Read Falam Chin MARKA 6 Bible Online

MARKA 6 - Falam Chin bible

MARKA 6

¹Jesuh cu cutawk ihsin a feh ih a khua ah a dungthlun pawl thawn an kir.

²Sabbath ni ah an sinakok sungah thu a zirh. Cunah mi tampi an um ih a thuzirhmi an theih tikah an mang a bang ngaingai. “Hi hmuahhmuah hi khuiinso a lak? Hi bangtuk fimnak hi khuiinso a ngah? Ziangtin so mangbangza hi a tuah thei?

³Mari fapa lettama, Jeim le Josef le Judas le Simon teih u kha a si lo sawm? A farnu pawl tla hinah an um lai a si lo maw?” an ti. Cuticun Jesuh cu zianghman ah an rel lo.

⁴Jesuh in ah hnenah, “Profet cu amah ih suahnak khua le ram, a sungkhat le a innsang siar lo hmun dangah cuh upatnak a tong a si,” tiah a ti.

⁵Cutawkah cun mina malte parah a kut a suang ih a damter; cumi siar lo mangbangza zianghman a tuah lo.

⁶Zumnak an neih lo ruangah Jesuh cu a mang a bang ngaingai. Cule Jesuh cu kiangkap khua ah a feh ih thu a zirh vivo.

⁷Dungthluntu hleihnih kha a ko ih pahnih pahnih in a thlah. Ramhuai neh theinak thu a pek ih,

⁸“Khual nan tlawnnak ah kianghrol siar lo a dang zianghman nan keng lo pei: rawl siseh, cawdip siseh, nan kordip ah tangka siseh nan keng lo pei.

⁹Kedam cu dam uh, asinain angki a hlei in keng hlah uh.

¹⁰Tlun-inn a lo ontu ih inn ah khua dangih nan feh sal hlan lo caam uh.

¹¹Nan thlennak khua pakhat in, tlun-inn an lo on duh lo ih nan thu khal an ngai duh lo a si ahcun, tlansan uhla nan ke ih leivut kha thinta uh. Cumi cu an hrangah ralrin peknak a si ding,” tiah thu a pek.

¹²Cuticun an feh ih mi hmuahhmuah an sualnak sir aw dingah thu an sim.

¹³Ramhuai tampi an dawi ih mina tampi tla olif hriak an culh ih an damter.

¹⁴Jesuh thuhla cu khuazakipih a than ruangah Siangpahrang Herod[5] tla in cuih thu cu a thei ve. Mi hrekkhat cun, “Baptisma petu Johan kha a nung sal a si! Curuangah hi bangtuk in mangbangza tuah theinak huham a nei,” tiah an ti.

¹⁵Mi dang cun, “Elijah a si,” an ti. Mi dang cun, “Khuahlan laiih profet pawl vek profet pakhat a si ko,” an ti.

¹⁶Cumi cu Herod in a theih ve tikah, “Baptisma petu Johan a si! A lu ka rak tanter zomi a si naón a nung sal a si hi!” tiah a ti.

¹⁷Johan cu kaih ih thirhri in khit tahratin thawng thlak dingah Herod amah rori in thu a rak pek dahmi a si. Ziangah cutin a tuah tile, Herod in a nau Filip ih nupi Herodias a ṭhit hrangah,

¹⁸Johan in, “Na naupa ih nupi na ṭhit cu a dik lo a si,” tiah Herod kha a ti ringring ruangah a si.

¹⁹Cuti a si ruangah Herodias in Johan cu a mitkem in a ngiar ringring ih thah tiangin a duh; a sinan Herod a um ruangah zianghman a ti ngam lo.

²⁰Herod in Johan cu a ṭih ngaingai, ziangahtile Johan cu mi ṭha le mi thianghlim a si ti a thei. Curuangah a hum ṭheu. Johan ih thusimmi a ngaitinte a thin a nuam dah lo, asinain a thusimmi ngai cu a duh thotho.

²¹Neta bikah Herodias cu caan ṭha a ngah. Herod suahcam a hung kim ih a suahcam lomnak ah Herod cun Acozah bawi upa pawl, a ralkap uktu ralbawi pawl le Galilee rammi upa pawl hrangah rawl darnak puai a tuah.

²²Herodias fanu cu a rung lut ih a laam tikah Herod le a sawmmi upa pawl cu an lung a awi ngaingai. Curuangah Siangpahrang bawipa in falanu hnenah cun, “Ziang so na duh? Na duh mi hmuahhmuah ka lo pe ding,” tiah a ti.

²³“Na dilmi pohpoh ka lo pe ding; ka ram ukmi a hrek tiang hman ka lo pe ding,” tiah siatcam in thu a kam.

²⁴Cule falanu cu a feh ih a nu hnenah, “Ziang so ka dil ding?” tiah a va sut. A nu in, “Baptisma petu Johan ih lu dil aw,” tiah a rak ti.

²⁵Falanu cu zamrang tein a kir ih Siangpahrang bawipa cu, “Atu ah hitawk rori ah hin baptisma petu Johan ih lu cu darkheng in i pe cila ka duh!” tiah a dil.

²⁶Cumi a theih tikah Siangpahrang cu a riah a sia ngaingai, asinain a sawmmi bawi le upa pawl hmaiih siatcam in thu a kam awk zo ruangah falanu ih a dilmi cu a el thei nawn lo.

