Read Falam Chin LUKA 13 Bible Online

LUKA 13 - Falam Chin bible

LUKA 13

¹Culai ahcun mi ṭhenkhat in Jesuh hnenah, Galilee mi pawl in Pathian hnenih thawinak an pek laifangah Pilat ih a thahmi pawl thu kha an sim.

²Jesuh in an hnenah, “Cuih Galilee mi pawl cutiih thah an si ruangah midang Galilee mi hnakin an sual sawn, tiah nan ruat maw si?

³An sual deuh cuang lo! Fiangtein ka lo sim: Nan sual nan sir ih nan nun daan nan ṭhin lo ahcun anmah vekin nan thi ṭheh ve ko ding.

⁴Siloam hmunih donhleisang a tluuk tikah minung hleiriat a nenthatmi pawl thu kha teh ziangtinso nan ruat? Cutiih an thih ruangah Jerusalem ih a ummi midang pawl hnakin an sual cuang a si ti a langter tiah nan ruat maw si?

⁵A si hrimhrim lo! Fiangtein ka lo sim: Nan sual nan sir ih nan nun daan nan thleng lo ahcun anmah vekin nan thi ṭheh ve ding,” tiah a ti.

⁶Jesuh in an hnenah hiti in tahṭhimnak a sim: “Hlanlaiah mi pakhat in a hmuan sungah theipi kung pakhat a cing. A rah le rah lo a va zoh ṭheu ih a rah a hmu dah lo.

⁷Curuangah hmuan kiltu hnenah, ‘Zohhnik, hi theipi hi! Kum thum tiang rori a rah maw rah lo, tiah ka ra veh ṭheu naón a rah zianghman ka hmu lo. Hau mai aw! Ziangah so leiram ṭha a ei rero ding?’ a ti.

⁸Sikhalsehla hmuan kiltu in ‘Bawipa, kum khatte cu zuah hrih ko aw! A kimvel in leilung ka lai ding ih dawm ka burh hrih ding.

⁹Cule a hnakum ah rah a rah asile lungawiza a si ding; a rah thotho lo asile hauter leh siseh,’ a ti,” tiah a sim.

¹⁰Voikhat ah Sabbath ni ah Jesuh in sinakok ah thu a zirh.

¹¹Cutawkah khawsia ih polhmi nunau pakhat a um. Cuih khawsia cun kum hleiriat sung a ngorter; a el tla a kuun ṭheh ih dingtein a um thei hrimhrim lo.

¹²Cunu cu Jesuh in a hmuh tikah a hei auh ih, “Nunau nu, na natnak ihsin na luat zo!” tiah a ti.

¹³A parah a kut a suang ih hmakhatte ah dingtein a um thei ih Pathian kha a thangṭhat.

¹⁴Sinakok kiltu upa pakhat cu Sabbath ni ah Jesuh in mi a damter ruangah a thin a heng ih mipi hnenah a ṭong ih, “Hnaṭuannak dingah ni ni ruk a um; cuih ni ruk sungah cun ra uhla damter aw uh; Sabbath ni ahcun si hlahseh,” tiah a ti.

¹⁵Cutikah Bawipa in, “Titer aw pawl! Zokhal si uhla Sabbath ni ah nan caw le nan laak pawl an hri nan phoih ih tidai innak ah nan fehpi ciar a si.

¹⁶Atu hitawk ah hin Abraham tesinfa Satan in kum hleiriat sung ṭemhrennak a tuartu a um; anih hi a ṭemhrennak ihsin Sabbath ni ah luatter a si lo ding maw?” tiah a ti.

¹⁷A thulehnak cun a ral pawl cu an ningzak koin a tuah; cule mipi pawl cu khawruahhar thil tampi a tuah ruangah an lung a awi ngaingai.

¹⁸Jesuh in, “Pathian Uknak cu ziang bangtuk so a si? Ziang thawn so ka ṭhim ding?

