Read Falam Chin LUKA 14 Bible Online

LUKA 14 - Falam Chin bible

LUKA 14

¹Voikhat cu Sabbath ni ah Jesuh cu Farasi hotu lakih pakhat ih inn ah rawl zawh dingin a feh; cule misenpi cun ṭhatein an rak thlir ringring.

²Mi pakhat a kut le a ke a thling thluhmi mina cu Jesuh hnenah a ra ih,

³Jesuh in Daanthiam pawl le Farasi mi pawl kha, “Kan Daan in Sabbath ni ah mina damter ding a on maw on lo so?” tiah a sut.

⁴Sikhalsehla annih cun zianghman an ṭong lo. Jesuh in mina pa cu a hruai ih a damter ih a thlah.

⁵Cule Jesuh in an hnenah, “Nanmah lakah mi pakhat cu a fapa maw a caw si maw Sabbath ni ah tikhur sungah tla pang sehla Sabbath ni a si ruangah suah loin maw nan um ding?” tiah a sut.

⁶Hi thu-ah zianghman an sawn thei lo.

⁷Rawl zawhnak hmunah mi ṭhenkhat pawl in tonak ṭha bik an hril ṭheu kha Jesuh in a hmuh ruangah hi tahṭhimnak hi an zate hnenah a sim:

⁸“Mopuai ah an lo kawh asile tonak ṭha bik cuh hlah uh. Nangmah hnakih mi upa sawn an sawm khal a si thei;

⁹nan pahnih a lo sawmtu innteek pa in na hnenah ra tahratin, ‘Na tonak hi kian aw,’ tiah a lo tiih hmun niam bikih na vung to sal tikah cun na ning a zakzet ding.

¹⁰Cuhnak cun an lo sawm tikah hmun niam bikah va to awla a lo sawmtu innteek pa a ra ding ih, ‘Ka rual, tonak ṭha deuhah hin hung to aw,’ tiah a lo ti ding. Cutikah sawmmi misenpi hmaiah mithmaiṭha na ngah ding.

¹¹Ziangahtile amah le amah a uang awtu cu mi nauta ah tuah a si ding ih, lungnem tangdor ih a umtu cu hmaizahnak ngahtu upa-ah a cang ding,” tiah a ti.

¹²Cule Jesuh in innteek pa hnenah cun, “Thaithawh siseh zanriah siseh, eitlang dingih mi na sawm tikah na rualpi pawl, na unau pawl, a si lole na sungkhat pawl le na innhnen milian pawl kha va sawm hlah; ziangahtile annih pawl cun nangmah kha an lo sawm thei leh ve ding ih na thil tuahmi kha an lo samsaal thei ding.

¹³Sikhalsehla rawl na daar tikah farah zonzai pawl, a zengmi pawl, ke-awl pawl le mitcaw pawl kha va sawm hai aw;

¹⁴annih pawl cun an lo samsaal thei lo ding hrangah malsawm dongtu na si ding. Miṭha pawl thihnak ihsin an thawhsal ni ah Pathian in a lo samsaal leh ding a si,” tiah a ti.

¹⁵Cuih thu cu rawl ei-nak cabuai ih an sawm vemi pakhat in a theih tikah Jesuh hnenah cun, “Pathian Uknak sung rawldarnak puai ih a telmi pawl cu an lung a va awi ding so!” tiah a ti.

¹⁶Jesuh in cupa hnenah cun, “Voikhat ah mi pakhat a um ih rawl daarnak puai tumpi a tuah ih mi tampi a sawm.

¹⁷Rawl ei caan a cut tikah a sawm ciami pawl hnenah a hnen-um a thlah. ‘Ra thlang uh, ziang hmuahhmuah timtuah a si zo,’ tiah a ti.

¹⁸Sikhalsehla pakhat hnu pakhat ‘Ka man lo,’ tiin puhmawh ding an hawl fingfing. Pakhat pa in ‘Lo pakhat ka lei ih ka va zohta a ṭul a si. I rak ngaithiam aw,’ tiah hnen-um pa cu a ti.

¹⁹A dang pakhat pa in ‘Cawcang khuah nga ka lei ih atu-ah an ṭha maw ṭha lo ka hniksak ding. I rak ngaithiam hram aw,’ a ti ve.

²⁰A dang pakhat pa in ‘Tubaite ah nupi ka ṭhi ngelcel ih ka ra thei lo ding,’ a ti lala.

²¹Hnen-um pa cu a kir ih cuih thu pawl cu a bawipa ih hnenah a sim ṭheh. A bawipa cu a ai a thok ih a hnen-um pa hnenah cun, ‘Zamrang zetin khawsung lamzinpi le innlak zinte ah va feh awla mi farah, mi zonzai, kutzeng kezeng, mitcaw le ke-awl pawl rak hruai aw,’ tiah a fial.

²²Rei lote-ah hnen-um pa cun ‘Bawipa, na thu pekmi vekin ka tuah ṭheh zo; asinain umnak tampi a lawng lai,’ tiah a ti.

²³Curuangah a bawipa cun, ‘Khua pakhat le pakhat karlak lamzinpi le lamzinte hmuahhmuah ah va feh awla ka inn a khah ṭheh hlan lo mi rak hruai hai aw.

²⁴Fiangtein ka lo sim: Ka rak sawm ciami pawl sungin zohman in ka zanriah daarmi an tep lo pei,’ a ti,” tiah a sim.

²⁵Voikhat ah mi tamzet in Jesuh cu an thlun vivo laiah an lamah Jesuh cu a her ih,

²⁶“Zokhal siseh ka hnenah a ra ih a nu le pa, a nupi le faate pawl, a unau le a farnu pawl le amah le amah khal keimah hnakih a duh deuh a si ahcun ka dungthluntu a si thei lo ding.

²⁷Zokhal sisehla amah ih thinglamtah phur tahratin ka dungih i thlun lotu cu ka dungthluntu a si thei lo ding.

²⁸“Nanmah lakah pakhatkhat in inn saangpi sak a tum a si ahcun hmaisabik ah tote ciamciam in a inn sak ṭhehnak dingah tangka kimtein a neih le neih lo kha a tuak ṭhehta a si lo maw?

²⁹Cutiin a tuak ṭheh hmaisa lo a si ahcun a hnaṭuan dingmi cu a thok ngah hnu-ah sak ṭheh loin a taang ding ih a rak hmutu hmuahhmuah in an hnihsan ding.

³⁰‘A hei thok ve naón a ṭheh thei si lo!’ an ti ding.

³¹“Ralkap thawnghra a neimi siangpahrang pakhat in siangpahrang dang pakhat ralkap thawngkul thawn amah do dingih a rami kha, a do tum a si ahcun hmaisabik ah to ciamciamin cuih siangpahrang dang do theinak ding thazaang a neih le neih lo a ruat hmaisa a ṭul a si.

³²Do theinak thazaang a neih lo a si ahcun cuih siangpahrang dang hnenah, lam hlapi ih a um laiah, remnak tuah dingah a palai pawl a thlah ding a si.

³³Cuvek thotho in nannih tla nan neihmi hmuahhmuah nan tanta lo ahcun keimah ih dungthluntu nan si thei lo pei,” tiah Jesuh in a sim.

³⁴“Cite cu a ṭhazet, asinain a alnak a ziam asile alter sal ngaihnak a um nawn lo.

³⁵Leilung hrangah san a tlai lo ih dawm hrang hmanah a ṭhahnem nawn lo. A lakih hlonhlo ding men a si thlang. Hi thu hi theihnak hna a neitu in thei uh,” tiah Jesuh in a ti.