Read Falam Chin LUKA 19 Bible Online

LUKA 19 - Falam Chin bible

LUKA 19

¹Jesuh cu Jerikho khua a thleng ih khawsung in a feh vivo.

²Cutawkah siahkhongtu upa pakhat, a lianzetmi, Zakia timi a um.

³Jesuh kha zo a si ti hmuh a duhzet naón amah cu mi niamte a si ih tlunah mi an tamzet ruangah a hmu thei hrimhrim lo.

⁴Curuangah mipi hmaiah a tlan ih cutawk lamih a feh vivotu Jesuh hmuh duh ah theipi kung parah a kai.

⁵Jesuh cutawk hmun a thlen tikah a tlunlam a hun zoh ih, “Zakia, zamrangin rung ṭum aw, tuihsun na inn ah ka tlung ding,” tiah a ti.

⁶Zakia cu zamrangin a ṭum ih Jesuh kha a inn ah lungawi zetin a tlunter.

⁷Cumi a hmutu hmuahhmuah cu an phunzai hmurhmo ih, “Hi pa hi misual pa ih inn ah a tlung ual!” tiah an ti.

⁸Zakia cu a ding ih Bawipa ih hnenah cun, “Bawipa, i ngaihnik! Ka neihmi ih hrek cu mifarah ka pe ding; cule ka bummi an um ahcun a let li in ka sam sal ding,” tiah a ti.

⁹Jesuh in a hnenah, “Tuih sun hi pa ih inn ah rundamnak a ra thleng zo, ziangahtile hi pakhal hi Abraham ih tesinfa a si ve.

¹⁰Milai Fapa cu a hlomi hawl ding le rundam dingah a ra,” tiah a ti.

¹¹Cutiih a simmi a rak ngaitu mipi hnenah Jesuh in tahṭhimnak pakhat a sim. Amah cu Jerusalem a thleng zik thlang ih mipi cun Pathian Uknak a ra thleng zik thlang tiah an ruat.

¹²Curuangah hiti in a sim: “Voikhat ah bawi pakhat a um ih amah cu ram hlapi ah feh tahratin siangpahrang ih canter a si hnuah innih ra tlun sal a tum.

¹³Cutiih a feh hlanah a hnen-um pahra kha a ko ih sui tangka fang khat fingfing a pek hnuah, ‘Himi thawn sum rak tuah hnik uh; ka ra kir tikah ziangzat nan ngah, kan zohhnik pei,’ tiah a ti.

¹⁴A ram sungmi pawl in cuih an bawipa cu an hua ih curuangah ‘Hi pa hi cu kan siangpahrang dingah kan duh lo,’ tiah a simtu dingah palai an thlah.

¹⁵“Cupa cu siangpahrang a can hnuah a ra tlung sal. A thlen vete in sum ziangzat an ngah ti theih duh ah a hnen-um pahra cu a hnenah a ko.

¹⁶Pakhat pa cu a ra ih, ‘Bawipa, sui tangka fang khat i pekmi in sui tangka fang hra a miat ka ngah,’ tiah a ra ti.

¹⁷A bawipa in, ‘A ṭha, nang hi hnen-um ṭha na si. Thil fate parih rintlak na si ruangah khawpi pahra uktu-ah ka lo re ding,’ tiah a ti.

¹⁸Pahnihnak pa a ra ih, ‘Bawipa, sui tangka fang khat i pekmi in fang nga a miat ka ngah,’ tiah a ti.

¹⁹Cupa cu ‘Khawpi panga uktu-ah ka lo ret ding,’ tiah a ti.

²⁰“A dang hnen-um pakhat a ra ih, ‘Bawipa, hinah na sui tangka cu a um. Pavua in ka tuam ih ka ret.

²¹Nang cu mi tifekfek na si ruangah ka lo ṭih. Na ta a si lomi tla na lak ṭheu ih thlaici na vorh lomi khal na khawm ṭheu,’ tiah a ti.

²²Cutikah a bawipa in, ‘Hnen-um ṭha lo! Nangmah hnonnak dingah hin nangmah ih ṭong lala ka hmang ding! Mi tifekfek ka si cu na thei ih ka ta a si lomi tla ka lak ih ka vorh lomi khal ka khawm cu na thei.

²³Cuti asile ziangah so ka tangka cu tangka retnak zung ah na rak ret lo? Rak ret cila ka ra kir sal tikah tangka ṭhang thawn ka ngah ding a sisi!’ tiah a ti.

