Read Falam Chin MARKA 9 Bible Online

MARKA 9 - Falam Chin bible

MARKA 9

¹Thungai in ka lo sim: hi tawkih a ummi mi ṭhenkhat pawl hi Pathian Uknak huham thawn a ra thlen an rak hmuh hlan lo an thi lo ding,” tiah a ti.

²Ni ruk hnuah Jesuh in Piter le Jeim le Johan cu a fehpi ih tlang parah anmah lawng a kaipi. An mit hmuhah Jesuh cu a hmuihhmel a thleng aw;

³a hnipuan cu a tleu in a tleu ih milai in ziangtluk hmanin sawp hai sehla cutluk cun a vaar thei dah lo ding.

⁴Cule dungthluntu pathum cun Elijah le Moses thawn Jesuh cu bia aw rero in an hmu.

⁵Piter in Jesuh hnenah, “Sayapa, hitawk kan um cu a va ṭha so! Deubuk pathum in kan sak pei; na hrangah pakhat, Moses hrangah pakhat, cule Elijah hrangah pakhat,” tiah a ti.

⁶Ziangahtile Piter le a rualpi pawl cu an thin a phang tuk ih ziang ṭong ding dang an theih lo ruangah a si.

⁷Cuih hnuah mero a ra zaam ih an tlun ihsin a run khuh ṭheh, cule mero sung ihsin, “Himi cu ka duhdawtmi ka Fapa a si, amah ih thu nan ngai pei,” tiah a ti.

⁸A dungthluntu pathum cun an kiangkap an zoh rero naón zohman an hmu lo; Jesuh lawng an kiangih a um kha an hmu.

⁹Tlangpar ihsin an rung ṭum laiah Jesuh in, “Milai Fapa hi thihnak ihsin ka thawhsal hlan cu nan hmuhmi hi zohman nan sim lo pei,” tiah thu a pek.

¹⁰Cuih a thupekmi cu an thlun; asinain, “Thihnak ihsin thawhsal,” timi cu ziang a si pei? tiah pakhat le pakhat an sut aw rero.

¹¹Cule Jesuh cu, “Ziangah so Daanthiam pawl in Elijah a ra hmaisa ding, an ti?” tiah an sut.

¹²Jesuh cun, “Ziang hmuahhmuah timtuah ṭheh dingah Elijah cu a ra taktak ding. Asinain ziangah so Ca Thianghlim in ‘Milai Fapa cu nasa zetin a tuar ding ih a hnon tla an hnong ding,’ tiah a ti?

¹³Thungai in ka lo sim: Elijah cu a ra zo ih, Ca Thianghlim ih a sim vekin minung in an duhduh in an tuah zo,” tiah a ti.

¹⁴Dungthluntu dang pawl hnen an vung thlen tikah an kiangkap in mitampi in an kulhvel ih Daanthiam hrekkhat pawl le dungthluntu cu thu an el awk rero kha an hmu.

¹⁵Misenpi in Jesuh kha an hmuh tikah an mang a bang ngaingai ih va hmuak dingah an tlan ciamco.

¹⁶Jesuh in a dungthluntu pawl cu, “Anmah thawn ziangthu so nan el awk rero?” tiah a sut.

¹⁷Misenpi lakih mi pakhat in, “Sayapa, ka fapa na hnenah ka rak hruai sokhaw; ziangahtile ramhuai in a polh ih ṭong khal a ṭong thei lo.

¹⁸Ramhuai in a polh tikah cun, leilung ah a hlon aw ih a cil buanra a suak ih a hacang rial tahratin a pumpuluk a ṭhong ṭheh ṭheu. Cuih ramhuai dawisuak dingah na dungthluntu pawl ka sim naón zianghman an ti thei lo,” tiah a ti.

¹⁹Jesuh in an hnenah, “Maw zumnak nei lo minung pawl! Nan hnenah ziangtik tiangso ka um hrih ding? Ziangtik tiangso ka lo zawi hrih hai ding? Nauhakpa cu ka hnenah rak keng uh,” tiah a ti ih

²⁰Jesuh hnenah cun an ratpi. Ramhuai in Jesuh a hmuh vete in nauhakpa cu a dirhcaih ih leilung ah a tlu, a let aw tualto ih a ka ihsin buanra a suak ciamco.

²¹Jesuh in, “Hitiih a sinak hi a rei zo maw?” tiah a pa cu a sut. A pa in, “A seentet lai ihsin a si zo.

²²Voi tampi ramhuai hin that dingin meisa lak le tidai sungah a paih ṭheu. Na tuah theimi a si ahcun in zaangfah awla in bawm hram aw,” tiah a ti.

²³Jesuh in, “Na tuah theimi a si ahcun, na ti. A si! Zumnak neitu hrangah cun ziang hmuahhmuah a cang thei a si,” a ti.

²⁴Cupa cun hmakhatte ah, “Ka zum a si; ka zum kim lonak i bawm aw,” tiah a au ciamco.

