Read Falam Chin MARKA 16 Bible Online

MARKA 16 - Falam Chin bible

MARKA 16

¹Sabbath ni a cem hnuah Mari Magdalene, Jeim nu Mari le Salome in Jesuh ruak va culh dingah zihmui an lei.

²Nipi zing, nisuak zawng ah thlaan ah an va feh.

³Lamzin an feh phah ah, “Thlankhar lungphengpi teh zo in so in ṭhawn sak ding?” tiah pakhat le pakhat an sut aw.

⁴Cuih lung cu lungpheng hlaipi a si. Cule an hun zoh tikah lungphengpi cu a rak ṭhawn aw zo kha an hmu.

⁵Thlan sungah an vung lut ih tlangval pakhat puan rang sin in vorhlam kapih a to kha an hmu ih an phang ngaingai.

⁶Anih in, “Nan thin phang hlah uh! Thinglamtah ih an thahmi Nazareth Jesuh nan hawl ti ka thei. Hinah a um nawn lo, a thosal zo. An retnak hmun hi ra zoh hman uh.

⁷Va feh uhla a dungthluntu pawl le Piter kha ‘Nan hmaiah Galilee ah a feh ding. Cutawkah a lo sim cia vekin nan hmu ding,’ tiah va sim uh,” tiah a ti.

⁸Cutiin an suak ih thlaan ihsi cun thinphang le tuksum in an tlan. An ṭih tuk ruangah zo hnen hmanah ziang hman an sim lo.[17]

⁹Nipi ni ah thihnak ihsin Jesuh a thawh hnuah a hmaisa bik ah Mari Magdalene hnenah a lang; Mari Magdalene cu a sung ihsin khuavang pasarih a dawisuahmi nunau kha a si.

¹⁰Mari Magdalene cu a feh ih a rualpi pawl a va sim. Cupawl cu Jesuh a thih ruangah mithi ngai in an ṭap rero.

¹¹“Jesuh a nungsal zo, ka hmu a si!” tiah a sim tikah an zum lo.

¹²Cuih hnuah Jesuh cu dungthluntu pahnih khawte lamih an feh laiah phun dangin an hnenah a lang.

¹³An kir ih midang pawl tla an sim, asinain annih khal in an zum lo.

¹⁴Neta bikah Jesuh cu dungthluntu hleikhat rawl an ei laiah an hnenah a lang. Zumnak an neih lo ruangah le amah a nungin a hmutu pawl an zum lo ih thinlung ruh an neih ruangah a kawk hai.

¹⁵Cule an hnenah, “Leilung khuazakip ah va feh uhla mi hmuahhmuah hnenah Thuthang ṭha va sim uh.

¹⁶Zokhal sisehla a zum ih baptisma a co ahcun rundam a si ding. Asinain a zum lotu cu hnon a si ding.

¹⁷A zumtu pawl cu mangbangza tuah theinak huham pek an si ding; ka hmin in ramhuai an dawi thei ding; ṭong thar in an ṭong ding;

¹⁸rul an kaih ah siseh, thihsii an in hmanah siseh, an zianghman a poi lo ding; mina parah an kut an suang ding ih mina cu an dam ding,” tiah a ti. [

¹⁹Bawipa Jesuh cu an hnenih thu a sim ṭheh hnuah vancungah laakso in a um ih Pathian vorhlam kapah a to.

²⁰Cule dungthluntu pawl cu an feh ih khuazakip ah thu an sim; Bawipa cu an hnenah hna a ṭuan ih mangbangza an tuahmi in an thusim mi a dik a si, ti kha a langter.] [MARKA THUTHANGṬHA NETNAK TAWI Nunau pawl cu Piter le a rualpi pawl hnenah an feh ih an theihmi thuhla cu a tawinak in an sim. Cuih hnuah Jesuh amah rori in kumkhua rundamnak thu, thu nung le thu thianghlim cu nisuahnak ihsin nitlaknak tiang a dungthluntu pawl hmangin a than a si.]