²⁴Cule cutawkih a dingmi pawl hnenah, ‘A sui tangka cu la uhla sui tangka fang hra a neitu hnen-um hnenah pe uh,’ tiah a ti.

²⁵Asinain annih in, ‘Bawipa, anih cun fang hra a nei zo si!’ an ti.

²⁶An bawipa cun, ‘Fiangtein ka lo sim: thil a neitu hnenah a dang khal belh a si ding; asinain thil a nei lotu hnen ihsin a neihsun malte hman kha laksak hrih a si ding.

²⁷Cun an siangpahrang dingih i duh lotu ka ral pawl cu hinah ratpi uh la ka mithmuh ah hin that uh,’ a ti,” tiah Jesuh in a sim.

²⁸Jesuh in hi thu a sim hnuah an hmaiah Jerusalem ah a feh.

²⁹Cule Olif tlang ih Bethphage le Bethani khua kiang a thlen tikah a hmai ah a dungthluntu pahnih kha a thlah ih,

³⁰hiti in thu a cah. “Nan hmaiih a ummi khawsungah khin va lut uhla zohman ih an to dah hrih lomi laak note pakhat hri in an khihmi kha nan hmu ding. A hri phoih uhla hinah rak hruai uh.

³¹Zokhal in ziangah so nan phoih, tiah an lo sut asile Bawipa in a hai tiah va sim uh,” a ti.

³²An va feh ih Jesuh in a sim vek cekci-in ziang hmuahhmuah cu an hmu.

³³Laak note cu an phoih rero laiah a neitu pawl in, “Ziangah so nan phoih?” tiah an ti.

³⁴Annih in, “Bawipa in a hai,” tiah an let.

³⁵Cule laak cu Jesuh hnenah an hei hruai. Cun laak parah cun an puan an dam ih Jesuh cu an toter.

³⁶Laak par cun a feh ih a fehnak lamzin ahcun mipi in an puan an phah vivo.

³⁷Jerusalem khua kiang lamzin Olif Tlang ihsin a vung suhnak zawn an thlen tikah a thluntu miburpi pawl cun Pathian an thangṭhat ih, thil mak zetzet tampi an hmuh ruangah cun an aw neih patawp in an au ciamco.

³⁸“Bawipaói hmin in a rami siangpahrang parah Pathian thlawsuahnak um ko seh! Van ah daihnak um sehla Pathian hnenah sunlawinak cu um ko seh!” tiah an ti.

³⁹Cule miburpi lakih a ummi Farasi ṭhenkhat pawl in Jesuh cu, “Sayapa, na dungthlun pawl hi daiteón um hai seh, sim aw!” tiah an ti.

⁴⁰Jesuh in, “Fiangtein ka lo sim: Annih pawl daiteih an um asile hi lungto pawl hi an hung au ciamco ding a si,” tiah a ti.

⁴¹Jerusalem khawpi cu a hei naih vivo ih a hmuh ngah tikah Jesuh cu a ṭap:

⁴²“Tuihsun ah hin daihnak hrangah ziangso a ṭul, tihi thei thei cila maw! Asinain cucu na hmuh thei lo dingin thuh a si!

⁴³Nan ral pawl in an lo kulh ṭheh ding ih an lo kham ṭhehnak le khuazakip in an lo fuuknak caan a ra thleng ding.

⁴⁴Nangmah siseh, na phar dawlmi sungih a ummi na minung pawl siseh, an that ṭheh ding. Nangmah rundam dingih Pathian a rat tikcu na theih lo ruangah lungto pakhat hman suang aw-in a taangmi an um lo ding a si!” tiah a ti.

⁴⁵Cun Jesuh cu Biakinn sungah a feh ih thil zuartu pawl kha a dawi ṭheh.

⁴⁶“Ca Thianghlim sungah Pathian in ka Biakinn cu thlacamnak inn tiah kawh a si ding a ti. Asinain nannih cun fifir pawl relhnak kua ah nan canter!” tiah a kawk hai.

⁴⁷Nitinte in Jesuh cun Biakinn sungah thu a zirh. Puithiam upa pawl, Daanthiam pawl le hotu pawl in Jesuh cu thah an duh.

⁴⁸Asinain an thah theinak ding lamzin an hawl thei lo, ziangahtile mi hmuahhmuah in a thu simmi cu ṭongfang pakhat hman hrelh loin ngai an duh.