Read Falam Chin LUKA 18 Bible Online

LUKA 18 - Falam Chin bible

LUKA 18

¹Jesuh in a dungthlun pawl kha thinnau loih thla an cam ringring a ṭulzia zirh duh ah tahṭhimnak pakhat a sim.

²An hnenah cun, “Khua pakhat ah Pathian a ṭih loih milai khal a hmaizah lotu thuṭhentu pakhat a um.

³Cuih khua thotho ah nuhmei nu pakhat a um ih nuhmei nu cun, ‘I raltu thawn thu kan neihmi ahhin i bawm hram aw,’ tiah atu le atu a ra dil ringring.

⁴Thuṭhentu in cuih thu cu caan reipi relsak duh loin a um; asinain a netabik ahcun ‘Pathian ka ṭih lo ih mi khal ka hmaizah lo naón,

⁵hi nuhmei nu in i hnaihnok ringring ruangah a thu cu ka relsak pei. Ka relsak lo a si ahcun catbang loin a ra ringring ding ih a netnak ahcun keimah lehlam thinlung baangin i tuah ding,’ tiah a ruat,” tiah a sim.

⁶Cule an Bawipa cun an hnenah, “Hi a dik lomi thuṭhentu ih ṭongkam cu nan thei!

⁷Cuti a si ahcun Pathian in amah ih bomnak dilin sun zan a au rerotu a minung pawl cu an thu ṭhensak loin a um pei maw? Anmah bawm dingah a khul a fung pei maw?

⁸Fiangtein ka lo sim: zamrang zetin a relsak ding ih thuding a coter ding a si. Sikhalsehla Milai Fapa hi leilungih a rat tikah zumnak neitu a hmu pei maw?” tiah a ti.

⁹Jesuh in hi tahṭhimnak cu, miṭha ngaingai ih a ruat awmi le midang hmuahhmuah a hmuhsuamtu pawl hnenah a simmi a si.

¹⁰“Voikhat ah mi pahnih cu thlacam dingah Biakinn ah an feh. Pakhat cu Farasi a si ih pakhat cu siahkhongtu a si.

¹¹Farasi pa cu hlat nawnah amah lawng a ding ih hiti in thla a cam. ‘Maw Pathian, kei cu midang vekin ka duhham lo, thuphan ka per lo ih ṭaangṭawm sualnak tla ka tuah lo ruangah ka lo thangṭhat. Khi tawkih a ummi siahkhongtu vek ka si lo ruangah ka lo lawm.

¹²Zarhkhat ah voihnih rawl ka ul, ka ngahmi hmuahhmuah sungin ṭhenhra ih ṭhenkhat ka lo pek,’ a ti.

¹³Sikhalsehla siahkhongtu pa cu a hlat nawn ah a ding ih vanlam hman hoih ngam loin a ṭaang a cuum aw ih ‘Maw Pathian, i zaangfah hram aw; kei cu misual ka si,’ tiah a ti.

¹⁴Fiangtein ka lo sim: Farasi mi pa si loin siahkhongtu pa sawn kha inn ih a tlun tikah Pathian hmaiah thuding cotu a si. Ziangahtile zokhal amah le amah a khaisang awtu cu namthlak a si ding ih tangdortu cu khaisan a si ding,” tiah a ti.

¹⁵Mi hrekkhat in an faate pawl ih parah Jesuh in a kut suangseh ti duh ah Jesuh hnenah an faate pawl cu an rak hruai. Cutiih an tuah cu a dungthluntu pawl in an hmuh tikah an kawk.

¹⁶Asinain Jesuh in nauhak pawl cu a ko ih, “Nauhak cu ka hnenah ra hai seh, dawn hlah uh; ziangahtile Pathian Uknak cu hi bangtuk mi pawl ih ta a si.

¹⁷Hihi ciing ṭha uh! Zokhal Pathian Uknak kha nauhak pawl ih an cohlan bangtuk in a cohlang lotu cu cuih Uknak sungah an lut thei dah lo ding,” tiah a ti.

¹⁸Judah mi hotu pakhat in Jesuh cu, “Zirhtu ṭha, kumkhua nunnak co dingah ziangso ka tuah ding?” tiah a sut.

¹⁹Jesuh in, “Ziangah so miṭha, tiah i ti? Pathian pakhat siarlo miṭha dang zohman an um lo.

