Read Falam Chin LUKA 10 Bible Online

LUKA 10 - Falam Chin bible

LUKA 10

¹Cuih hnuah Bawipa in midang sawmsarih le pahnih[7] a hril ih amah a fehnak ding khawkip le hmunkip ah khan pahnih pahnih in a rak thlah sung.

²An hnenah cun, “Rawl khawm ding a tamzet naón a khawmtu ding an malte a si. Curuangah rawl khawmtu ding tam sinsin a thlahnak dingah lo neitu hnenah thla cam uh.

³Va feh uh! Cinghnia rual lakih tuu faate thlahmi bangin ka lo thlah hai a si.

⁴Cutiih nan feh tikah paisa bawm siseh, zaal siseh, kedam siseh keng hlah uh; lamzin ih nan tonmi pawl biak dingah cawlta hlah uh.

⁵Inn pakhatkhat sungih nan va luh tikah a hmaisabik ah, ‘Hi inn sungah daihnak um hram seh,’ tiah va ti uh.

⁶Daihnak a duhtu a si ahcun daihnak na parah um hram seh, tiah cibai nan buknak cu a parah a umta ding; cuti a si lo ahcun nan hnenah daihnak cu kir salseh.

⁷Cuih innah cun um uhla an lo pekmi poh kha in uhla ei uh; ziangahtile hnaṭuantu in a hlawhman cu a ngah a ṭul a si. Inn pakhat ihsin inn dangah ṭhawn duldo hlah uh.

⁸Khua pakhat nan thlen ih tlun-inn an lo on a si ahcun an lo pekmi pohpoh cu ei uh;

⁹cuih khawsungih mina pawl tla damter uhla cuih khuami pawl cu, ‘Pathian Uknak a nai zo,’ tiah sim uh.

¹⁰Sikhalsehla khua pakhat nan thlen ih an lo tlunter lo asile khawsung lamzin ah feh uhla,

¹¹‘Kan ke ih a kopmi nan khua ih leivut khal nanmah engtainak ah kan thingfai ṭheh a si. Asinain Pathian Uknak cu nan kiangah a ra thleng zo, ti ciing ringring uh,’ nan ti pei.

¹²Thungai in ka lo sim: Thuṭhennak Ni ah cuih khuami hnakin Sodom khuami hnenah Pathian in zaangfahnak a nei sawn ding,” tiah a ti.

¹³“Maw Khorazin khua, na hmakhua a va pit so! Maw Bethsaida khua, na hmakhua a va pit so! Na sungih mangbangza ka tuahmi pawl hi Tai-ar khua le Sidon khua ah tuah rak sisehla, cuih khawsungmi pawl cun an sualsir langternak dingah buri hnipuan hrukin vutcam an phulh awknak a reipi zo ding!

¹⁴Thuṭhennak Ni ah Pathian in nang hnakin Tai-ar le Sidon khuami pawl parah zaangfahnak tam sawn a nei ding.

¹⁵Cun nang Kapernaum khua! Van tiangih hlirsan awk na duh maw si? Hell sungah hlon na si ding!” tiah a ti.

¹⁶Cule Jesuh in a dungthluntu pawl hnenah, “Nan thu a ngaitu pawl cu ka thu a ngaitu an si. A lo hnongtu cu keimah i hnongtu an si. Cule keimah i hnongtu cun keimah i thlahtu khal an hnong a si,” tiah a ti.

¹⁷Sawmsarih le pahnih thlahmi pawl cu lungawi zetin an ra kir sal ih, “Bawipa, na hmin in ramhuai pawl kan dawi tikah kan thu an ngai a si,” tiah an ti.

¹⁸Cutikah Jesuh in, “Nimthlakau bangin vancung ihsin Satan a tlak kha ka hmu.

¹⁹Ngai uh! Huham neihnak ka lo pek hai: rul le varngen-meipir pawl parah nan feh thei ding; nan ral neh theinak huham khal ka lo pek ih zianghman in a lo tuahmawh thei lo ding.

²⁰Sikhalsehla thlarau ṭha lo in nan thu an ngai ruangah nan lungawi hlah uh; nan hmin vancungih ngan cia a si ruangah nan lungawi sawn uh,” tiah a ti.

²¹Cutikah Jesuh cu Thlarau Thianghlim in lungawinak thawn a khatter ih, “Maw ka Pa, lei le vanih Bawipa, mifim le mithiam pawl hnenih sim dah lomi thil cu fimthiamnak a nei lomi hnenah na langter ruangah na parah ka lung a awi. A si ka Pa, hiti ih a cangmi hi na duhzawng ih a cangmi a si.