²⁷Curuangah hmakhatte ah ralkap pakhat a thlah ih Johan ih lu rak keng dingin thu a pek. Ralkap pa cu a suak ih thawnginn ahcun a feh ih Johan ih lu cu a va tan.

²⁸Cuih hnuah darkheng in a rak keng ih falanu cu a pek, falanu cun a nu hnenah a pek sin.

²⁹Cuih thu cu Johan ih dungthluntu pawl in an theih tikah a ruak an ra lak ih an phum.

³⁰A thlahmi pawl cu an ra tlung ih Jesuh cu an tong ih an tuahmi hmuahhmuah le an zirhmi hmuahhmuah an sim.

³¹A hnenih a rami le a kirmi, mi sukso pawl cu an tamtuk ruangah Jesuh le a dungthluntu pawl cu rawl einak caan hman an nei lo. Cu hrangah an hnenah, “Kan feh pei ih kanmah lawng hlimphirte ih kan um theinak hmunah va um uh si; cule malte tal nan cawl thiam ding,” tiah a ti.

³²Cuticun anmah lawng hlimphirte ih um theinak hmun feh dingah lawng in an pok.

³³Asinain an feh kha mi tampi in an hmu ih zo an si ti kha hmakhatte ah an thei. Curuangah khua hmuahhmuah ihsin an pok ih an ke in an rak tlan ih Jesuh le a dungthluntu pawl cu an colhnak ding hmunah an rak thlen khelh vivo.

³⁴Jesuh cu lawng sung ihsin a suah tikah miburpi cu a hmu ih a thinlung cu anmah zaangfahnak in a khat, ziangahtile khaaltu nei lo tuurual bangtuk an si. Curuangah thu tampi a zirh hai.

³⁵Zanlam khua a hung siim tikah a dungthluntu pawl cu a hnenah an ra ih, “Khua a siim zo; hitawk hi hmunṭhing a si fawn.

³⁶Miburpi pawl hi thlah awla ziang lo ei ṭha an lei theinak dingah kiangkap khua pawl le lo tla ah va feh hai seh,” tiah an ti.

³⁷Jesuh cun, “Nanmah in an ei ding cu pek uh,” tiah a ti. Cutikah annih in, “Tangka zahnih[6] man rawl va lei tahratin himi pawl hi rawl daar uh, ti in duh maw si?” tiah an sut.

³⁸Jesuh in, “sang ziangzat so nan neih? Va zohhnik uh,” tiah a ti. An va zoh ih, “sang hlom nga le nga pum hnih a um,” tiah an ti.

³⁹Cule Jesuh in a dungthluntu pawl hnenah mipi pawl kha hram hring parah a bur a bur in toter dingah thu a pek.

⁴⁰Cutiin misenpi cu zakhat tlar le sawmnga tlar in an to khawm.

⁴¹Cun Jesuh in sang hlom nga le nga pum hnih cu a lak ih vanlam hawi in Pathian hnenah lungawinak thu a sim. Sang cu a phel ih mipi pawl zem dingah a dungthluntu pawl hnenah a pek. Nga pum hnih khal cu an zate hnenah a zem.

⁴²An zatein an ei ih an khopzet.

⁴³Sang le nga an hlahmi cu dungthluntu pawl in an sar ih bawm hleihnih an ngah.

⁴⁴Rawl a eitu cu mipa lawnglawng siar in thawng nga an si.

⁴⁵Cuih hnuah zamrangte in Jesuh in a dungthluntu pawl cu lawng sungah a luhter ih tili khatlam ral Bethsaida ah a hmaiah rak feh sung dingin a thlah. Cule misenpi pawl cu a tlunter.

⁴⁶Cibai a buk hai hnuah tlang parah thlacam dingah a feh.

⁴⁷Khua a thim tikah lawng cu tili laifang a thleng ih Jesuh cu amah lawng tlang parah a um lai.

⁴⁸Thli kha anmah lamih a hran ruangah a dungthluntu pawl in lawng an hlau tikah harnak tampi an tong ti kha a hei hmu. Curuangah zinglam khawvang deuh hlanah an hnenah cun ti parin a va feh. An kiang a thlen tikah lansan a tum,

⁴⁹asinain ti parih a feh kha an hmu. Mithla ah an ruat ih an thin phangin an raak ciamco.

⁵⁰An hmuh tikah an zatein an ṭih ngaingai. Hmakhatteah Jesuh in, “Nan thinphang hlah uh! Keimah ka si,” tiah a ti.

⁵¹Cule lawng sungah an hnenah a vung lut ih thli cu a dai. Dungthluntu pawl cu an mang a bangzet,

⁵²ziangahtile mi thawng nga rawl a daarnak kha a sullam an thei thei lo, an thinlung in a ruat ban lo.

⁵³Tili an tan hnuah Gennesaret ah an va thleng ih cuih hmunah an lawng cu an hreng.

⁵⁴Long sung ihsin an suah vete in mipi in Jesuh cu an theithiam lohli.

⁵⁵Curuangah cutawk ramah cun zamrangin an feh ih a umnak an theihnak hmun poh ah mina pawl cu laang in an rak zawn.

⁵⁶Cun Jesuh a fehnak pohpoh ah khawte ah siseh, khawpi ah siseh, lo lak khalah siseh, an mina pawl cu dawrhmun khalah an rak thlenpi hai ih, “Na puanfeem tal lo tham hai seh,” tiah an dil; cule a puanfeem a tham ngahtu cu an dam.