Read Falam Chin LUKA 5 Bible Online

LUKA 5 - Falam Chin bible

LUKA 5

¹Voikhat ah Jesuh cu Gennesaret Tili kapah a ding ih culaiah Pathian thu a simmi ngai duh ah misenpi cun amah naih an cuh aw ciamco.

²Culai ah Jesuh in titlang ih lawng pahnih an hrenmi kha a hmu. Ngakaitu pawl cu lawng sung ihsin an suak ih an sur pawl an kholh rero.

³Jesuh cu lawng pakhat deuh sungah a lut; cuih lawng cu Simon ih ta a si; cule lawng cu titlang ihsin a hlatnak deuh ah ṭhawn dingin a fial. Cuih lawng sungah Jesuh cu a to ih misenpi pawl cu a zirh hai.

⁴Thusim a ṭheh tikah Simon hnenah, “Ti thuknak lamah na lawng hi ṭhawn awla na rualpi pawl thawn nan sur cu vun vorhhnik uh,” tiah a ti.

⁵Simon in, “Bawipa, taima zetin zanvarte kan vorh naón zianghman kan awk lo. Sikhalsehla vorh uh, in ti a si ahcun kan vorh a si pei cu,” tiah a ti.

⁶Sur cu an vun vorh ih nga tam ngaingai an awk ih an sur tiangin a tlek ṭhehzik.

⁷Cutikah lawng dangih an rualpi pawl kha, “In ra bawm uh,” tiah an kut an hei zaap. An ra ih an lawng pahnih cu nga khattein an ret ih an lawng cu a pil zikte.

⁸Cumi cu Simon in a hmuh tikah Jesuh ih khuk kiangah a khuk a bilh ih Jesuh hnenah cun, “Bawipa, i fehsan hram aw; ziangahtile kei hi misual ka si!” tiah a ti.

⁹Amah le a rualpi pawl cu nga tam ngaingai an awh ruangah an mang a bang ngaingai.

¹⁰Cuvek thotho in amah thawn nga a kaitu Zebedi ih fapa Jeim le Johan khal an mang a bang ve. Jesuh in Simon cu, “Na thin phang hlah; atu thokin minung kaitu na si ding,” tiah a ti.

¹¹An lawng pawl cu ti kapah an dinter ih an thil hmuahhmuah fehsan in Jesuh cu an thlun.

¹²Voikhat ah Jesuh cu phaarnat a tuartu pa pakhat ih umnak khua ah a thleng. Cupa cun Jesuh a hmuh tikah a hmaiah a bok ih, “Bawipa, na duh ahcun i thiangter thei a si,” tiah a dil.

¹³Jesuh in a kut in a tham hnuah, “Ka lo thiangter duh, thiang thlang aw,” tiah a ti. Hmakhatteah a natnak cu a dam.

¹⁴Jesuh in, “Zohman va sim hlah, asinain va feh vurvo awla puithiam in lo zohseh; cule na dam ti kha mi hmuahhmuah ih an lo hmuhnak dingah Moses daan vekin thawinak va pe aw,” tiah a ti.

¹⁵Asinain Jesuh thuhla cu hmun kipah a thang sinsin, mi in an pan sinsin ih a thu simmi an ngai; cule an natnak khal a damter.

¹⁶Cuih hnuah misenpi hnen ihsin feh tahratin hlimphirnak hmunah amah lawng thla a cam ṭheu.

¹⁷Nikhat ah Jesuh cu thu a zirh rero laiah Jerusalem khua le Judea ram le Galilee ramih khawkip ihsin a rami Farasi le Daanthiam ṭhenkhat pawl khal an ra to ve. Mina damter theinak Bawipa ih huham cu Jesuh parah a um.

¹⁸Culai ah mizengpa pakhat cu a ihphah thawn laangin an rak zawn ih Jesuh hmaiih vun ret dingah inn sungah luhpi an tum.

¹⁹Sikhalsehla mi an tamtuk ruangah an fehpi theinak ding lamzin a um lo. Curuangah inn parah an kaipi ih diphun bauh hnuah misenpi lak Jesuh hmai rori-ah cun a ihphah thawn an vun thlak.

