Read Falam Chin DAAN PEKSALNAK 17 Bible Online

DAAN PEKSALNAK 17 - Falam Chin bible

DAAN PEKSALNAK 17

¹“BAWIPA nan Pathian hnenah raitluang lomi cawcang a si lole tuu cu thawinakah nan pe lo pei; ziangahtile BAWIPA nan Pathian ih huatmi a si.

²“Thuṭhimnak ah nan khawsungah nunau siseh, mipa siseh,

³BAWIPA ih thupekmi bal tahrat in khawzing dang, a si lole ni maw, thlapi maw, arsi pawl maw a biak ih cu pawl cu a rian. Cuticun BAWIPA ih parah a sual ih a thukamnak a balsiat a si,

⁴ti nan theih a si ahcun felzet le kimzet in nan zingzoi pei. Cuvek thil ṭha lo cu Israel mi lakah a um ngaingai a si ahcun,

⁵a tuahtu cu hnarleng ah nan suah pei ih lungto in nan deng that pei.

⁶Theihpitu pahnih a si lole pathum an um ahcun amah cu thah a si pei; asinain theihpitu pakhat lawng a um ahcun thah a si lo pei.

⁷A thu theihpitu pawl cun lungto in an deng hmaisa bik pei ih cuih hnuah a dang pawl in an deng ve pei; cuticun hi thil borhhlawh cu nan rehter pei.

⁸“Cun thah awknak thu ah maw, leiram le thilri cuh-awk thu-ah maw, taksa tuahmawhnak, lukuai hnacat thu-ah maw, voikhat khat cu hi thuṭhentu pawl ih an rel thei lomi thu a um ding. Cutikah Pathian ih a hril dingmi biaknak hmunah feh uhla,

⁹cuih thu cu Levi mi puithiam le cutawkih an retmi thuṭhentu pawl hnenah va thlen uh; anmah in rel hai seh.

¹⁰Anmah in an relcat pei ih an relcat vek rori in nan tuah pei.

¹¹An thurel catmi cu nan pom pei ih an thusimmi vek rori in nan thlun pei. An relcatmi ihsin vorhlam ah siseh, kehlam ah siseh, nan pial hrimhrim lo pei.

¹²Cuih thurel cattu - puithiam siseh, a si lole thuṭhentu siseh, an thu nan ngai lo a si ahcun a ngai lotu cu thah a si pei. Cuticun Israel miphun sungih thil ṭha lo cu nan cemter pei.

¹³Cumi cu misenpi in an theih tikah ralrinnak an nei pei ih cuvek cu an tuah ngam nawn lo ding.”

¹⁴“BAWIPA nan Pathian ih a lo pek dingmi ram nan luah ih umhmun nan khuar ṭheh tikah nan kiangkapih a ummi miphun pawl vekin siangpahrang neih ve nan duh leh ding.

¹⁵Cutiih nan hun duh ngaingai tikah BAWIPA ih a hrilmi kha nan hril thei ve nak dingah ralring uh. Cuih siangpahrang cu nanmah ih miphun sungin a si ding; ramdangmi cu siangpahrang ah nan tuah lo pei.

¹⁶Siangpahrang cun a ralkap hrangah rang tampi nei hlah seh; rang lei dingah Izipt ramah mi thlah hlah seh, ziangahtile BAWIPA in amah ih minung pawl cu Izipt ramih vung thlengsal lo dingin thu a pek zo a si.

¹⁷Siangpahrang cu nupi tampi nei ding a si lo, ziangahtile BAWIPA ih lamzin in a pialter ding. Sui le ngun khawl tahrat in milian si duh hlah seh.

¹⁸Siangpahrang a can tikah Levi mi puithiam pawl in felteih an nganmi Pathian ih thukham le daan pawl khumnak cabu pakhat cu nei seh.

¹⁹Cuih cabu sungih a ummi daan pawl cu feltein a thlunnak dingah le BAWIPA ṭihzah a thiamnak dingah cabu cu a kiangah re in a nunsung hmuahhmuah siar ringring seh.

²⁰Cutiih a tuah asile a unau dang Israel mi pawl hnakin ka ṭha deuh a si, tiah a ruat-aw lo ding ih BAWIPA ih thupekmi ihsin a peeng lo ding. Cule amah le a tefa pawl in Israel ram cu san tampi an uk ding.”