Read Falam Chin LUKA 12 Bible Online

LUKA 12 - Falam Chin bible

LUKA 12

¹Miburpi a thawngthawng in an tong aw ih an pal awk cupco laiah Jesuh cun a dungthlun pawl hnenah a hmaisa ah hiti in a sim: “Farasi pawl ih thilnu hi ralring uh; an titer awknak thilnu hi!

²Ziangkhalsiseh khuhmi pohpoh cu on thluh an si ding ih thuthup hmuahhmuah cu phuan ṭheh an si ding.

³Cuticun khawthim lakih nan simmi thuthup pohpoh kha sun khawvang lakah theihter thluh an si ding ih inn kharhkhumin thupte ih nan simmi cu inn tlun luanglu ihsin aupi a si ding,” tiah a ti.

⁴Jesuh in, “Ka rualle uh, ka lo sim hai: taksa pum lawng a that thei ih cuhnakih besia dang a tuah thei lotu cu va ṭih hlah uh.

⁵Zoso ṭih ding sawn, ti ka lo sim hai ding: a thah lawng si loin hell sungih thlak theinak khal thu a neitu Pathian lawng ṭih uh. Fiangtein ka lo sim: Amah hi nan ṭih dingmi cu a si!

⁶Sunṭam panga kha pia hnih ah an zuar a si lo maw? Asinain pakhat hman Pathian in a hngilh lo a si.

⁷Nan lu parih samphang hman a siar ṭheh. Curuangah nan thin phang hlah uh; sunṭam tamzet hnakin nan sunglawi sawn a si.

⁸“Hitiin ka lo sim: zokhal sisehla keimah ih ta a sinak kha mi hmaiah a phuang ngamtu cu Milai Fapa in Pathian ih vancungmi pawl hmaiah cubangtuk in a phuang ve ding.

⁹Sikhalsehla mi hmaiah i hnongtu cu Milai Fapa in Pathian ih vancungmi pawl hmaiah a hnong ve ding.

¹⁰“Zokhal siseh Milai Fapa a simsiatu cu ngaihthiam an si pei; sikhalsehla Thlarau Thianghlim a simsiatu cu ngaihthiam a si lo pei.

¹¹“Sinakok ah siseh, ram uktu a si lole hotu bawi hmaiah siseh khiing dingih an lo hruai tikah ziangtinso ka ṭan ding ih ziangso ka ṭong ding tiah va helhkam hlah uh.

¹²Ziangahtile a cuih caan ah nan ṭong dingmi cu Thlarau Thianghlim in a lo sim ding a si,” tiah a ti.

¹³Misenpi lakih mi pakhat in, “Sayapa, ka pa ih in roh tami rothil in zem ve dingah ka u in sim sak aw,” tiah Jesuh kha a ti.

¹⁴Cutikah Jesuh in, “Ka rual, nan karlakih thuṭhentu si dingah le nan rothil zemsaktu dingah zo in so thu i pek?” tiah a let.

¹⁵Cule mi zapi hnenah cun, “Duhhamnak a phunphun kha ralring uhla fimkhur zetin um uh; ziangahtile mi pakhat ih nunnak taktak cu, ziangtluk milian a si hmanah, a thilri neihmi ahhin a um lo,” tiah a ti.

¹⁶Cuih hnuah Jesuh in hi tahṭhimnak hi a sim: “Voikhat ah milian pakhat a um ih a ram sung ihsin rawl tampi a suak.

¹⁷Cutikah a thinlung tein ‘Ka lo sungsuak rawl retnak ka nei nawn lo. Ziang ka tuah ah so a ṭhat ding?

¹⁸Hitiin ka tuah pei: Ka rawl-inn pawl ka bal pei ih tum deuh in ka sak pei. Cunah ka rawl le ka thilri hmuahhmuah ka ret pei.

¹⁹Cule keimah le keimah cu: Mi vannei pa! Kum tampi sung na ṭul dingmi thilri na nei zo. Na duhduh in nung huahho aw; ei aw, in awla nuam zetin nung aw, ka ti aw ding,’ tiah a ruat.

²⁰Sikhalsehla Pathian in a hnenah, ‘Mi-aa pa! Tuih zan rori-ah na nunnak hi a cem ding; cule na hrangih na khawlcia mi na thil hmuahhmuah hi zo in so a co ding?’ a ti,” tiah a sim.

