Read Falam Chin LUKA 24 Bible Online

LUKA 24 - Falam Chin bible

LUKA 24

¹Nipi ni zing thlapit ah nunau pawl cu an timtuah ciami rimhmui pawl kengin thlaan ah an feh.

²Thlankhar lung phengpi a rak ṭhawn aw zo kha an hmu;

³cu hrangah an vung lut, asinain Bawipa Jesuh ih ruak cu an hmu lo.

⁴An mang a bang ih an ding; culai fangah hmakhatte ah hnipuan tleuzet hrukin mi pahnih an kiangah an rung ding.

⁵An ṭih ngaingai ih leilungah an bok; cutikah mi pahnih cun, “Ziangah so a thimi lakah a nungmi cu nan hawl?

⁶Hinah a um nawn lo; a tho sal zo. Galilee-ih a um laiah nan hnenih a simmi kha nan ciing lo maw?

⁷‘Milai Fapa hi misual pawl kut sungah pek a si ding; thinglamtah parah an khen ding ih ni thum hnuah a tho sal ding,’ a ti kha!” tiah an ti.

⁸Cule nunau pawl cun a ṭong kha an vun mang sal ih,

⁹thlaan ihsin an kir hnuah dungthluntu hleikhat le midang pawl hnenah an sim.

¹⁰Nunau pawl cu Mari Magdalene, Joanna le Jeim ih nu Mari tla an si. Anmah le nunau dang an hnenih a telmi pawl in a dungthluntu pawl kha an sim.

¹¹Sikhalsehla a dungthluntu pawl cun nunau pawl ih simmi cu thulolak ah an ruat ih an zum lo.

¹²Asinain Piter cu a pok ih thlaanah cun a va tlan. Kuun tahratin a vun bih ih ruak tuamnak puan neemte lawng a hmu; a dang zianghman a hmu lo. Cule cutiih a cangmi cu a mangbang zetin inn ah a tlung sal.

¹³Cuih ni thotho ah Jesuh a rak thluntu mi pahnih cu Jerusalem ihsin peng sarih hrawng a hlami Emmaus timi khua ah an feh.

¹⁴Cule tubaite ih thil a cangmi pawl cu an ruah aw vivo.

¹⁵Cutiin an ṭong ih an relkhawm rero laiah cun Jesuh amah rori in a hun fuuk hai ih an feh tlang.

¹⁶Amah cu an hmu naón an thei thiam lo.

¹⁷Jesuh in an hnenah, “Nan feh phahah ziang thu so nan rel rero?” tiah a sut. Cule an riahsia mithmai thawn an ding.

¹⁸Pakhat pa, Kleopas an timi pa in, “Jerusalem khua a ra tlawngtu mi hmuahhmuah lakah nangmah lawng hi maw tuih ni hnih thum sungah Jerusalem khawsungih thil a cangmi pawl a thei lotu hi na si?” tiah a ti.

¹⁹Anih in, “Ziang thil maw?” tiah a sut. Annih in, “Nazareth Jesuh parih thil a cangmi pawl!” tiah an let. “Himi pa cu Pathian hmai le misenpi hmaiah zozo khal in profet a si ih a ṭongmi ah siseh, a tuahmi ah siseh, huham a nei ngaingai tiih an ruah ṭhehmi a si.

²⁰Kan puithiam upa pawl le in hotu pawl in a thihnak rel dingah mi kut ah an pek ih cuticun thinglamtah parah an that.

²¹Cule amah cu Israel mi tlentu a si ding, tiah ruahsannak kan rak neih zetmi a si. Cuih tlunah cubangtuk thil a can hnu tuih ni hi a ni thumnak ni a si.

²²Kan lakih nunau ṭhenkhat in kan mang in bangter fawn; tuihzing zingthlapit ah thlaan ah an va feh;

²³asinain a ruak an va hmu lo. An ra kir ih ‘Vancungmi kan hmu ih Anih cu a nungsal zo, tiah in sim,’ tiah an ti.

²⁴Kan lakih mi ṭhenkhat thlaanah an va feh ve ih nunau pawl sim vek cekci in an va hmu ve; asinain amah cu an hmu thotho lo,” tiah an ti.

²⁵Cule Jesuh cun an hnenah, “Nannih hi nan va aa so! Profet pawl ih an rak sim ciami nan va zum har lawmmam so!

