Read Falam Chin LUKA 9 Bible Online

LUKA 9 - Falam Chin bible

LUKA 9

¹Jesuh in a dungthluntu hleihnih pawl cu hmun khatah a ko ih khawsia dawi theinak le natnak a phunphun damter theinak huham a pek hai.

²Cule Pathian Uknak thu sim ding le mina damter dingah a thlah hai.

³An hnenah, “Khual nan tlawn tikah zianghman keng hlah uh: kianghrol siseh, zaal siseh, rawl siseh, paisa siseh, angki hlei khal keng hlah uh.

⁴Nan tlun-inn ah hmun dang nan feh sal hlan lo va caam uh.

⁵An lo khirnak khua cu tlansan uhla anmah ralrin peknak ah nan ke ih leidip kha thingta uh,” tiah a ti.

⁶Dungthluntu pawl cu an feh ih khawte an tlawng vivo; Thuthangṭha an sim ih khuazakip ah mina an damter vivo.

⁷Galilee ram uktu bawi Herod in cu bangtuk ih thil a cangmi cu a theih tikah a awlok a song ngaingai, ziangahtile baptistma petu Johan a nung sal a si tiah mi ṭhenkhat in an ti.

⁸Midang in, “Elijah a lang a si hi,” an ti ih midang ṭhenkhat cun khuahlan laiih profet pakhatkhat a nung sal a si, an ti.

⁹Herod in, “Johan ih lu ka tanter zo; asinain a thuhla ka theih reromi hi pa hi zo a si pei?” tiah a ti. Cule Jesuh cu hmu suak rori dingin a tum.

¹⁰A thlahmi a dungthluntu pawl cu an ra tlung ih an tuahmi hmuahhmuah cu Jesuh an sim. Cule a hruai hai ih Bethsaida an timi khua ah anmah vial lawng an feh.

¹¹Cuih thu cu mipi in an theih tikah an thlun. Jesuh cun cibai a buk hai ih an hnenah Pathian Uknak thu a sim ih damnak a ṭulmi pawl tla a damter.

¹²Ni a tlak zik tikah a thlahmi hleihnih cu a hnenah an ra ih, “Hitawk hi ramṭhing a si; curuangah misenpi pawl hi fehter aw, khua le lo lakah va feh hai sehla rawl le riahnak inn tla va hawl hai seh,” tiah an ti.

¹³Sikhalsehla Jesuh in, “Nanmah in an ei ding rawl cu pe uh,” tiah a ti. Annih in, “Kan neihmi hmuahhmuah cu a zatein saang hlom nga le nga pum hnih lawng a si. Minung hi zat hrang rawl kan lei cawk ding maw?” tiah an ti.

¹⁴Cutawkah pacang lawnglawng thawng nga tluk an um. Jesuh in, “Mipi hi sawmnga bur ciar in toter uh,” tiah dungthluntu pawl cu a sim.

¹⁵Cutiin dungthluntu pawl in an tuah hnuah,

¹⁶Jesuh cun saang hlom nga le nga pum hnih cu a lak ih van a hun zoh ih Pathian hnenah lungawinak thawn thla a cam hnuah a phel ih mipi zem dingin dungthluntu pawl hnenah a pek.

¹⁷An zatein an ei ih an khop hnuah an hlahmi kha dungthluntu pawl in an rutkhawm ih bawm hleihnih a ti.

¹⁸Nikhat ah Jesuh cu amah lawng thla a cam laiah dungthluntu pawl an ra ih, “Mipi in zo in ti so?” tiah a rak sut hai.

¹⁹Annih in, “Mihrek in baptisma petu Johan a si, an lo ti. Ṭhenkhat in Elijah a si, an lo ti. Cule midang in khuahlan laiih profet pakhatkhat a nungsal a si, an lo ti,” tiah an ti.

²⁰Jesuh in, “Nannih in teh! Zo a si tiah so in ruat?” tiah a sut. Piter in, “Nangmah cu Pathian ih Messiah na si,” tiah a ti.

²¹Cuih thu cu zohman sim lo dingin Jesuh in a tiam hai.