²¹Cun Jesuh in, “Anmah ih hrangah thilri an khawl ih an lianzet naón Pathian mithmuh ah a lian lomi cu himi pa bangtuk an si,” tiah a netnak ah a sim.

²²Cuih hnuah Jesuh in dungthluntu pawl hnenah, “Cu a si ruangah nan ei dingmi rawl hrangah siseh, nan sinfen ding hnipuan hrangah siseh, donhar in um hlah uh, tiah ka lo sim.

²³Ziangahtile nunnak cu rawl hnakin a thupi sawn ih taksapum cu hnipuan hnakin a thupi sawn a si.

²⁴Tlangak khi zohhnik uh; annih in thlaici an tuh lo ih rawl khal an khawm fawn lo. Rawl-inn le cuam khal an nei lo. Asinain Pathian in a cawm hai. Nannih tla cu vate hnakin a let tampi in nan sunglawi sawn a si.

²⁵Nanmah lakah zotal in ei-in le sinfen thu a helhkamnak in a nunnak malte a sauter theitu nan um maw?

²⁶Cutluk thil fate hman nan tuah thei lo a si ahcun ziangah so thil dangdang thu cu nan helhkam duh rero?

²⁷Hramlak pangpar tla khi ziangvekin an ṭhang ti zohhnik uh: hna an ṭuan lo, sinfen an zaal fawn lo. Sikhalsehla thungai in ka lo sim: Siangpahrang Solomon ih lennak le sunlawinak hmuahhmuah hman in hi pangpar pakhat ih mawinak hi a tluk lo.

²⁸Tuihsun ah a um naón thaisun ahcun a um nawn lomi, meisa sungih paih-mi hramlak hrampi hman khi a thuamtu cu Pathian a si. Nannih tla cu a lo thuam sinsin lo ding maw si? Nan zumnak a mal tuk lawmmam!

²⁹“Ei ding le in ding thu lawng ruat le helhkam ringringin um hlah uh.

³⁰Ziangahtile leilung tlunih khawvel mi pawl in cubangtuk thil cu an ruah ringringmi a si. Nan Pa in hi bangtuk thil nan ṭul ti cu a thei.

³¹Curuangah nan Pa ih Uknak kha helhkam in hawl sawn uhla thil dang pawl cu a lo pe leh ding,” tiah a ti.

³²Tuurun tete tla, nan thinphang hlah uh; ziangahtile nan hnenah Uknak pek cu nan Pa ih lungawi zawng a si.

³³Nan neihmi thilri pawl zuar ṭheh uhla nan ngahmi tangka cu mifarah pawl ṭhen uh. A siat thei lomi tangka bawm nan hrangah ngaihtuah uhla vancung ah nan sumsaw pawl khawl uh. Cutawkah cun fifir in an dai thei lo ding ih a tlap thei fawn lo ruangah ziangtik khalah a hloral dah lo ding.

³⁴Ziangahtile nan sumsaw umnak ah nan thinlung khal a um ve ding,” tiah a ti.

³⁵Ziangbangtuk thil a ra thlen khalle ralring ciain um uhla nan mei-inn vangin timlaam ciain um uh.

³⁶Mopuai ihsin a ra kir dingmi an bawipa a hngaktu hnen-um pawl bangin ralring zetin um uh. An bawipa cu a rat ih sangka a king tikah hmakhatte ah sangka cu an ong ding.

³⁷An bawipa a ra kir tikah itthat loteih ralrinnak a neimi hnen-um pawl cu ziangtluk lungawiza so an si. Thungai in ka lo sim: a tim a tuah hnuah a toter ding ih amah rori in a tuamhlawm hai ding.

³⁸Zanṭim ih a ra kirah siseh, cuhnak tlai ih a kir khalah siseh, ralrinnak nei ih a ra hmuhmi pawl cu an hrangah ziangtluk lungawiza so a si!

³⁹Cule hihi ciing uh: inn neitu pa in fifir ratnak ding tikcu kha a theih cia ahcun a inn kha a bauhter hrimhrim lo ding.

⁴⁰Cuvekin nannih khal ralringte in um uh, ziangahtile a ra ding tiih nan zum lo laiah Milai Fapa cu a ra thleng ding a si,” a ti.