²⁶Messiah hrangah hi thil pawl hmuahhmuah hi a tuarta ṭheh hnuah a sunlawinak sungih luh ding cu a ṭul lo maw si?” tiah a ti.

²⁷Cule Jesuh in Ca Thianghlim sung Moses cauk pawl ihsin thokin profet pawl ih nganmi tiang, amah ih thu an ngannak hmuahhmuah kha an hnenah a simfiang.

²⁸An feh tumnak khua an thlen zik zawng ah Jesuh cu a feh hrih ding vekin a um awter.

²⁹Asinain annih in, “Kan hnenah riak ve ko aw! Khua a tlai zo ih a thim thlang fawn,” tiah an kai. Curuangah an hnen riak dingin a thlun.

³⁰An hnenah cun a to ih rawl an hil tlang. Sang a lak ih thla a cam hnuah a phel ih a zem hai.

³¹Cutikah an mit a hung vaang ih Amah a si kha an thei thiam; asinain an mithmuh ah a hlo sal.

³²Anmah le anmah cu, “Lamzin kan feh tlang laiih kan hnenih a ṭong le Ca Thianghlim a simfiang rero laiah khan kan sungah meisa kang vekin a um tho lo maw kha?” tiah an ti aw.

³³Hmakhatteah Jerusalem ah an kir sal ih dungthlun hleikhat le a dang pawl an rak tonkhawm lai kha an va hmu ih,

³⁴“Bawipa cu a tho sal taktak a si! Simon hnenah a lang!” tiih an rak sim awk rero kha an thei.

³⁵Annih pahnih khal in lamzin ih thil a cangmi thu le sang a phel zawng ih Bawipa a si ti an theihthiamnak thu pawl kha an sim ve.

³⁶An pahnih in lamzin ih thil a cangmi pawl thu kha dungthluntu hnenih an rel rero laiah hmakhatte ah an lakah Bawipa cu a rung ding ih, “Nan hnenah daihnak um seh,” tiah a ti.

³⁷Mithla kan hmu tiah an ruat ih an ṭih ngaingai.

³⁸Asinain anih in, “Ziangah so nan thin a phan? Ziangah so nan thinlung sungah rinhmainak a um ciamco?

³⁹Ka kut le ka ke tla hi zohhnik uh! Keimah sokhaw ka si! I tham uhla nan thei ding; ziangahtile mithla cun ruh le titsa a nei lo, kei cu ka nei ti in hmu a si!” tiah a ti.

⁴⁰Cutiin a sim ih a kut le a ke tla cu a hmuh hai.

⁴¹An zum thei thotho lo; an lung a awi tukih an mang tla a bang tuk fawn. Curuangah anmah cu, “Hinah ei ṭha ziangtal nan nei maw?” tiah a sut.

⁴²Annih in nga pum khat suan cia an pek ih,

⁴³a lak ih an hmuh hnganah cun a ei.

⁴⁴Cule an hnenah cun, “Nan hnen ka um laiah ka sim reromi cu hi thil pawl hi sokhaw an si: Moses Daan cabu sung, profet pawl ih nganmi cabu sung le Saam cabu sungih keimah ih thu an rak nganmi pawl cu a kim ṭheh a ṭul a si,” tiah a ti.

⁴⁵Cun an thinlung mit a vangter ih Ca Thianghlim ih simmi kha an thei thei.

⁴⁶An hnenah, “An nganmi cu hihi a si: Messiah cu a tuar pei ih a thih hnu ni thumnak ah a tho sal ding.

⁴⁷Cule Jerusalem ihsin thokin miphun hmuahhmuah hnenah amah hmin ih sualsirnak le sualngaidamnak thuthang cu phuan a si ding.

⁴⁸Nannih cu hi thil cangmi pawl ih thutheitu nan si.

⁴⁹Cule ka Pa ih a lo tiam ciami kha keimah rori in nan parah ka run thlah ding. Asinain tlunlam ihsin huham nan hnenih a rung thlen hlanlo khawpi sungin nan hngak pei,” tiah a ti.

⁵⁰Cun khawpi ihsin a hruai suak hai ih Bethani khua tiang an feh. Cutawkah a ban a pharh ih thlawsuah a pek hai.

⁵¹Cutiih thlawsuahnak a pek laiah an hnen ihsin a suak ih vancungah a kai.[16]

⁵²Amah cu an biak ih lungawi zetin Jerusalem ah an kir.

⁵³An tikcu hmuahhmuah cu Biakinn sungah Pathian thangṭhatnak ah an hmang.