Read Falam Chin DAAN PEKSALNAK 12 Bible Online

DAAN PEKSALNAK 12 - Falam Chin bible

DAAN PEKSALNAK 12

¹“BAWIPA, nan pipu pawl ih Pathian in a lo pekmi ram nan luah ih cuih ram sungih nan um sung hmuahhmuahah nan thlun dingmi daan le thukham pawl cu hihi an si.

²Nan luah dingmi ram sung mi pawl ih an biaknak hmun tlangsaang parah siseh, tlangbo le thingpi hnuai khalah siseh, an khawzing biaknak hmun hmuahhmuah cu nan siat thluh pei.

³An biakṭheng pawl bal thluh uh, an biaknak lungphun pawl cu khuai thluh uh. A zarhmi thingphun Asher khawzingnu lem pawl cu ur thluh uhla hi hmun pawl ah an khawzing an biak sal lonak dingah an milem pawl tla cu ceektan ṭheh uh.

⁴“BAWIPA nan Pathian cu hi miphun pawl ih an khawzing an biak bangtuk in bia hlah uh.

⁵BAWIPA in nan hrin zate ih ram sungin amah umnak ah hmun pakhat a hril ding ih cutawkah nan feh pei ih nan biak pei.

⁶Cutawkah nan thawinak hmuahhmuah - meiur thawinak, raithawinak, ṭhenhra ṭhenkhat le nan pekmi dangdang, BAWIPA pek dingih nan tiammi laksawng pawl, lungthote ih pekmi thawinak le nan caw le nan tuu pawl ih fatir pawl cu nan pek pei.

⁷Cutawkah, BAWIPA nan Pathian ih hmaiah rawl nan ei pei; cuticun nan sungte in ziang nan tuah tinkim ah nan lung a awi ding, ziangahtile BAWIPA nan Pathian in a lo thlawsuah zo a si.

⁸“Cuih tikcu a ra thlen tikah tuih hlanih nan thiltuah vekcun nan tuah nawn lo pei. Atu hlanah cun zokhal in nan duhduh in nan tuah, nan nung;

⁹ziangahtile BAWIPA nan Pathian ih a lo pekmi, daiteih nan colh theinak ram nan thleng hrih lo.

¹⁰Jordan tiva nan tan tikah BAWIPA in ram cu a lo luahter ding ih umhmun nan khuar ding. Nan ral pawl kut sungin a lo hum ding ih hnangamzet in nan um ding.

¹¹BAWIPA in a hmin umnak dingah le amah nan biaknak dingah hmun pakhat a hril ding ih cutawkah cun amah pek dingih ka lo fialmi hmuahhmuah - nan thawinak pawl, mei-ur thawinak le thawinak dangdang, nan ṭhenhra ṭhenkhat le nan pekmi dang pawl, nan thukamnak laksawng pawl cu BAWIPA ih hnenah nan pek pei.

¹²Cule BAWIPA ih mithmuh ah nan fanu le nan fapa pawl, nan hnen-um pawl le nan khawsungih a ummi Levi mi pawl thawn lungawite in um uh. Ziangahtile Levi mi pawl cu comi leiram an neih lo ruangah a si.

¹³Nan duhnak pohah thawinak nan pek lo pei;

¹⁴BAWIPA in nanmah ih hrin pawl ih ram sungah hmun pakhat a hril ding ih cutawkah nan pek pei. Cutawk lawnglawng ah thawinak nan pek pei ih ka thupekmi bangtuk in nan tuah thluh pei.

¹⁵“Sikhalsehla khui tawkih nan um khalle nan ṭilva pawl cu that uhla ei uh. BAWIPA ih a lo pek zat in ei uh. Nan zatein mithiang khal, thiang lo khal in ei thluh uh; zukneng sa le sakhi sa nan ei vekin ei uh.

¹⁶Asinain a thisen cu nan ei lo pei. Tidai bangin leilung ah nan thlet pei.

¹⁷Nan umnak hmun khawsung pohah nan ṭhenhra ṭhenkhat pekmi rawl, sabitti le olif siti pawl cu nan ei lo pei. BAWIPA hnenih nan pekmi hmuahhmuah nan caw le nan tuu pawl ih fatir, BAWIPA hnenih nan thukamnak laksawng, lungthote ih pekmi thawinak le thawinak dangdang pawl khal nan ei lo pei.

¹⁸Hi thawinak pekmi pawl cu nanmah le nan faate pawl, nan hnen-um pawl le nan khawsungih ummi Levi mi pawl thawn BAWIPA nan Pathian ih mithmuh ah amah biaknak hmun lawnglawngah nan ei pei. BAWIPA in ziangtinkim nan tuahnak ah a lo umpi ruangah lungawite in cutawkah cun ei uh.

¹⁹Cule ramsungih nan um sung hmuahhmuahah Levi mi pawl cu thlauthla hlah uh.

²⁰“BAWIPA nan Pathian in, a lo tiam vekin nan ram a kauh vivo tikah nan duhnak hmunkipah rawl nan ei thei ko ding.

²¹Pathian biaknak hmun a hlat tuk a si ahcun, ka thupekmi bangtuk in, BAWIPA ih a lo pekmi caw le tuu cu that uhla nan duhnak khua le inn ah a sa cu ei uh.

²²Zokhal mithiang siseh, thiang lo khal siseh, zukneng sa le sakhi sa a ei vekin a ei pei.

²³A sa nan ei tikah a thisen cu nan ei hrimhrim lo pei, ziangahtile thisen cu a nunnak a si ih a sa thawn a nunnak cu nan ei cih lo pei.

²⁴Thisen cu ei hlah uh. Tidai bangtuk in leilung ah thlet uh.

²⁵Thisen nan ei lo a si ahcun BAWIPA cu a lung a awi ding ih nanmah le nan faate pawl hrangah nan lam a tluang ding.

²⁶Nan thawinak pawl le BAWIPA hnenih nan thukamnak laksawng pawl cu Pathian biaknak hmunah nan keng pei.

²⁷Mei-ur thawinak pawl cu BAWIPA biakṭheng parah a thisen thawn a sa thawn nan ur ṭheh pei; remnak thawinak cu biakṭheng ah a thisen nan theh pei ih a sa cu nan ei pei.

²⁸Ka thupekmi hmuahhmuah cu feltein thlun uhla kumkhua in nanmah le nan tefa pawl ih lam cu a tluang ding, ziangahtile a ṭha le a dikmi cu nan tuah ding a si ih BAWIPA cu a lung nan awiter ding a si.”

²⁹“Ral nan do tikah BAWIPA nan Pathian in hi miphun pawl cu a siatsuah ding ih an ram cu nan luah ding.

³⁰Cutiin BAWIPA in a siatsuah ṭheh tikah an khawzing biak daan pawl ih a lo thlem lonak dingah ralring uh; an thu nan cawn ahcun nan hloral ding a si. ‘Ziangtin so an pathian pawl an biak? Kannih tla anmah vekin kan bia ding’, tiah ti hlah uh.

³¹An khawzing an biak vekin BAWIPA nan Pathian cu bia hlah uh, ziangahtile an khawzing biak daan cu BAWIPA ih duh lo zawng a si ih fihnungza an si. An fanu le an fapa tiangin thawinakah an pek ih an biakṭheng ah an ur that hai a si.

³²“Ka thupekmi hmuahhmuah cu kimtein thlun ṭheh uh; zianghman beet hlah uh, pakhatte hman hrelh fawn hlah uh.