Read Falam Chin LUKA 6 Bible Online

LUKA 6 - Falam Chin bible

LUKA 6

¹Jesuh cu Sabbath ni ah lo lakin a feh. A dungthlun pawl in sangvut vui an zuut phah ih an zaphak sungih an nuai hnuah a fang cu an ei.

²Farasi mi ṭhenkhat pawl in, “Kan Daan in Sabbath ni ah tuah lo ding, timi cu ziangah so nan tuah?” tiah an sut.

³Jesuh in an hnenah, “David le a ralkap pawl an ril a rawn tikah David in ziang a tuah ti kha nan siar dah lo maw?

⁴Pathian inn sungah lut tahratin Pathian hnenih pekmi sang a lak ih a ei; cule a ralkap pawl tla a pek a si. Puithiam pawl siar lo cuih saang ei cu kan Daan in a duh lo a si kha!” tiah a ti.

⁵Cule Jesuh in a netnak ah, “Milai Fapa cu Sabbath ih Bawi a si,” tiah a ti.

⁶Voikhat ah Sabbath ni ah Jesuh cu sinakok ah a feh ih thu a zirh. Cunah cun a kut vorhlam a zengmi pa pakhat a um.

⁷Farasi mi ṭhenkhat pawl le Daanthiam ṭhenkhat pawl in Jesuh ih sual hawl an duh ruangah Sabbath ni ahhin a damter pei maw, tiah cat loin an zoh.

⁸An ruahnak cu Jesuh in a theih ruangah mipa cu, “Tho awla hmailam ahhin ra suak aw,” tiah a ti. Kutzeng pa cu a tho ih hmaiah cun a ra ding.

⁹Cule Jesuh in an hnenah, “Thu ka lo sut hai ding: Kan Daan in Sabbath ni ih tuah dingah ziangso in on? Mi bom ding maw, mi tuahmawh ding so? Mi nunnak humhim ding maw, siatsuah ding so?” tiah a ti.

¹⁰Cule cu pawl cu a zohhliah vivo hnuah kutzeng pa hnenah cun, “Na kut hawi aw,” a ti. A kut cu a hawi ngaingai ih a dam ngah.

¹¹Farasi le Daanthiam pawl cu an thin a heng tuk ih Jesuh an siatsuah theinak dingah thu an ron aw ciamco.

¹²Culai ah Jesuh cu thlacam dingin tlang parah a kai ih Pathian hnenah zanvar thla a cam.

¹³Khua a hung vaan tikah a dungthlun pawl a ko khawm ih anmah sungin mi hleihnih a hril; cupawl cu ‘Tirhthlah pawl’ tiah a ko.

¹⁴An hmin cu Simon (Piter tiah a kawhmi) le a nau Andru, Jeim le Johan, Filip le Bartholomeo,

¹⁵Matthai le Thomas, Alfias ih fapa Jeim le Simon (Phunṭantu tiih kawhmi),

¹⁶Jeim ih fapa Judas le Jesuh phiar lehtu Judas Iskariot tla an si.

¹⁷Jesuh cu a dungthlun pawl thawn tlangpar ihsin an rung suk ih a thluntu tampi pawl thawn hmun rawn ah an ding. Mitampi cutawkah cun an ra; Judea ram pumpuluk ihsin siseh, Jerusalem khua in siseh, tipikap ih a ummi Taiar le Sidon khawpi tla in an ra.

¹⁸Jesuh thusimmi ngai duh ah le an natnak tla dam duh ah an ra. Thlarau thiang lo pawl ih zonzaihtermi pawl tla a damter.

¹⁹Mi hmuahhmuah in amah kha tham an duh; ziangahtile a sung ihsin huham a suak ih a damter ṭheh hai ruangah a si.

²⁰Jesuh in a dungthluntu pawl a zoh hai ih, “Mi farah pawl cu mi thlawsuak nan si, Pathian Uknak cu nanmah ih ta a si!

²¹“Atu laiih rilrawng pawl cu mi thlawsuak nan si, nan khopkham leh ding a si! “Atu laiih mitthli a tlami pawl cu mi thlawsuak nan si, nan lungawiin nan hni leh ding.

²²“Mi in an lo hua, an lo hnong ih Milai Fapa ruangah an lo hmuhsuam, an lo relsiat asile mi thlawsuak nan si!

²³Cubangtuk a si tikah nan thin nuam in um uhla lungawiin laam uh; ziangahtile nan hrangah tuarman tampi vancungah retcia in a um zo. Cubangtuk cu an pupa pawl khal in profet pawl parah an rak tuah zomi a si.

²⁴“Atuih milian pawl cu zaangfakza nan si; nunnuam nan comi a cem zo!

²⁵“Atuih a khopkham pawl cu zaangfakza nan si; rilrawngin nan vakvai leh ding. “Atuih a hni rero pawl cu zaangfakza nan si; nan ṭap nan ai leh ding.

²⁶“Mikip ih porh le fakmi cu zaangfakza nan si; Ziangahtile an pupa pawl khal in cuvekin profet deu pawl kha an rak porh dah a si.