⁴¹Piter in, “Bawipa, hi tahṭhimnak hi kanmah ih hrangah na timi a si maw, asilole misenpi hrangah so?” tiah a sut.

⁴²Bawipa in, “Zoso rinsan tlak le a fimmi hnen-um cu a si? Rinsan tlak le a fimmi hnen-um cu a bawipa in a innpi kilkhawitu dingah le a dang hnen-um pawl kha a tikcu caan te ih an covo rawl pe dingah a ret dingmi hnen-um kha a si.

⁴³A bawipa innih a ra kir tikah hna a rak ṭuan rerotu hnen-um cu ziangtluk lungawiza so a si!

⁴⁴Thungai in ka lo sim: cuih hnen-um cu a bawipa in a thilri hmuahhmuah kilkhawitu-ah a ret ding.

⁴⁵Sikhalsehla cuih hnen-um in, ‘Ka bawipa cu a rei hrih ding,’ a tiih hnen-um dang nunau siseh mipa siseh a thawi vivo ih a ei a in ih a riit a bah ahcun,

⁴⁶cuih hnen-um in a ra ding ti a zum lo caan le a theih lo ni ah a bawipa cu a ra thleng ding. A bawipa in a satcip seksek ding ih[8] thulung lo le rintlak lo pawl lakah a re ding.

⁴⁷A bawipa in tuahter a duhmi hnaṭuan a thei naón tiimlaam a tuah lotu hnen-um cu nasa zetih vuak a tong ding.

⁴⁸Asinain a bawipa in tuahter a duhmi a thei lo naón thil pakhatkhat a tuahtu hnen-um cu vuak tlak a si khalle dimte deuh ih vuak a tong ding. Tampi a ngahtu hnen ihsin tampi dil sal a si ding. Tam ngaingai pek a si mi hnen ihsin tam ngaingai dil sal a si ve ko ding,” a ti.

⁴⁹Jesuh in, “Leilung tlunah hin meisa kangter dingah ka ra thleng; atu-ah hin alh thlang sehla ka va duh so!

⁵⁰Baptisma lak ding ka nei ih cumi tuah ṭheh a si hlan cu ka thinlung a baangzet.

⁵¹Leilung tlun ahhin remnak a run keng tiah maw si in ruat? A si lo, remnak si loin ṭhenṭheknak sawn ka run keng a si.

⁵²Atu thok ihsin innsungsaang pakhat ih mi panga a ummi pawl cu an ṭhen aw ding; pathum in a dang pahnih kha an engtai ding ih pahnih in pathum kha an engtai ve ding.

⁵³Pale in an fapa pawl an engtai ding ih fapa pawl in an pale pawl an engtai ve ding. Nule in an fanu pawl an engtai ding ih an fanu pawl in an nule pawl an engtai ve ding. Nile pawl in an vahle pawl an engtai ding ih an vahle pawl in an nile pawl khal an engtai ve ding,” a ti.

⁵⁴Jesuh in misenpi hnenah, “Nitlaknak lam ihsin khawdur a suah tikah hmakhatte ah ‘Ruah a sur ding,’ nan tiih a sur ngaingai.

⁵⁵Cule thlanglam ihsin thli a hran nan theih tikah ‘Thaw a sa ding,’ nan tiih a sa ngaingai.

⁵⁶Nannih titer awk thiam pawl! Van le leilung nan zoh ih ni khua ṭhat ding le siat ding nan sim thei! Cuti asilekhaw ziangah so tuih sanih thu-umzia nan theih thiam lo?” tiah a ti.

⁵⁷Ziangah so thil dik tuah dingah nan thinlung nan ṭhen cat thei lo?

⁵⁸Mi pakhat in a lo khiing ih zung a lo thlenpi tum a si ahcun zung a lo thlenpi ngah hlanah amah thawn remnak tuah dingah va zuam aw. Cuti na tuah lo ahcun thuṭhentu hmai tiang a lo dir ding ih thuṭhentu in palik kut ah a lo pe ding ih cuticun thawng ah thlak na si ding.

⁵⁹Fiangtein ka lo sim: na kuan dingmi a neta bik pia khat tiang na kuan ṭheh hlan lo cutawk ihsin na suak hrimhrim lo ding,” tiah a ti.