²²Cule an hnenah, “Milai Fapa hi a tuar nasa ding ih upa pawl, puithiam upa pawl le Daanthiam saya pawl in an hnong ding. Amah cu an that ding; asinain ni thumnak ah thawhter sal a si ding,” tiah a ti.

²³Cule an zate hnenah, “Zokhal sisehla i thlun duh ahcun mah zawnruahnak kha tlansan sehla nitinte a thinglamtah phur in i thlun seh.

²⁴Ziangahtile zokhal siseh amah ih nunnak a hum duhtu cu a nunnak a sung ding; sikhalsehla keimah ih hrangah a nunnak a sungtu cu a nunnak a hum ngah ding.

²⁵Mi pakhat in leilung pumpi hi co ṭheh hmansehla amah ih nunnak a sun, a si lole a hloral a si ahcun ziangso hlawhmi a neih? Hlawhmi zianghman a nei lo.

²⁶Mi pakhat in keimah le ka thu zirhmi a zahpi ahcun Milai Fapa khal in a sunlawinak le a Pa le vancung mithiang pawl ih sunlawinak thawn a ra thlen tikah a zahpi ve ding.

²⁷Fiangtein ka lo sim: hitawk ih a ummi lakah hin, Pathian Uknak a rung thlen an hmuh hlan lo, a thi lo dingmi nan um a si,” tiah a sim.

²⁸Hi thu pawl a sim hnu zarh khatah Jesuh in Piter le Johan le Jeim a ko ih thlacam dingah tlangpar ah an kai.

²⁹Thla a cam rero laiah Jesuh cu a hmelpian a thleng aw ih a hnipuan cu a vaar tukah a tleu in a tleu.

³⁰Hmakhatteah mi pahnih an rung lang ih an bia aw. Cuih mi pahnih cu Moses le Elijah an si.

³¹Vancung sunlawinak thawn an rung lang ih Jerusalem khua ih a thihnak in Pathian tumtahmi a kimternak ding thu kha Jesuh thawn an ruah aw.

³²Piter le a rualpi pawl cu ih-hmuh thaw zetin an rak itthat; asinain an hung ṭhang ih Jesuh ih sunlawinak le Jesuh thawn a ding tlangmi mi pahnih kha an hmu.

³³Cuih mi pahnih ih Jesuh an fehsan zawng ah Piter in, “Bawipa, hitawk ih kan um hi a ṭha ngaingai a si! Buuk pathum in kan sak pei; nangmah hrangah pakhat, Moses hrangah pakhat, Elijah hrangah pakhat,” tiah a ti. Amah cun ziang ka ṭong ti hman a thei ngah ngaingai lo.

³⁴Cutiih a ṭong rero laiah mero a hung zaam ih a thlaam in a run phen; cutiih mero in a run tuam ruangah dungthlun pawl cun an ṭih ngaingai.

³⁵Cule mero sung ihsin aw pakhat in, “Hi pa hi ka hrilmi ka Fapa a si, a thu ngai uh,” tiah a run ti.

³⁶Cuih aw a reh tikah Jesuh amah lawng an hmu. Dungthlun pawl cu daitein an um; an hmuhmi thuhla cu cuih caanah cun zo ih hnen hmanah an sim lo.

³⁷A thaisun ah Jesuh le a dungthlun pathum cu tlang ihsin an rung suk ih mipi tamzet in Jesuh kha an rak hmuak.

³⁸Cule mipi lak ihsin mi pakhat a au ih, “Sayapa, ka fapa neihsun hi i ra zoh sak hram aw,” tiah a dil.

³⁹“Khawsia in a polh ih rin lopi in a au a kio ih a tlu ṭheu; a kaa in cilbuanra a suak ih harzet koin a tuah, a thlah duh hrimhrim lo!

⁴⁰Khawsia dawisuak dingah na dungthluntu pawl ka dil rero naón an ti thei lo,” tiah a ti.

⁴¹Jesuh in, “Nannih pawl hi ziangtluk zumnak nei lo le mi sualral phun so nan si! Ziangtik tiangso nan hnenah ka um ding? Ziangtik tiangso ka lo tuar hrih hai ding?” tiah a ti. Cule mi pa hnenah cun, “Na fapa cu hinah rak hruai aw,” tiah a ti.

