih an zatein an in.

²⁴Jesuh in, “Himi hi mi tampi hrangih ka thletmi ka thisen a si; Pathian thukamnak a nemhngettu ka thisen a si.

²⁵Fiangtein ka lo sim: Pathian Uknak sungih sabit thar ka in hlanlo hi sabit cu ka in sal nawn lo ding,” tiah a ti.

²⁶Cule hla an sak hnuah an suak ih Olif Tlangah an feh.

²⁷Jesuh in an hnenah, “Nan zatein in taan ding ih nan tlanhlo ṭheh ding; ziangahtile Ca Thianghlim sungah ‘Pathian in tuukhal cu a that ding ih tuu pawl cu ṭhekdarh an si ṭheh ding,’ tiah ngan cia in a um.

²⁸Sikhalsehla thihnak ihsin thawhtersal ka si hnuah cun nan hmaiah Galilee ah ka feh ding,” tiah a ti.

²⁹Piter in, “Midang in lo tlansan ṭheh hman hai sehla kei cun ka lo tlansan hrimhrim lo ding,” tiah a ti.

³⁰Jesuh in Piter cu, “Fiangtein ka lo sim: tuihzan ar voi hnih a khuan hlanah voi thum tiang ‘Ka thei lo a si,’ tiah i phatsan ding,” a ti.

³¹Piter cun nasa sinsin in, “Na hnenih thi ding ka si ve hmanah cu vek cun ka ṭong hrimhrim lo ding,” tiah a ti. Dungthluntu dang khal in cuvek ṭhiamṭhiam in an ti ve.

³²Gethsemane timi hmun an thleng ih Jesuh in a dungthluntu pawl hnenah, “Ka thlacam sung hinah rak um uh,” tiah a ti.

³³Piter, Jeim le Johan kha a hruai. Thinhar le awloksong in a um ih,

³⁴an hnenah cun, “Ka thinlung hi riahsiatnak in a khat tuk ih a kuai ṭheh ding a bang. Hinah rak um uhla it loin i rak hngak uh,” tiah a ti.

³⁵Hmaiah malte a va feh ih leilung ah a bok ih thla a cam. A can thei ahcun cuih harsatnak cu tong lo dingin a dil.

³⁶“Abba,[14] Ka pa! Na hrangah cun ziang hmuahhmuah a cang thei ṭheh. Hi tuarnak khuathai hi ka hnen ihsin la hram aw. Asinain ka duh vekin si hlah seh, na duh vekin si sawnseh,” tiah a ti.

³⁷Cun a ra kir ih dungthluntu pathum an ihthat kha a hmu. Piter hnenah, “Simon, na rak itthat maw si? Nazi pakhat sung hman itthat loin i hngak thei hrimhrim lo maw si?” tiah a ti.

³⁸Cule an hnenah, “Itthat loin hngak uhla sualforhnak sungih tla lo dingin thlacam uh. Thinlung cun a duh naón taksa cu a thazaang a mal a si,” tiah a ti.

³⁹Jesuh cu a feh sal ih a hmaisa vekin thla a cam lala.

⁴⁰Cun a ra kir ih dungthluntu pawl an itthat ṭheh kha a hmu; an mit an meng thei hrimhrim lo. Ziangtiih rak son ding ti khal an thei lo.

⁴¹A voithumnak a ra kir sal tikah an hnenah cun, “Nan itthat hrih maw si? Nan cawl thei hrih lai maw si? Tawk seh! A tikcu a thleng zo! Zoh uh! Milai Fapa cu misual pawl kut sungah pek a si ding hi!

⁴²Tho uhla feh uhsi! Zoh uh, i zuartu pa a ra thleng!” tiah a ti.

⁴³Jesuh cu a ṭong rero laiah dungthluntu hleihnih lakih a tel vemi Judas cu a ra thleng. Judas thawn hmun khatah, puithiam upa pawl, Daanthiam pawl le Judah mi upa pawl ih thlahmi miburpi cu ralnam le talhtum pawl kengin an ra.

⁴⁴Mizuartu pa cun mipi pawl cu hminsinnak a rak pek cia zo ih, “Ka hnam mipa cu kaih nan duhmi pa a si ding. Amah cu kai uhla ṭhatein kil uhla fehpi uh,” tiah a ti.

⁴⁵Judas cun a ra thlen vete in Jesuh cu a pan ih, “Sayapa!” tiah a ti ih a hnam.

⁴⁶Cutiin Jesuh cu an kai ih fektein an khit.

⁴⁷Culai ah an kiangih a dingmi pakhat in a ralnam a zuk ih Puithiam sang hnen-um pa ih hna a sah thlak.

