Read Falam Chin LUKA 23 Bible Online

LUKA 23 - Falam Chin bible

LUKA 23

¹An zatein an pok ih Jesuh cu Pilat hmaiah an hruai.

²Cutawkah cun sual an puh ih, “Hi pa hin kan misenpi a hruai sual ih kan kai a si; Rom Siangpahrang hnenah ngunkhuai nan pe lo ding, tiah a sim ih, ‘Messiah ka si, Siangpahrang ka si,’ a ti,” tiah an ti.

³Pilat in, “Judah siangpahrang na si maw?” tiah a sut. Jesuh in, “Nangmah in na sim zo!” tiah a ti.

⁴Cule Pilat in puithiam upa le misenpi hnenah cun, “Himi pa hi a sualnak ka hmu lo,” a ti.

⁵Asinain an ṭangṭha sinsin ih, “A thu zirhnak ruangah Judea peng pumpi-ah hnaihnawhnak a khat. Galilee in a thawh ih atu hitawk a thleng zo,” tiah an ti.

⁶Pilat in cumi cu a theih tikah, “Hi pa hi Galilee mi a si maw?” tiah a sut.

⁷Pilat in Jesuh cu Herod ih ukmi ram sungmi a si ti kha a theih tikah Herod hnenah Jesuh cu a kuat. Culai fangah Herod cu Jerusalem khawsungah a rak um ngelcel.

⁸Herod in Jesuh kha a hmuh tikah a lung a awi ngaingai, ziangahtile a thu kha a thei ringring ṭheu ih hmuh a duhnak a rei zet zo. Jesuh ih a tuahmi hmuhsaknak kha hmu ve sehla a saduhthah a si.

⁹Curuangah Herod in Jesuh kha thu tampi a sut, asinain Jesuh cun kam khat hman a let lo.

¹⁰Puithiam upa pawl le Daanthiam pawl cu hmailamah an ra suak ih Jesuh cu nasazet in sual an puh.

¹¹Herod le a ralkap pawl in Jesuh cu hnihsuahsainak ah an hmang ih an dekcok. Cule puan mawizet an sinter ih Pilat hnenah an kuat sal.

¹²A cuih ni rori-ah cun Herod le Pilat cu rualpi ṭha ah an cang; cuih hlanah cun a hua aw zetmi an si.

¹³Pilat in puithiam upa pawl, hotu pawl le mipi pawl cu a kokhawm ih,

¹⁴an hnenah cun, “Hi pa hi ka hnenah nan rak hruai ih misenpi a hruai sual a si, tiah nan ti. Asinain hitawk nan mithmuh ah ka zingzoi naón sual nan puh mi hmuahhmuah ahhin a sualnak zianghman ka hmu lo.

¹⁵Herod khal in a sualnak a hmuh lo ruangah ka hnenih a rak kuat salnak a si. Thihnak tlak ih a tuahmi thil pakhat hman a um lo.

¹⁶Curuangah ka vuak pei ih ka thlah pei,” tiah a ti.

¹⁷(Lantak Puai tuah tinte in an hrangah Pilat in thawngtla pakhat a thlah ṭheu.)[14]

¹⁸Pilat ih ṭong an theih tikah misenpi cu an au ciammam ih, “Amah that aw! Barabbas in thlahsak sawn aw!” tiah an ti.

¹⁹(Barabbas cu khawpi sungah buainak a suahpitu le mithat a si ruangah thawngih an thlakmi a si.)

²⁰Pilat in Jesuh cu luatter a duh ruangah misenpi hnenah thu a sim sal.

²¹Sikhalsehla annih cun, “Thinglamtah ah that aw! Thinglamtah ah that aw!” tiah an au thotho.

²²Pilat cun voithumnak tiang a sim sal ih, “Ziang sualnak so a tuah? Thihnak tlak ih a tuahmi sualnak ka hmu hrimhrim lo. Ka vuak ding ih ka thlah ding,” tiah a ti.

²³Sikhalsehla an aw neih patawp in an au ih Jesuh cu thah ding hrimhrim a si, tiih an au sinsin ruangah a netnak ahcun an au-nak in a neh.

²⁴Curuangah an dil vekin Pilat in Jesuh cu thah dingin a relcat.

²⁵Misenpi in suak seh tiih an duh mipa, thubuai ruang le mi thah ruangih thawngih an thlak mipa cu Pilat cun a suah; cule misenpi saduhthah vekin Jesuh cu an duhduh ih tuah dingah an kut ah a pek.

²⁶Ralkap pawl in Jesuh cu an hruai ih an feh laiah cun Sairin khua mi Simon, khawte lam ihsin khawpiih a rami pa an tong. Cupa cu an kai, thinglamtah an putter ih Jesuh dungin an thlunter.

²⁷Mi tampi in Jesuh an hruaimi cu an thlun ih cu lakah an ṭaang cuum in a raak kio rerotu nunau ṭhenkhat an um.

²⁸Cule Jesuh cun dunglet a hoih ih an hnenah, “Maw Jerusalem nunau pawl, ka hrangah cun ṭap hlah uh; nanmah ih hrang le nan faate pawl hrangah ṭap sawn uh.

