Read Falam Chin MARKA 5 Bible Online

MARKA 5 - Falam Chin bible

MARKA 5

¹Jesuh le a dungthluntu pawl cu Galilee Tili khatlam ral Gerasene peng ah an va thleng.

²Jesuh cu lawng sung ihsin a suah vete in cutawkah thlaan lungkua sungih a ummi pa a ra suak ih Jesuh a ra tong. Cupa cu khawsia ih polhmi a si ih,

³thlaan lakih a ummi a si. Zohman ih hreen thei lomi pa a si.

⁴Voi tampi thir cikcin rori in a kutke an ṭem ṭheu naón an ṭem tinte in thirhri cu a ticat ih a ke ṭemnak thirhri tla cu a botcat ṭheh, zohman a kaihrem theitu an um lo.

⁵A sun a zan ih thlaan lak le tlang lakah a vak ih a au phahphah ih amah le amah lungto in a sun, a at aw phah ṭheu.

⁶Hla nawn ihsin Jesuh cu a hei hmu; a va tlan ih a hmai ah a khuk a bilh ih,

⁷a aw neih patawp in, “Maw Jesuh, Cungnungbik Pathian ih Fapa! Nang le kei ziangso kan seng aw? Pathian hmin in ka lo dil, i hrem hramhram hlah aw!” tiah a au ciamco.

⁸Hi bangtuk ih a aunak cu Jesuh in, “Thlarau siava, hi pa sung ihsin suak aw,” a rak ti ruangah a si.

⁹Cule Jesuh in, “Na hmin zoso a si?” tiah a sut. Cupa cun, “Ka hmin cu ‘Burpi,’[4] a si, ziangahtile kan tam ngaingai a si,” tiah a let.

¹⁰Cupa cun thlarau siava pawl cu cuih ram ihsih dawihlo lo dingah Jesuh cu a dil ciamco.

¹¹Cutawk kiangkap tlangmual ah vok rual tampi an tlang.

¹²Thlarau siava pawl cun Jesuh cu, “Vok hnenah in thlah awla an sungah in lutter hram aw,” tiah an dil.

¹³A dil vek ih a fehter hai ih thlarau siava pawl cu cupa sung ihsin an suak ih vok sungah cun an lut. Cule vok rual cu thawnghnih hrawng an si ih khaamhraap ihsin an vung dawp ciammam ih tili sungah an tla that ṭheh.

¹⁴Vok khaaltu pawl cu an tlan ih cuih thuhla cu khawsung ah le lo lakah an sim ciamco. Mipi pawl cu thil cangmi zoh dingah an va feh.

¹⁵Jesuh hnenih an thlen tikah khawsia ‘Burpi,’ ih a rak polh mipa khal an va hmu. Cutawkah cun a to ih hnipuan hruk in le lungfim in an va hmu. Curuangah an thin a phang ngaingai.

¹⁶Cuih thil a hmutu pawl in khawsia polhmi pa le vok rual parah ziang vek thil a cang ti kha mipi pawl an sim.

¹⁷Cule an ram tlansan dingah Jesuh cu an dil ciamco.

¹⁸Jesuh cu lawng sungih a luh zawng ah khawsia ih rak polh dahmi pa cun, “Na hnenah ka feh ve pei,” tiah a dil.

¹⁹Asinain Jesuh in a duh lo. “Na inn ah va tlung sawn awla na sungte pawl hnenah Bawipa ih a lo tuah sakmi le a lo zaangfahnak thuhla pawl cu va sim aw,” tiah a ti.

²⁰Cuticun cupa cu Dekhapolis ram sung hmuahhmuah ah a feh ih Jesuh ih a tuah sakmi thuhla cu a sim. Cuih thu a theitu hmuahhmuah cu an mang a bang ṭheh.

²¹Jesuh cu Tili khatlam ral ah a va feh sal. Cutawk Tilikap ahcun mi tampi Jesuh kiangkap ah an khawm aw.

²²Sinakok uktu pakhat a si mi Jairas cu a ra ih Jesuh a hmuh tikah a ke hramah a bok ih zaangfahnak a dil.

²³“Ka fanute besia zetin a na. Ra hram awla a parah na kut ra suang aw, cule a dam ding ih a nung ding a si,” tiah a dil.

²⁴Cule Jesuh cu Jairas hnenah feh dingin a pok. Mitampi in Jesuh an thlun ruangah a kilkip in an run eng cupco.

²⁵Mitampi lakah cun thidok nat in kum hleihnih a na zomi nunau pakhat a um.

²⁶Sibawi tampi in an tuah zo naón a dam cuang lo. A neihmi tangka hmuahhmuah a hmang zo naón a ṭha lam si loin a besia deuhdeuh.

²⁷Cunu cun Jesuh thu a rak thei ih miburpi lakin Jesuh dunglam in a ra.

²⁸“A puan ka tham thei ahcun ka dam ko ding,” tiah a ruat.

²⁹Curuangah Jesuh puan cu a tham. Cutiih a tham vete in a thisuak cu a reh ih ka natnak ihsin ka dam zo ti kha a thei.

³⁰Jesuh in a sung ihsin a huham a suah kha a thei lohli ih miburpi lamah her in, “Zoso ka puan a tham?” tiah a sut.

³¹A dungthlun pawl in, “Miburpi in an lo nor cupco hi na hmu ko. Ziangtin so ‘Zoso ka puan a tham?’ na ti,” tiah an ti.

³²Sikhalsehla Jesuh cun ka puan a thamtu cu zo bik so a si, tiah a zoh rero.

³³Cutiih thil a cangmi cu nunau nu in a theih tikah ṭih le ṭhia phah in a ra ih Jesuh kehram ah a khuk a bilh ih thudik kha a sim.

³⁴Jesuh in a hnenah, “Ka fanu, na zumnak in a lo damter zo. Dai tein va feh aw, na natnak cu damta seh,” tiah a ti.

³⁵Jesuh cutiih a ṭong rero laiah cun Jairas inn ihsin thlahmi zualko an ra thleng ih Jairas cu, “Na fanu a thi zo. Ziangah so Sayapa cu na hnaihnok duh nawn rero,” tiah an ti.

³⁶Jesuh in cuih thu an simmi cu ziang hmanah a siar lo ih Jairas hnenah cun, “Zianghman phang hlah, a zum lawng zum aw,” tiah a ti.

³⁷Cule Jesuh in Piter le Jeim le a nau Johan siar lo zohman amah a thlunter siang nawn lo.

³⁸Jairas inn cu an va thleng ih ṭapraak le hnok ceelceel ih an um kha Jesuh in a hmu.

³⁹An hnenah a vung lut ih, “Ziangah so hnok ceelceel ih nan um? Ziangah so nan ṭah nan raak! Hi nauhak nu hi a thih ual lo; a itthat a si,” tiah a ti.

⁴⁰Annih in Jesuh cu an hnihsan meen. Curuangah an zatein khawlengah a suahter ṭheh. Nauhak nu ih nu le pa le a dungthlun pathum cu a ko ih nauhak nu an retnak khaan sungah cun an vung lut.

⁴¹Nauhak nu cu a kut in a vun kai ih, “Talitha koumi,” tiah a ti. Cumi cu, “Nute tho aw ka lo ti,” tican a si.

⁴²Hmakhatteah nauhak nu cu a tho ih a feh thei. (Amah cu kum hleihnih mi a si.) Cumi an hmuh tikah an mang a bangtuk lawmmam.

⁴³Sikhalsehla Jesuh in zohman sim lo dingin thu a pek ih, “Ei ding ziangmaw tal pek uh,” tiah a ti.