⁴⁸Cule Jesuh cun, “Keimah hi rukru maw ka si, ralnam le talhtum thawn nan rat ciamco?

⁴⁹Nitinte Biakinn ah thu ka lo zirh ṭheu laiah zohman in in kai fawn lo. Asi, Ca Thianghlim sung thu cu a kim a ṭul a si,” tiah a ti hai.

⁵⁰Cule a dungthluntu hmuahhmuah in an tlansan ṭheh.

⁵¹Mino pakhat, puan paate lawng a sinmi pa in Jesuh cu a thlun. Amah khal cu a kaih an tum ve;

⁵²asinain a puan taan in a tak lawngin a tlanhlo.

⁵³Jesuh cu Puithiam sang inn ah an hruai ih cutawkah puithiam upa pawl, upa dang pawl le Daanthiam pawl an tong aw khawm.

⁵⁴A hlat nawn ihsin Piter in a thlun ih Puithiam Saang ih tual ah a lut. Tual ah ralvengtu pawl hnenah a to ih meisa a ai.

⁵⁵Puithiam upa pawl le thuṭhentu Khonsil upa pawl in Jesuh cu thah duh ah a sual an hawl rero naón an hmu thei lo.

⁵⁶Mi tampi in thuphan per in Jesuh cu sual an puh, asinain an thu a rual aw thei lo.

⁵⁷Cun mi ṭhenkhat, a dik lo thutheitu si in an ding ih,

⁵⁸“Hi pa hin ‘Milai sakmi hi Biakinn hi ka bal ṭheh ding ih ni thum sungah milai ih tuah lomi Biakinn ka sak ding,’ a ti, kan thei,” tiah Jesuh cu thuphan an puh.

⁵⁹Sikhalsehla annih khal cu an thu a rual aw thei cuang lo.

⁶⁰An zate hmaiah Puithiam Saang cu a ding ih Jesuh cu thu a sut. “Sual an lo puh hi na let thei lo maw?” tiah a ti.

⁶¹Sikhalsehla Jesuh cu daitein a um ih ṭong kam khat hman a let lo. Cule Puithiam Saang cun, “Sunloih mi Pathian ih Fapa Messiah cu na si maw?” tiah a sut sal.

⁶²Jesuh in, “Ka si! Milai Fapa hi Ziangkimtithei ih vorhlam kapah to in vancung mero thawn a rat khal nan hmu leh ding,” tiah a ti.

⁶³Cutikah Puithiam Saang cun a puan a thlek ih, “Thutheitu dang kan ṭul nawn lo.

⁶⁴Pathian a nautat zia cu nan thei thluh zo! Ziangtin nan ruat?” tiah a ti. An zatein Jesuh cu misual a si ih thah tlak a si, tiah an lung a kim ṭheh.

⁶⁵Mi hrek in Jesuh cu cil an phui; a mit an huh ih an thawi. “A lo thawitu hi zoso a si, simhnik!” tiah an ti. Cule ralkap pawl in an fehpi ih an beng phahphah.

⁶⁶Piter cu Puithiam Saang ih tualih a um laiah Puithiam Saang ih hnen-um nu pakhat a ra.

⁶⁷Piter cu meisa a ai kha a hmuh tikah hmaitontein a zoh ih, “Nangmah khal hi Nazareth mi Jesuh thawn a rak um tlangmi na si,” tiah a ti.

⁶⁸Asinain Piter cun a phatsan ih, “Ka thei lo. Na ṭongmi hi ziangthu a si ti ka thei lo,” tiah a ti. Cule kotka zin lamah a ṭhawn. Cuvete in ar a khuang.

⁶⁹Hnen-um nu cun a va hmu lala ih a kiangkap mi pawl hnenah, “Hi pa khal hi an lakah a tel sokhaw!” tiah a sim lala.

⁷⁰Asinain Piter cun a phat thotho. Reilote ah a kiangkap ih a dingmi pawl in Piter cu, “Nangmah khal an lakih tel na si hrimhrim ko, ziangahtile Galilee mi na sisi!” tiah an ti.

⁷¹Cun Piter in, siatcam in thu a kam ih, “Nan timi pa hi zo a si ti ka thei hrimhrim lo,” tiah thlalet cam in a ti.

⁷²Cuvete in a voihnihnak ar a khuang ih Piter cun Jesuh in, “Ar voi hnih a khuan hlanah voi thum tiang ‘Ka thei lo a si,’ tiah i phatsan ding,” a rak timi kha a vun mang sal ih napi in a ṭap.