Read Falam Chin LUKA 11 Bible Online

LUKA 11 - Falam Chin bible

LUKA 11

¹Ni khatah Jesuh cu hmun pakhat ah thla a cam. A ṭheh tikah a dungthlun lakih pakhat in, “Bawipa, Johan in a dungthlun pawl thlacam a zirh vekin thlacam in zirh ve aw,” tiah a ti.

²Jesuh in an hnenah, “Thla nan cam tikah hiti in nan ti pei: ‘Kan Pa, Na hmin thianghlim cu upat si ko seh, Na Uknak thleng hram seh.

³Nitin kan ṭulmi rawl in pe aw.

⁴Kan parih sualnak a tuahtu pawl kan ngaithiam bangin, kan sualnak in ngaithiam ve aw. A harmi hniksaknak ah in thlengter hlah aw,’ tiah nan ti pei,” tiah a ti.

⁵Cule Jesuh in a dungthlun pawl hnenah, “Thuṭhimnak ah nanmah lakih pakhat in na rualpi inn ah zanṭim ah feh tahratin ‘Ka rual, sang hlom thum in i coih hram aw.

⁶Ka rualpi pakhat khualtlawnnak ihsin ka inn a ra thleng ih rawl pek ding zianghman ka nei lo,’ tiah na va ti.

⁷Cule thuṭhimnak ah a innsung ihsin na rualpi cun ‘I hnaihnok hlah. sangka ka khar zo ih ka faale thawn kan it zo; thil pe dingin ka tho paih nawn lo,’ tiah ti bang sehla,

⁸ziangtinso na tuah ding? Thungai in ka lo sim: a rualpi na si ruangah hung tho in na dilmi saang cu lo pe lohli lo hmansehla ningzak loin na dil rero hrat ahcun a tho pei ih na ṭulmi cu a lo pe ko ding.

⁹“Curuangah hiti in ka lo sim: dil uh, nan ngah ding; hawl uh nan hmu ding; king uh, nan hrangah sangka on a si ding.

¹⁰Ziangahtile a diltu hmuahhmuah in an ngah ding, a hawltu cun an tong ding ih a kingtu hrangah sangka cu onsak a si ding.

¹¹Nannih pale pawl lakah na fapa in ngasa lo dilsehla rul a petu nan um pei maw?

¹²Asilole arti a dil tikah varngen-meipir a petu nan um pei maw?

¹³Mi ṭha lo nan si ko naón nan faale hnenah cun thil ṭha pek nan thiam a si ahcun vancung nan Pa in ziangtlukin so a diltu hnenah Thlarau Thianghlim cu a pek sinsin ding!” tiah a ti.

¹⁴Jesuh in a ṭong thei lo mipa hnenin ramhuai pakhat a dawi suak; cutiih a dawi suak hnuah a polh mipa cu a ṭong thei. Cule misenpi cu an mang a bang ngaingai.

¹⁵Asinain mi ṭhenkhat cun, “Hitiih ramhuai pawl a dawi theinak cu ramhuai uktu bawi Beelzebul in huham a pek ruangah a si,” tiah an ti.

¹⁶Midang pawl in Jesuh sualnak hawl an duh ve; curuangah, “Pathian ih lungkim mi na si le si lo theihnak ah hmuhsaknak tuah aw,” tiah an fial.

¹⁷Sikhalsehla Jesuh in an ruahnak kha a thei ih an hnenah, “Ram pakhatkhat ṭhen tampi ah a ṭhen aw ih ṭhenkhat le ṭhenkhat a do awmi ram cu rei a awh lo ding; a rem aw lomi innsang cu an ṭhenṭhek aw ṭheh a si.

¹⁸Cubangtuk ṭhiamṭhiam in Satan uknak sung khalah bu tampi ah um in bu khat le bu khat an do awk le ziangtinso cuih Satan uknak cu rei a awh thei ding? ‘Beelzebul in huham a lo pek ruangah ramhuai na dawi thei,’ tiah in ti.