²²“Ka Pa in ziang hmuahhmuah ka hnenah i pe zo. Fapa hi zo a si ti Pa siar lo zohman in an thei lo; cule Pa hi zo a si ti khal Fapa le, Pa ih thu Fapa in an hnenih a phuan ciami pawl siar lo zohman in an thei lo,” tiah a ti.

²³Cule Jesuh cu a dungthluntu pawl lamah a her ih anmah lawngih theih dingin, “Nan hmuhmi thil pawl nan hmuh hi ziangtluk vannei so nan si!

²⁴Fiangtein ka lo sim: profet tampi le siangpahrang tampi in nan hmuhmi hi hmuh ve an duh naón an hmu thei lo; theih ve an duh naón an thei ngah lo a si,” tiah a ti.

²⁵Daanthiam saya pakhat a ra ih a sualnak hawl dingin Jesuh hnenah, “Sayapa, kumkhua nunnak ka ngah theinak dingah ziangso ka tuah ding?” tiah a sut.

²⁶Jesuh in, “Ca Thianghlim in ziangtinso a ti? A timi cu na pomdan ziangtinso a si?” tiah a ti.

²⁷Cupa cun, “Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei, a ti,” tiah a ti.

²⁸Cutikah Jesuh in, “Na simmi cu a dik a si; cu bangtuk in va tuah awla na nung ding,” tiah a sawn.

²⁹Sikhalsehla Daanthiam pa cun amah le amah thiam coter awk a duh ruangah Jesuh kha, “Zoso ka innhnen cu a si?” tiah a sut.

³⁰Cutikah Jesuh in, “Voikhat ah mi pakhat cu Jerusalem ihsin Jerikho ah a vung feh. Cutiih a feh laiah suamhmang pawl in an kai ih a hnipuan an hliit hnuah thizikte in an thawi ih an tlansan.

³¹Culai ah puithiam pakhat cu cuih lamzin ah a vung feh ngelcel; asinain cupa a hmuh tikah khatlam kam in a hrial ih a fehsan.

³²Cuvek ṭhiamṭhiam in Levi mi pakhat khal a va feh ve ih mina pa cu a hei zohhliahta ih khatlam kapin a hrial ih a fehsan ve.

³³Asinain Samaria mi pakhat cu cutawk lamzin ah khual a tlawng ve ih cuih mina pa hnen a thleng ih a hmuh tikah a zaangfah ngaingai.

³⁴A hei fuuk ih a hma cu siti le sabitti a hnih ih ṭhatein a tuam sak. Cule a hruaimi rannung parah toter in khualbuk ah a fehpi ih cunah ṭhatein a tuamhlawm.

³⁵A thaisun ah ngun tangka fanghnih a suah ih riahbuk kiltupa cu a pek ih, ‘Hi pa hi ṭhatein run tuamhlawm awla hi lam ih ka ra kir sal tikah hi pa na zohnak hrangih na cemmi hmuahhmuah cu ka lo ruul sal thluh ding,’ a ti,” tiah a sim.

³⁶Cuih hnuah Jesuh in, “Suamhmang ih an kaih mipa ih innhnen cu himi pathum lakah hin zo hi so a si, tiah na ruat?” tiah a sut.

³⁷Daan zirhtu saya in, “Amah a zaangfahtu pa hi a si,” tiah a let. Jesuh in, “Feh awla cubangtuk in va tuah ve aw,” tiah a ti.

³⁸Jesuh le a dungthluntu pawl cu khual an tlawng vivo ih khua pakhat an thleng. Martha timi nu in Jesuh cu a inn ah a tlunter.

³⁹Martha ih naunu cu Mari a si. Mari cu Jesuh ih kehram ah a to ih a thusimmi kha a ngai.

⁴⁰Martha cu hnaṭuan tampi nei in a buai ih a thin a ṭeu ruangah Jesuh hnenah, “Bawipa, ka naunu in hnaṭuan hmuahhmuah i tun ṭheh hi na poisa lo maw si? Sim aw, i ra bawm seh!” tiah a ti.

⁴¹Cutikah Jesuh in, “Martha, Martha! Nang cu thil tampi parah helhkam le awloksong in na um;

⁴²a ṭul ngaingaimi cu pakhat lawng a si. Cumi cu Mari in a hril ngah ih zohman in an lawng nawn lo pei,” tiah a ti.