²⁰Zumnak an neihzia kha Jesuh in a hmuh tikah mizengpa hnenah cun, “Ka rual, na sualnak cu ngaithiam a si zo,” tiah a ti.

²¹Daanthiam pawl le Farasi pawl cun, “Pathian thangsiatnak hi bangtuk a ṭong theitu milai cu ziangvek milai so a si? Pathian pakhat lawng sual ngaithiam theitu a si,” tiah pakhat le pakhat an ti aw.

²²Jesuh in an ruahmi cu a thei ih an hnenah, “Hi bangtuk in ziangah so nan ruah?

²³‘Na sualnak hi ngaithiam a si zo,’ ti maw, a si lole ‘Tho awla feh aw,’ tiso a ol sawn?

²⁴Mi Fapa hi leilung tlunah hin sualnak a ngaithiam thei a si, ti nan hnenah ka langter ding,” tiah a ti. Cule mizengpa cu, “Ka lo sim: Tho aw! Na ihphah la awla na inn ah tlung aw,” tiah a ti.

²⁵Hmakhatteah mizengpa cu mipi hmaiah cun a tho ih a ihphah cu a lak ih Pathian thangṭhat phah in a inn ah a tlung.

²⁶Mipi cu an mang a bang ngaingai! ṭih phah in Pathian cu an thangṭhat ih, “Ziangbangtuk khawruahharza thil so tuihsun ih kan hmuh mi hi!” tiah an rel ciamco.

²⁷Cuih hnuah Jesuh cu a feh ih siahkhongtu Levi an timi pa a zung sungih a to kha a hmu. Jesuh in a hnenah, “I thlun aw,” tiah a ti.

²⁸Levi cu a tho ih ziang hmuahhmuah taanta in Jesuh cu a thlun.

²⁹Cule Levi in a inn ah rawl einak puai tumpi Jesuh hrangah a tuah ih a sawmmi pawl lakah cun siahkhongtu pawl le midang tampi an tel.

³⁰Farasi mi ṭhenkhat le Daanthiam ṭhenkhat anmah ih bu sungtel pawl cu Jesuh dungthluntu pawl hnenah an phunzai. “Ziangah so siahkhongtu le misual tla thawn rawl nan ei ih ti nan in tlang?” tiah an sut.

³¹Jesuh in, “A harhdammi pawl in sibawi an ṭul lo, a nami pawl lawngin an ṭul.

³²Miding pawl ko dingah ka ra lo; misual pawl an sual sir awter dingah ka ra a si,” tiah a ti.

³³Mi ṭhenkhat in Jesuh hnenah, “Johan dungthluntu pawl cu rawl an ul ṭheu ih thla khal an cam ṭheu; cule Farasi pawl ih dungthluntu pawl tla in cuvekin an tuah ve ṭheu. Asinain na dungthluntu pawl cu an duhduh in an in an ei,” tiah an ti.

³⁴Jesuh in, “Mopuai a ra zawhtu pawl cu mopa an hnenih a um sungah rawl loin an um ding maw?” tiah a sut. “An um lo ding!

³⁵Sikhalsehla mopa an hnen ihsin laak a si caan a ra thleng ding ih cutikah rawl cu an ul leh ding,” tiah a ti.

³⁶Cuih hnuah Jesuh in an hnenah hiti in thuṭhimnak a sim, “Zohman in hnipuan hlun belhnak dingah hnipuan thar an thlek dah keel lo. An thlek a si ahcun hnipuan thar cu a tlek laklawh ding ih hnipuan hlunih an belh tikah a kaih aw fawn lo ding.

³⁷Cule zohman in sabitti thar cu savun thawl hlun sungah an thun lo ding, ziangahtile sabitti thar in thawl hlun cu a pahkuai ding ih sabitti cu a bung lak ding ih thawl khal cu a siat ṭheh ding.

³⁸Cu hnak cun sabitti thar kha savun thawl thar sungah thun sawn ding a si.

³⁹Cun sabitti hlun an in hnuah zohman in sabitti thar an in duh lo. ‘A hlunmi a ṭha sawn,’ an ti,” tiah a sim.