Read Falam Chin MARKA 7 Bible Online

MARKA 7 - Falam Chin bible

MARKA 7

¹Jerusalem ihsin a rami Farasi ṭhenkhat le Daanthiam ṭhenkhat pawl cu Jesuh hnenah an va leng.

²A dungthluntu hrekkhat pawl cu kut kholh loih rawl an ei kha an hmu; rawl ei hlanah nan kut nan kholh ding, timi vekin an kut an kholh lo, tinak a si.

³Ziangahtile Farasi mi siseh, Judah mi dangdang pawl siseh, an zatein an pupa pawl ih thuzirhnak kha an thlun; a daan vekin an kut an kholhta lo ahcun rawl an ei lo;

⁴cule dawrih an leimi thil khal a daan vekih an kholhta lo ahcun an ei duh lo. Cun an pupa pawl ih thuzirhmi khuathai kholh daan, beel kholh daan, darkheng kholh daan le ihkhun kholh daan ti pawl tla an thlun.

⁵Curuangah Farasi mi pawl le Daanthiam pawl in Jesuh cu, “Ziangah so na dungthluntu pawl in kan pupa pawl ih in zirhta mi daan vekin nung loin kut kholh lo pi thawn rawl an ei?” tiah an sut.

⁶Jesuh in, “Profet Isaiah in nanmah ih thuhla a rak sim tikah a va dik lawmmam so! Nannih mititeraw pawl, nan thu cu hiti in a ngan: Pathian in ‘Hi minung pawl hin an ṭongkam lawngin in upat; An thinlung cu ka hnen ihsin a hlat ngaingai a si.

⁷Keimah in biak hi a lak a si, Ziangahtile milai ih tuahcopmi daan kha Pathian ih pekmi daan vekin an zirh a si,’ a ti.

⁸Pathian thupekmi cu nan taan ih milai ih zirhmi sawn cu nan thlun a si!” tiah a ti.

⁹Cule Jesuh in a peh ih, “Nanmah ih thuzirhmi fekter ih Pathian pekmi daan hnon zia cu nan va thiam so!

¹⁰Ziangahtile Moses thupekmi sungah ‘Nan nu le nan pa upat uh,’ tile ‘A nu siseh, a pa siseh, a camtu cu thah a si ding,’ tiah a um.

¹¹Sikhalsehla nannih cun ‘Mi pakhat in a nu le a pa kha: nanmah bomnak hrangah ka timi ka thilri hi Korban a si, a ti ahcun, (Korban ti cu Pathian ta a si tican a si)

¹²cupa cu a nu le a pa bomnak ihsin a luat,’ tiah nan ti.

¹³Cutiih mi nan zirhmi in Pathian ṭongkam cu a phiat ṭheh a si. Cule cu bangtuk ih nan tuahmi dangdang tla tampi a um,” tiah a ti.

¹⁴Cule Jesuh in misenpi kha a ko sal ih an hnenah, “Nan zatein ka thusimmi hi ngai uhla thei uh!

¹⁵Minung hi lenglam ihsin sung lamah a lutmi thil in a baalter lo. A sunglam ihsin a ra suakmi in a baalter sawn a si,” tiah a ti.[7]

¹⁷Jesuh in misenpi pawl cu a fehsan ih inn sungih a luh tikah a dungthluntu pawl cu cuih a ṭongmi sullam sut dingah an ra.

¹⁸Jesuh in, “Midang pawl hnakin nan fim cuang lo a sihi! Nan thei lo ngaingai maw? Lenglam ihsin minung sungah a lutmi in mi a baalter thei lo,

¹⁹ziangahtile cuih thil cu a thinlung sungah feh loin a pumpi sungah a feh ih cuticun zunpawng ah a suak sal a si,” tiah a ti. (Hitiin Jesuh ih a sim tikah ziang bangtuk rawl hman hi ei thiang an si ṭheh ko, tiah a ti duhnak a si.)

²⁰Cule Jesuh in, “Mi a baaltertu ngaingai cu a sunglam ihsin a suakmi an si.

²¹Ziangahtile ṭhatlonak a tuahtertu ruahnak ṭha lo pawl cu minung sunglam ihsin a suakmi an si: nupa sualnak, rukruk, mithah,

²²Ṭaangṭawm sualnak, duhham, thil siava dangdang tuah, mibum, a mawi lo zetmi thilsual tuah, iksiik, misimsiat, puarthau le aat-thlakza thil tuahnak,

²³hi thil siava pawl hi minung thinlung sung ihsin a suakmi an si ih hi pawl hin mi an baalter a si,” tiah a ti.

²⁴Cule Jesuh cu a feh ih Tai-ar khua kiang a hung thleng. Inn pakhat sungah a lut ih cutawkah a um ti zohman theihter a duh lo; asinain a thup aw thei cuang lo.

²⁵Cu ngaingai in, a fanu ramhuai ih a kaihmi nunau pakhat in Jesuh a um ti kha a thei ih hmakhatte ah Jesuh kehram ah a bok.

²⁶Cuih nunau nu cu Zentail nu a si ih Siria ram Fonisia pengih a suakmi a si. Ramhuai kha a fanu sung ihsin dawisuak dingah a dil.

²⁷Asinain Jesuh cun, “Rawl cu faale pawl kan pek hmaisa pei. Faale pawl ih rawl uico pek cu a dik lo a si,” tiah a ti.

²⁸Cu nu cun, “A si ko, Bawipa! Sikhalsehla faale pawl ih hlahtakmi rawl ṭilfuan cu cabuai hnuai ih uico pawl in an ei ve ṭheu ko a sisi!” tiah a ti.

²⁹Cutikah Jesuh in, “Cutiih i leh thei ruangah inn ah va tlung awla na fanu sung ihsin ramhuai cu a suak zo ti na va hmu ding,” tiah a ti.

³⁰Inn ah a tlung ih a fanu cu ihkhun parih a rak ih kha a va hmu. Ramhuai cu a sung ihsin a rak suak zo ngaingai.

³¹Cule Tai-ar peng ihsin Jesuh cu a pok ih Sidon ram pal phah in Dekhapolis ram laifang a hruut ih Galilee Tili a thleng.

³²Mi ṭhenkhat in a hnenah hnaset ṭong thiam lo pa pakhat an rak keng ih a parah Jesuh in a kut suang dingin an dil.

³³Curuangah Jesuh in cupa cu mipi hnen ihsin hmun dangdeuh ah a hruai ih a kut zungin a hna pahnih cu a tawhsak; cil a phui ih a lei a thamsak.

³⁴Cule vanlam hoi in Jesuh cu a hruum ih cupa hnen ahcun, “Effatha,” tiah a ti. Atican cu “Ong aw thlang aw,” tinak a si.

³⁵Hmakhatteah cupa cu a hna a vaang, a lei a naal ih har lotein a ṭong thei.

³⁶Cuih thu cu zo hnen hmanah sim lo dingin Jesuh in mipi pawl cu a dawn. Asinain tam deuh a dawn hai tikah tam deuhdeuh in an sim.

³⁷Cule cuih thu a theitu hmuahhmuah in an mang a bang ngaingai ih, “A tuahmi hmuah in an va ṭha lawmmam so! Hnaset mi an hna a vaang ih ṭong thiam lo tla an ṭong thei,” tiah an fak ciamco.