²⁷“Sikhalsehla ka thu a theitu nannih pawl: Nan ral duhdaw uh; a lo huatu pawl parah ṭhatnak tuah uh;

²⁸a lo camtu pawl khi thlawsuah pe uhla a lo hremtu pawl hrangah thla cam uh.

²⁹Mi pakhatkhat in na biang a lo beng asile khatlam khal tun hrih aw; mi pakhatkhat in na kawt angki lenghruk a lak ahcun na angki sunghruk khal pe cih aw.

³⁰Na thilri pakhatkhat a lo diltu an um ahcun va pe aw; cule mi pakhatkhat in na thil an lak le va dil sal nawn hlah.

³¹Na hrangah tuah hai sehla ti na duhmi kha midang hrangah va tuah aw.

³²“Nangmah a lo duhdawtu lawng na duhdawt a si ahcun ziangah so thlawsuah malsawm ngah ding cu na zum? Misual pawl khal in anmah a duhdawtu cu an duhdawt ve a sisi!

³³Nangmah parah ṭhatnak a tuahtu hrang lawngah ṭhatnak na tuah ve ahcun ziangah so thlawsuah malsawm ngah ding cu na zum? Misual pawl hman in cuvek cu an tuah ve a sisi!

³⁴Ka ngah sal ding tiih na zummi hnen lawngih na coih ahcun ziangah so thlawsuah malsawmnak ngah ding cu na beisei? Misual pawl hman in an ngah sal ding ahcun misual dang pawl hnenah an coih ve a sisi!

³⁵Cutiin a si lo! Nan ral pawl duhdaw uhla an parah ṭhatnak tuah uh. Coih uhla ngah sal ding ruat duh hlah uh. Cuticun ṭhatman tampi nan ngah ding ih Cungnungbik Pathian ih fa nan si ding. Ziangahtile amah cu miṭha lo le lungawi hna hman a thiam lomi par khalah a ṭha a si.

³⁶Nan Pa cu mi zaangfah thiam a si vekin nannih khal mi zaangfah thiam va si ve uh,” tiah Jesuh in a ti.

³⁷Mi va soisel hlah, Pathian in a lo soisel ve lo ding. Midang va hnong hlah, Pathian in a lo hnong ve lo ding. Midang ngaidam awla Pathian in a lo ngaidam ve ding.

³⁸Midang hnenah thil ṭhen aw, Pathian in a lo ṭhen ve ding. Tamzet in, liam thluahthlo in, na kut sungah pek na si ding ih na zawi thei nawn lo tiangin burh na si ding. Midang parih na hmanmi tahnak khi Pathian in na parah a hmang ve ding,” tiah a ti.

³⁹Cule Jesuh in hi tahṭhimnak hi a sim: “Mitcaw pakhat in a dang mitcaw a hruai thei lo ding. A hruai asile an pahnih in korhrum sungah an tla ding.

⁴⁰Tlawngta cu a saya hnakin a thiam sawn dah lo; asinain tlawngta cu a zirnak a ṭheh tikah cun a saya bangtuk a si ding.

⁴¹“Nan mit sungih thingtum a ummi sawn hman ruat loin ziangah so na unau mit sungih mit-hnawm fate lehlam na zoh?

⁴²Na unau hnenah ‘Unau, zaangfahte in na mit sungih mithnawm kha ka lo coih sak pei,’ tiah ziangtinso na ti thei? Nangmah mit sungih thingtum hman na hmuh thei si lo! Mi titer aw pawl! Hmaisabik ah nan mit sungih thingtum kha suahta uhla cuih hnuah nan unau mit sungih mithnawm kha coih dingah ṭhatein nan hmu ding,” tiah a ti.

⁴³Thingkung ṭha in rahsia a rah dah lo; thingkung ṭha lo in rah ṭha khal a rah thei ve lo.

⁴⁴Thingkung hmuahhmuah khi an rah in theih thei an si: hlingkung par ihsin thei rah nan lo dah lo; cuvekin theihmu kung ihsin sabit rah nan lo fawn lo.

⁴⁵Mi ṭha in a thinlung sungih a ummi thil ṭha kha a suahter; mi ṭha lo in a thinlung sungih a ummi thil ṭha lo pawl kha a suahter ve. Ziangahtile minung cu a thinlung sungih a ummi kha a kaa in a suak a si,” tiah a ti.

⁴⁶Jesuh in, “Ziangah so ‘Bawipa, Bawipa,’ tiah in ti ih ka lo sim mi cu nan tuah fawn lo?

⁴⁷Ka hnenah ra in ka thusimmi a ngai ih a thluntu pawl cu mi ziangvek an si, ti ka lo hmuhhnik ding.

⁴⁸Cupa cu lungpi parah khur thukpi lai in ṭhuam a bun ih inn a saktu pa bangtuk a si. Tiva a hung lian ih cuih inn cu a sawh ciamco naón a hnin thei lo; ziangahtile fekteih sakmi inn a si.

⁴⁹Sikhalsehla ka thusimmi a thei naón a thlun lotu pa cu ṭhuam ṭhateih phun loin leilung meen ih inn a saktu pa vek a si. Tilian in a cuih inn cu a run pah tikah hmakhatte ah inn cu a tlu ih ziangtluk ṭihnungza so a si!” tiah a ti.