²⁹Ziangahtile ‘Naute a nei dah lomi, fa a vun dah lomi le voikhat hman naute pawhte a fawh dah lomi nunau pawl hi an van a va ṭha so!’ tiih an ti caan a thleng ding.

³⁰Cuih caan cu mi in tlang sangpi hnenah ‘In run nen aw,’ tiin le mual hnenah ‘In run khuh aw,’ tiih an ti caan a si ding.

³¹Ziangahtile thing a hrin lai hmanah hi bangtuk thil an tuah a si ahcun thing a ro tik sinsin ahcun ziang a bang pei maw?” tiah a ti.

³²Jesuh thawn hmun khatih thah dingah misual pahnih khal an hruai ve.

³³“Luruh,” an timi hmun an thlen tikah cutawk hmunah cun Jesuh cu thinglamtah parah an thlai ih misual pahnih khal cu a vorhlam ah pakhat, a kehlam ah pakhat an thlai ve.

³⁴Jesuh in, “Ka pa, an sualnak run ngaithiam aw. Ziang kan tuah ti an thei lo,” tiah a ti.[15] Cule amah a thattu pawl cun camcawhfung zuukin a hnipuan cu an zem aw.

³⁵Misenpi pawl in an cuan ih an zoh ringring laiah Judah mi hotu pawl cun nautatnak thawn, “Midang hmuah a run ngah ṭheu; Pathian ih hrilmi Messiah a si ngaingai ahcun amah le amah khal run aw seh,” tiah an ṭongsan.

³⁶Ralkap pawl khal in an hnihsan ve ih amah va fuuk tahratin a man olmi sabitti thur an pek ih,

³⁷“Judah siangpahrang na si ahcun nangmah le nangmah run aw aw he!” tiah an ti.

³⁸A lu tlun ah, “Hi pa hi Judah Siangpahrang a si,” tiah nganmi ca an taar.

³⁹Thinglamtah parih an khenmi misual pa pakhat cun nautatnak ṭong thawn, “Nangmah hi Messiah na si lo maw? Nangmah le nangmah run aw awla kannih tla hi in run ve aw he!” tiah a ti.

⁴⁰Asinain misual pakhat pa cun, “Pathian na ṭih lo maw si? Kan parih thuṭhennak an tuahmi hi a bangrep ṭheh.

⁴¹Sikhalsehla kannih pahnih parih an tuahmi thuṭhennak hi cu a dikmi a si, ziangahtile kan thil tuah ruangih kan tuar tlakmi kan tuar a si. Asinain hi pa hi cu sualnak zianghman a tuah lo,” tiin a mawhthluk.

⁴²Cule Jesuh hnenah, “Maw Jesuh, Siangpahrang ih na rat tikah i hngilh hram hlah aw,” tiah a ti.

⁴³Jesuh in cu pa ih hnenah cun, “Thu ka lo kam a si: tuihsun ah keimah thawn Paradis ah na um ding,” tiah a ti.

⁴⁴Sun nazi hleihnih hrawngin cuih ram pumpuluk ah zanlam nazi pathum tiang thimkhawzing a tlung.

⁴⁵Cule Biakinn ih zaarmi puanzar cu a tlek ih ṭhen hnih ah a ṭhen aw.

⁴⁶Jesuh cu napi in a au ih, “Ka pa, ka thlarau na kut sungah ka lo pe,” tiah a ti. Cutiih a sim ṭheh hnuah a thaw a cem.

⁴⁷Cumi cu ralbawi pa in a hmuh tikah Pathian kha a thangṭhat ih, “Hi pa hi cu sualnak nei lo miṭha a si!” tiah a ti.

⁴⁸Cuih thil hmuahhmuah zoh dingah a rami mipi pawl in cuih thil a cangmi pawl an hmuh ngah tikah ninghang in an ṭaang an cuum ih riahsia in innah an tlung.

⁴⁹Pumpak in Jesuh a theitu hmuahhmuah le Galilee ihsin a rak thluntu nunau pawl tla cun a hlat nawnah an ding ih an cuan.

⁵⁰Judea ram Arimathea timi khua ah Josef an timi mi pakhat a um. Amah cu miṭha le upat hmaizah tlakmi a si ih Pathian Uknak a ra cing ding, tiah a hngaktu a si. Amah cu khonsil sungtel pakhat a si ve naón khonsil thurelnak le thiltuahmi cu a lung a kim lo.

⁵¹

⁵²Cupa cu Pilat hnenah a feh ih Jesuh ih ruak cu a va dil.

⁵³Cule Jesuh ruak cu thinglamtah par ihsin a ṭhum ih puan neemte in a tuam hnuah zohman ih hman hrih lo, lung an khermi thlaan thar sungah a phum.

⁵⁴Cumi cu tlawngkai ni nga ni a si ih Sabbath ni a thok zik thlang.

⁵⁵Galilee ihsin Jesuh a rak thluntu nunau pawl cu Josef an thlun ih thlaanah cun an feh ve. A thlaan le a sungih Jesuh ruak an vui daan khal cu an hmu ṭheh.

⁵⁶Cule an inn ah an kir ih Jesuh ruak culh dingah rimhmui le zihmui pawl an ngaihtuah. Sabbath ni-ah cun an Daan ih a fial vekin an cawl.