Read Falam Chin DAAN PEKSALNAK 16 Bible Online

DAAN PEKSALNAK 16 - Falam Chin bible

DAAN PEKSALNAK 16

¹“BAWIPA nan Pathian cawimawinak ah Lantak puai cu Abib thla [5] ah nan tuah pei; ziangahtile cuih thla sung zankhat zanah Izipt ram ihsin a lo suah hai a si.

²Pathian biaknak hmunah feh uhla nan tuu a si lole nan caw pakhatkhat BAWIPA nan Pathian sunloihnak ah le Lantak Puai rawl hrawmnak hrangah that uh.

³Hi rawl hrawmnak nan ei tikah thilnu telmi sang nan ei lo pei. Izipt ram ihsin zamrangzet ih suak nan si bangin ni sarih sung thilnu rawi lo sang ei ding nan si. Nan harsatnak a lo theih saaltertu ah hi sang cu nan ei pei ih nan nunsung hmuahhmuah ah Izipt ram in nan suah ni cu nan hngilh lo pei.

⁴Nan ram sungah zohman in a inn sungah thilnu cu ni sarih sung a ret lo pei. Cule nan puai tuah ni hmaisa bik zanlam ih thahmi sa cu a thaizing a thlen hlanah nan ei ṭheh pei.

⁵“Lantak Puai nan tuahnak tikih thawinak sa cu BAWIPA nan Pathian ih a lo pek dingmi khawsung nan duhnak poh ah that hlah uh.

⁶Hmun pakhat, Pathian in a hmin umnak dingih a hrilmi nan biaknak hmun lawngah nan that pei; cule Izipt ram in nan suah tikcu, nitlak zawngte-ah nan that pei.

⁷Tidai in suang uhla biaknak hmunah cun ei uh; cule a thaizing ah nan inn ciarah tlung uh.

⁸Ni ruk sung thilnu rawi lo sang nan ei pei ih a ni sarihnak ah BAWIPA nan Pathian bia dingah pumkhawm uhla cuih ni ahcun zianghman ṭuan hlah uh.”

⁹“Rawl laak nan thawh ni in siar uhla zarh sarih a kim tikah,

¹⁰rawl laak puai cu tuah uh. BAWIPA nan Pathian thangṭhatnak ah hi puai cu tuah uhla amah ih thlawsuah nan donmi cu nan sianzat - tam a dongtu in tam deuh, mal a dongtu in mal deuh, lungthote in a hnenah nan pek pei.

¹¹BAWIPA ih hmaiah nan fanu nan fapa pawl, nan hnen-um nunau mipa pawl, nan khawsungih a ummi Levi mi pawl le ramdangmi pawl, nupa nei lo farah ngakṭah le nuhmei pawl thawn lungawiin umtlang uh. BAWIPA nan biaknak hmunah cun lungawite in um uh.

¹²Izipt ramih sal nan rak taan lai kha vun ruat uhla hi thupekmi pawl cu feltein thlun uh.”

¹³“Nan rawl nan ciil thluh hnu le nan sabit nan rial ṭheh hnuah Puanthlam Puai[6] cu ni sarih sung nan tuah pei.

¹⁴Nan khawsungih a ummi nan fanu nan fapa pawl, nan hnen-um nunau mipa pawl, Levi mi pawl le ramdangmi pawl, nupa nei lo farah ngakṭah pawl le nuhmei pawl thawn lungawi zetin puai cu nan tuah pei.

¹⁵Pathian nan biaknak hmunah hi puai cu ni sarih sung tuah tahrat in BAWIPA nan Pathian cu thangṭhat uh. BAWIPA in nan lo rawl le nan hnaṭuannak ah thlawsuah a lo pek ruangah nan lungawi uh.

¹⁶“Nan hrin zate sungih mipa hmuahhmuah cu BAWIPA biaknak hmunah kum khatah voithum nan ra pei. Lantak Puai, Rawl Laak Puai le Puanthlam Puai ah nan ra pei. Zozo khal laksawng nan keng ciar ding ih,

¹⁷BAWIPA ih thlawsuah tam a dongtu in tam deuh, mal a dongtu in mal deuh, BAWIPA nan Pathian hnenah laksawng nan keng ciar pei.”

¹⁸“BAWIPA nan Pathian ih a lo pek dingmi khawpi sungah nan hrin ciar in thuṭhentu le a dang upa pawl nan hril ciar pei. Hi thuṭhentu pawl in misenpi pawl ih thu cu namnuai cuangmi nei loin an ṭhen pei.

¹⁹Dik lozet le ṭanbul nei in thu an ṭhen lo pei; cule nawhthuh tla an lak lo pei, ziangahtile nawhthuh cun mifim le mifel pawl ih mit tiangin a cawtter ih an thuṭhenmi cu a sualter ṭheu.

²⁰Thudik le thuding lawnglawng nan hawl pei; cutiin nan nung asile BAWIPA nan Pathian ih a lo pek dingmi ram cu nan luah ding ih caan reipi nan nung ding.

²¹“BAWIPA nan Pathian hrangih biakṭheng nan dawl tikah ziangbangtuk thing hman a kiangkapah biak dingah nan phun lo pei.

²²Cule ziangvek lungto hman biak dingah nan phun lo pei; cu pawl cu BAWIPA ih huat zawng an si.”