²⁰Thukham pawl na thei ko a si lo maw: ṭaangṭawm sualnak tuah hlah; lai that hlah; ruk ru hlah; thuphan per hlah; na nu le na pa kha upat aw,’ ti tla an si kha!” tiah a let.

²¹Cupa in, “Ka seentet lai ihsin hi thukam pawl hicu ka thlun thluh zo a si,” tiah a ti.

²²Cumi cu Jesuh in a theih tikah a hnenah cun, “Na tuah ṭulmi pakhat a um lai. Na neihmi hmuahhmuah zuar ṭheh awla na ngahmi tangka kha mifarah pawl va pe aw; cule vancung ah sumsaw na nei ding. Cuih hnuah ra awla i thlun aw,” tiah a ti.

²³Asinain cuih thu cu cupa in a theih tikah a riah a sia ngaingai, ziangahtile amah cu milianzet a si.

²⁴Jesuh in a riahsiat kha a hmuh tikah hiti in a sim: “Milian hrangah cun Pathian Uknak sungih luh cu ziangtluk in so a har!

²⁵Milian pakhat Pathian Uknak sungih luh hnakin kalauk pakhat ṭhim hnakua sungih luh khi a ol sawn a si,” tiah a ti.

²⁶Cumi cu mipi in an theih tikah, “Cuti asile zoso runmi a si thei ding?” tiah an sut.

²⁷Jesuh in, “Minung hrangih a cang thei lo timi hi Pathian hrangah cun a cang thei a si,” tiah a ti.

²⁸Cutikah Piter in, “Zohhnik! Kan innsang taanta in nangmah kan lo thlun hi!” tiah a ti.

²⁹Jesuh in, “Asi, na simmi a dik a si; fiangtein ka lo sim: zokhal a inn siseh, a nupi siseh, a unau siseh, a nu le a pa siseh, a faate pawl siseh, Pathian Uknak hrangah a tlansan a si ahcun,

³⁰tuih san ahhin a let tampiin ngahmi a nei ding ih a ra dingmi san ah kumkhua nunnak a ngah ding,” tiah a sim.

³¹Jesuh in a dungthlun hleihnih pawl kha hmun dangte ah a fehpi ih an hnenah, “Ngaihnik uh! Jerusalem ah kan feh ding ih Milai Fapa ih thu profet pawl ih an rak simmi hmuahhmuah kha a kim ding.

³²Zentail mi pawl ih kut ah thlenpi a si ding ih annih in hnihsuahsainak ah an hmang ding, an dekcok ding ih an cil an phui ding.

³³An vuak ding ih an that ding, asinain ni thumnak ah a tho sal ding,” tiah a ti.

³⁴Sikhalsehla cupawl cu a dungthluntu pawl cun an thei thei lo; a ṭong ih sullam kha thuhsak a si ruangah Jesuh ih ṭongmi kha a tican an thei lo.

³⁵Jesuh cu Jerikho khua lamah a feh ih a thlen zik zawng ah mitcaw pakhat cu lamzin kiangah kutdawh in a rak to.

³⁶A kiangin mi tampi an lan kha a theih tikah, “Ziang so a si?” tiah a rak sut.

³⁷Annih in, “Nazareth mi Jesuh a ra a si,” tiah an ti.

³⁸Cupa cun, “Maw David Fapa Jesuh, i zaangfah hram aw,” tiah a au ciamco.

³⁹Hmaiih a ummi misenpi pawl in an kawk ih daiteih um dingah an sim. Sikhalsehla anih cun, “David Fapa, i zaangfah hrawm aw,” tiah a au sinsin.

⁴⁰Cuhrangah Jesuh cu a ding ih, “Mitcaw pa kha hinah rak hruai uh,” tiah thu a pek. A hnenih a ra thlen tikah Jesuh in,

⁴¹“Ziang tisak dingso na duh?” tiah a sut. “Bawipa, khua hmu thei sal ningla ka duh,” a ti.

⁴²Jesuh in a hnenah, “Cuti asile khua hmu aw! Na zumnak in a lo damter zo,” tiah a ti.

⁴³Hmakhatteah khua a hmu thei ih Jesuh kha a thlun ih Pathian a thangṭhat vivo. Cumi cu misenpi in an hmuh tikah an zatein Pathian kha an thangṭhat.