¹⁹Mi pakhat in anṭam ci a lak ih a lo sungih a vorhmi bangtuk a si. A vorhmi cu a kho, a ṭhang ih thingkung ah a cang ih a ṭeek parah vate tla in bu an tuah a si,” tiah a sim.

²⁰Cule Jesuh in, “Pathian Uknak cu ziang thawn so ka tahṭhim ding?

²¹Nunau pakhat in thilnu malte a lak ih sangphut bawm khat sungah a phulh ih sangphut cu a zatein a thoter ṭhehtu thilnu bangtuk cu a si,” tiah a ti.

²²Jesuh cu Jerusalem lam pan ih a feh laiah khua pakhat hnu pakhat pal phahin thu a zirh vivo.

²³Mi pakhat in, “Bawipa, runnak a ngahtu hi mi malte lawng maw an si ding?” tiah a sut. Jesuh cun hiti in a let.

²⁴“A fiakmi sangka ihsin luh zuam uh; ziangahtile mi tampi in cuih sung luh cu an zuam rero ding naón an ti thei lo ding.

²⁵Inn neitu bawi a pok ding ih sangka cu a khar ding; cule a lengah dingin sangka cu nan king ding ih ‘Bawipa, sangka in rak on hram aw,’ nan ti khalle ‘Khuitawk ihsin nan rat ka thei lo,’ a lo ti ding.

²⁶Cule nannih in, ‘Nangmah thawn rawl kan ei tlang ih tidai khal kan in tlang a si kha! Kan khawsungah tla thu in zirh rero kha!’ tiah nan ti ding.

²⁷Sikhalsehla anih cun ‘Khuitawk ihsin a rami nan si ka thei lo. Nannih miṭha lo pawl, ka hnen ihsin tlan ṭheh uh,’ tiah a lo ti ding.

²⁸Nannih pawl cu a lengah hlonhlo nan si ding ih Abraham, Isaak le Jakob le profet hmuahhmuah tla cu Pathian Uknak sungih an um kha nan hmu lai ding; cutikah nannih cu nan ṭap nan raak ding ih nan hacang nan rial ciamco ding a si.

²⁹Nisuahlam le nitlaklam in siseh, saklam le thlanglam khal in siseh, mi an ra ding ih Pathian Uknak rawl ei puai ah an tokhawm ding.

³⁰Cutikah cun atu-ih a neta bik hi hmaisa bik an si ding ih hmaisa bik hi neta bik an si leh ding,” tiah a ti.

³¹Cuih caanah Farasi mi ṭhenkhat pawl Jesuh hnenah an ra ih, “Herod in thah a lo duh ruangah hitawk in suak awla hmun dangah feh aw,” tiah an ti.

³²Jesuh in an hnenah, “Va feh uhla cuih cinghnia pa cu ‘Tuihsun le thaisun cu khawsia pawl ka dawisuak pei ih mina pawl ka damter lai ding. Cule a ni thumnak ah ka hnaṭuan cu ka ṭheh ding a ti,’ tiah va sim uh.

³³Curuangah tuihsun, thaisun le tipsun cu ka feh vivo hrih ko ding. Jerusalem khawsung siar lo hmun dangah profet thah ding cu a cang lo a si.

³⁴“Maw Jerusalem, Jerusalem! Profet pawl na that ih na hnenah Pathian in palai a tirhthlahmi pawl tla lungto in na deng. Arpi in a thla hnuai ah a faate pawl a huh vekin na minung pawl cu voi tampi ka kut in hum ka duh naón in sen dah lo!

³⁵Curuangah nan Biakinn cu hmun ṭhing ah a cang ding. Fiangtein ka lo sim: ‘Bawipa ih hminin a rami cu Pathian in thlawsuah hram seh,’ tiah nan sim thei caan a thlen hlan cu ka hmel in hmu nawn lo ding a si,” tiah a ti.