²⁵Jesuh cun misenpi in a kiangah an ra fuk vivo ti a hmuh tikah ramhuai kha thu a pek ih, “Hnaset le ṭong thiam lo thlarau siava, hi nauhak pa sung ihsin suak awla lut sal nawn hlah, tiah thu ka lo pek,” tiah a ti.

²⁶Ramhuai cu a hruum ih nauhak pa kha dircai phah in a thlukta ih a sung ihsin a suak. Nauhak pa cu mithi a bang ih mi tampi in, “A thi zo,” tiah an ti.

²⁷Asinain Jesuh in nauhak pa cu a kut in a vun dirh ih a hung ding.

²⁸Jesuh cu inn sungah a lut ih dungthluntu pawl in a thupte in, “Ziangah so kannih hmuah in kan dawi thei lo?” tiah an sut.

²⁹Jesuh in, “Thlacamnak dah ti lo, thildang zianghman in hi bangtuk cu a dawi thei lo ding,” tiah a sim.

³⁰Jesuh le a dungthluntu pawl cu cutawk ihsin an pok ih Galilee peng tan phah in an feh. Jesuh in a dungthluntu pawl thu a zirh vivo ruangah midang zohman in a umnak thei dingah a duh lo.

³¹Ziangtin a zirh tile: “Milai Fapa hi mi kut ah an thlen ding ih an that ding. Asinain ni thum hnuah a tho sal ding,” tiah a ti.

³²Sikhalsehla cuti ih a zirhmi cu an thei thei lo. A suh le an sut ngam fawn lo.

³³Kapernaum khua an thleng ih inn sungih an luh hnuah Jesuh in a dungthluntu pawl cu, “Lamzin ah ziangthu so nan el awk rero kha?” tiah a sut.

³⁴A thu suhmi cu zohman in an let lo, ziangahtile lamzinih an el awkmi cu anmah lakah zoso a tum bik ti a si.

³⁵Jesuh cu a to ih dungthluntu hleihnih a ko ih an hnenah, “A tum bik si a duhtu cu mi nauta bik a si hmaisa ding ih mi hmuahhmuah riantu a si pei,” tiah a ti.

³⁶Cule nauhak pakhat a ko ih an hmaiah a dinter. Nauhak pate cu Jesuh in a kuah ih an hmaiah a dinter hnuah,

³⁷“Zokhal sisehla ka hmin in hi bangtuk nauhak a cohlangtu cu keimah i cohlang a si; cule keimah i cohlangtu cu keimah i thlahtu khal a cohlang a si,” tiah a ti.

³⁸Johan in, “Sayapa, na hmin in khawsia a dawisuaktu mi pakhat kan hmu ih kan lak ih tel vemi a si lo ruangah kan khamta,” tiah a ti.

³⁹Jesuh in, “Kham hlah uh! Ziangahtile ka hmin in mangbangza a tuahtu cun i simsia lo ding.

⁴⁰Ziangahtile in dodal lotu cu kanmah lam ṭang a si.

⁴¹Thungaite in ka lo sim: Ka minung nan si ruangih tidai khuat khat a lo petu cu ṭhatman a ngah tengteng ding,” tiah a ti.

⁴²Jesuh in, “Zokhal sisehla hi bangtuk nauhakte pawl pakhatkhat keimah i rinsannak ihsin a pialtertu cu a hngawng ah fangcang rialnak lungtum thlaih tahratin tifinriat sungih thlak a hrangah a ṭha sawn a si.

⁴³Curuangah na kut in na zumnak a lo pialter a si ahcun na kut cu tan aw! Na kut pahnih thawn a mit dah lomi hell meisa sungih na tlak hnak cun kut pakhat lawng thawn nunnak sungih na luh a ṭha sawn.[8]

⁴⁴

⁴⁵Cule na ke in na zumnak a lo pialter a si ahcun na ke cu tan aw. Na ke pahnih thawn hell sungih tlak hnak cun ke pakhat lawng thawn nunnak sungih na luh a ṭha sawn.[9]

⁴⁶

⁴⁷Cule na mit in na zumnak a lo pialter a si ahcun na mit cu phorh suak aw. Mit pahnih thawn hell sungih tlak hnak cun mit pakhat lawng thawn Pathian Uknak sungih na luh a ṭha sawn.

⁴⁸Cutawkah ‘anmah a eitu tholung pawl cu an thi dah lo ih anmah kangtu meisa khal a mit dah lo a si.’

⁴⁹“Thawinak sa cu ci in thianfaiter a si vekin mi hmuahhmuah cu meisa in thianfaiter thluh an si ve ding.

⁵⁰“Ci cu a ṭha. Sikhalsehla a alnak a ziam asile ziangtinso na alter sal thei nawn ding? “Ci bangtuk in a ṭha mi pawlkomnak nei uhla pakhat le pakhat rualremte in um uh,” tiah a ti.