⁴²Cutiin Jesuh hnenih nauhakpa a rat laiah khawsia in leilung ah nauhakpa cu a thluk ih zianghman thei loin a dirhcaih ciamco. Jesuh in khawsia cu a kawk ih nauhakpa cu a damter; cule nauhakpa cu a pa ih hnenah a pek.

⁴³Pathian cahnak huham an hmuh tikah mipi cu an mang a bang ngaingai. Jesuh ih thil tuahmi hmuahhmuah an hmuh tikah mipi cun mak an ti zet; cutiih an um laiah a dungthluntu pawl hnenah,

⁴⁴“Thu ka lo sim ding ih cumi cu ziangtik hmanah hngilh hlah uh. Milai Fapa hi an phiar ding ih thuneitu kut ah pek a si ding,” tiah a ti.

⁴⁵Sikhalsehla a dungthluntu pawl in a simmi tican an thei lo. An theih thei lonak dingin thuhmi thu a si ruangah an thei thei lo ih an sut ngam fawn lo.

⁴⁶Dungthluntu pawl cun anmah lakah zoso a tum bik, timi thu-ah an el aw.

⁴⁷An ruahmi kha Jesuh in a theih ruangah nauhakte pakhat a hruai ih a kiangah a dinter.

⁴⁸Cule an hnenah, “Ka hmin in hi nauhakte a cohlangtu cu keimah i cohlang a si; keimah i cohlangtu cu i thlahtu a cohlang a si. Ziangahtile nanmah lakih mi nautabik cu a tum bik a si,” tiah a ti.

⁴⁹Johan in, “Bawipa, mi pakhat cu na hmin in ramhuai pawl a dawi rero kan hmu ih kan dawn; ziangahtile kan bu sungtel a si lo,” tiah a ti.

⁵⁰Jesuh in, “Dawn hlah uh; ziangahtile zokhal sisehla a lo dodal lotu cu a lo bawmtu an si,” tiah Johan le dungthluntu dang hnenah a ti.

⁵¹Jesuh vancungih laak a sinak ding caan a nai cuahco thlang tikah Jerusalem ih feh hrimhrim dingin a ruatcat ih a pok.

⁵²A hmaiah palai a thlah sung ih cupawl cu ziang hmuahhmuah rak timtuah sungtu dingah Samaria khua pakhat ah an lut.

⁵³Sikhalsehla cuih khawsungmi pawl in an duh lo, ziangahtile Jerusalem khua ah a lan ding ti an theih fiang ruangah a si.

⁵⁴Cumi cu a dungthlun Jeim le Johan in an hmuh tikah Jesuh hnenah, “Bawipa, hi pawl siatral ṭheh dingah vancung ihsin meisa tlakter sehla na duh lo maw?” an ti.

⁵⁵Jesuh cu an lamah a her ih a kawk hai.[6]

⁵⁶Cuih hnuah Jesuh le a dungthluntu pawl cu khawte dangah an feh.

⁵⁷Cutiih a feh vivo laiah mi pakhat in Jesuh cu, “Na fehnak kipah ka lo thlun ding,” a ti.

⁵⁸Jesuh in, “Cinghnia pawl in kua an nei ih vate tla in bu an nei; sikhalsehla Milai Fapa cun riahnak le lu hngauhsannak hmun khal a nei lo,” tiah a ti.

⁵⁹Mi pakhat hnenah Jesuh in, “I thlun aw,” a ti. Asinain cupa cun, “Bawipa, ka pa ka va phumta hmaisa pei,” tiah a ti.

⁶⁰Jesuh in, “Mithi cu mithi pawl in phum ko hai seh. Nang cu feh awla Pathian Uknak thu phuang sawn aw,” a ti.

⁶¹A dang pakhat in, “Bawipa, ka lo thlun ding; asinain hmaisabik ah ka sungte pawl ka va biakta pei,” a ti.

⁶²Jesuh in a hnenah, “Zokhal dunglet hoi phah ih lei a lettu cu Pathian Uknak hrangah santlai lo a si,” tiah a ti.