¹⁹Cuti vekin Beelzebul ruangah ramhuai ka dawi thei ngai ti bang sehla, nanmah a lo thluntu pawl in teh ziangtinso ramhuai an dawi thei? A lo thluntu pawl lala hi nanmah parih thuṭhentu an si ding.

²⁰Sikhalsehla kei cun Pathian cahnak thawn ramhuai ka dawi thei a si sawn; cutiin a si ruangah Pathian Uknak cu nan hnenah a ra thleng zo, ti a lang a si.

²¹“Mi cakzet pakhat in a hriamnam neihmi hmuahhmuah thawn a inn a kilven ahcun a thilri pawl cu an him.

²²Sikhalsehla a cak deuh sawn pa in cupa cu a do ih a neh ahcun a rinsan zetmi a hriamnam pawl cu a lawng ṭheh ih a lonmi thilri pawl cu mi a zemdarh ṭheh a si.

²³“Keimah i ṭan lotu hmuahhmuah cu i dodaltu an si; a khawm i bawm lotu hmuahhmuah cu a ti darhdaitu sawn an si,” tiah a ti.

²⁴“Thlarau pakhat cu mi pakhat sung ihsin a suah tikah colhnak hmun hawl in ramcaar le ramṭhing ah a vak vivo. Colhnak hmun a ton lo tikah ‘Ka tlansan zomi ka inn ah ka kir sal ding,’ tiah amah tein a ruat.

²⁵Cuticun a kir sal ngaingai tikah a inn cu faizet le umnak dingah duhnungza zetin a va hmu.

²⁶Cuih hnuah a feh ih amah hnakih a siava deuhmi ramhuai pasarih a va sawm ih cutawkah an ra um. Cule a netnak ahcun cupa cu a hlan hnakin a besia sinsin a si,” tiah a ti.

²⁷Jesuh in hi thu a sim ṭheh tikah misenpi lakih nunau nu pakhat in Jesuh cu, “A lo hringtu le a lo tuamhlawmtu nunau cu mi thlawsuak a va si so!” tiah a ti.

²⁸Jesuh cun, “Pathian thu a thei ih a thlun taktaktu pawl cu mi thlawsuak an si sawn,” tiah a ti.

²⁹Mitampi in Jesuh cu an pan ih an fuuk cupco laiah Jesuh in, “Tuih san minung hi an va ṭha loso! Hmuhsaknak tuahsak ding an dil, sikhalsehla Jonah hmuhsaknak siar lo hmuhsaknak dang zianghman tuahsak an si lo ding.

³⁰Profet Jonah cu Nineveh minung pawl hrangah hmuhsaknak a rak si bangtuk in Milai Fapa hi tuih san minung pawl hrangah hmuhsaknak a si ve ding.

³¹Thuṭhen Ni ah Siangpahrangnu Sheba cu a tho ding ih tuih san minung pawl hi sual a puh ding, ziangahtile Siangpahrang Solomon fimnak thuzirhmi ngai dingah lamhlapi ihsin a ra thleng; asinain thungai in ka lo sim: Solomon hnakih tum sawn hinah a um.

³²Thuṭhen Ni ah Nineveh khawsung mi pawl an tho ding ih sual an lo puh ding, ziangahtile Jonah in an hnenih thu a sim laiah an sualnak an sir aw a si; thungai in ka lo sim: Jonah hnakih tum sawn hinah a um a si.

³³“Zohman in mei-inn vang tahratin an thup dah lo, a si lole kho an khuh dah keel lo; mei-inn vannak tung parah an ret ih cuticun a ra luttu pawl in khua ṭhatein an hmu a si.

³⁴Nan mit tla cu nan pum hrangah mei-inn bangtuk a si. Nan mit a fim ahcun nan pumpuluk in a tleu ding, asinain nan mit a ṭhat lo ahcun nan pumpuluk in a thim ṭheh ding.

³⁵Cuti a si ruangah nan sungih tleunak hi thimnak a si sal lonak dingah ralring uh.

³⁶Nan taksa pumpuluk cu malte hman thimnak sungah um loin a tleu ṭheh a si ahcun mei-inn in nan taksa a tlet vekin a tleuzet ding a si,” tiah a ti.

³⁷Thu a sim ṭheh tikah Jesuh cu Farasi mi pakhat in rawl ei a sawm; cuhrangah Jesuh cu a feh ih rawl ei dingah a to.

³⁸Jesuh cu rawl a ei hlanih a kut a kholh lo kha Farasi pa cun a hmuh tikah a lau ngaingai.

³⁹Cutikah Bawipa in a hnenah, “Nannih Farasi pawl cun nan khuat le pakan pawl a lenglam lawng nan kholhfai ṭheu, asinain nan sunglam cu duhhamnak le ṭhat lonak in nan khahter a si.

⁴⁰Mi aa pawl! A lenglam a tuahtu Pathian in a sunglam tla a tuah a si lo maw?

⁴¹Curuangah nan khuat le nan pakan pawl sungih a ummi kha mi farah pawl pe uhla ziang hmuahhmuah nan hrangah a thiang ding a si.

⁴²Farasi pawl, nan hmakhua a va pit so! Hanghnah hangrah sungin puṭinan le remhmui le aithing le a dangdang tla cu ṭhenhra ṭhenkhat nan pek ko naón dingnak le Pathian duhdawt ding cu nan daithlan. A dang khal daithlang cuang loin hi pawl cu nan tuah dingmi an si.

⁴³Farasi pawl, nan hmakhua a va pit so! Sinakok ah tokham ret sak ciami parih to cu nan duh tuk lawmmam ih sumdawrnak tluan ih upatnak an lo pek tla cu nan sunsak bik.

⁴⁴Nan hmakhua a va pit so! Nannih cu hminsinnak a nei lomi thlaan, mi in an theih thiam lo ruangah an pal ṭheu mi thlaan bangtuk nan si,” tiah a ti.

⁴⁵Cutikah Daanthiam saya pakhat in, “Sayapa, hiti ih na ṭong tikah kannih khal in hmuhsuam ve a si!” tiah a ti.

⁴⁶Jesuh in, “Daanthiam saya pawl, nannih hrang tla-ah nan hmakhua a pit a si! An phurh thei lo ding thilrit khi mi ih zaang parah nan suang ih nanmah cun phurh bawm dingah nan kut zimte hman nan suah zuam lo.

⁴⁷Nan hmakhua a pit a si! Nan pupa pawl ih an rak thahmi profet pawl hrangah thlaan ṭhaṭha nan tuah.

⁴⁸Cuticun nan pupa pawl ih thil tuahmi cu nan lungkimpi a si ti nan langter; annih in profet pawl an that ih nannih in an thlaan nan tuah.

⁴⁹Curuangah Pathian ih Fimnak in ‘An hnenah profet le tirhthlah pawl ka thlah ding; ṭhenkhat an that ding ih a ṭhen an hrem ding,’ a ti.

⁵⁰Cuti a si ruangah tuih san mi pawl hi leilung hramthok ihsin profet pawl an thah ruangah hrem an si ding.

⁵¹Fiangtein ka lo sim: Abel thah a tuarnak ihsin thokin biakṭheng le Hmun Thianghlim karlakih an thahmi Zekhariah tiang, thisen a suah ruangah tuih san mi pawl in hrem an tuar ding a si.

⁵²Nannih Daanthiam saya pawl, nan hmakhua a va pit so! Fimnak inn luhnak sangka tawhfung cu nan keng; cule nanmah nan lut duh lo ih tlunah luh a duhmi pawl nan kham fawn a si,” tiah Jesuh in a ti.

⁵³Cutawk ihsin Jesuh cu a feh tikah Daanthiam saya pawl le Farasi pawl in nasa zetin an engtai ih thil tampi thu ah thu tampi an sut;

⁵⁴pakhatkhat ṭong sualmi a neih ahcun amah ih ṭong lala ih awk aw dingin thu tampi an suhnak cu a si.