Read Falam Chin DAAN PEKSALNAK 2 Bible Online

DAAN PEKSALNAK 2 - Falam Chin bible

DAAN PEKSALNAK 2

¹“A netnak ah BAWIPA ih thupeknak bangtuk in kan kir ih Tipi Sen [2] lamin nelrawn ramcaar ahcun kan feh ih Edom tlangpar ramah reipi kan vakvai a si.

²Cule BAWIPA in ka hnenah,

³‘Hi tlangpar ramah hin reipi nan vakvai zo ih atu cu saklam ah hung feh thlang uh,’ i ti.

⁴A tanglamih daan pawl cu nan hnenih pek dingah i sim: ‘Atu cun nan laicinpi a si vemi Esau ih tesinfa pawl umnak Edom tlangpar ram pal phah in nan feh ding. Annih cun an lo ṭihzet ding;

⁵asinain annih cu do hlah uh. Ziangahtile an ram cu ka lo pe lo ding; ke zaphak tia hman nan co lo ding. Edom ram cu Esau ih tesinfa pawl hnenah ka pe zo a si.

⁶Rawl le tidai cu nan ei nan in dingah nan lei thei ding,’ a ti.

⁷“BAWIPA nan Pathian cun nan tuahmi ziangtinkim ah a lo thlawsuah a si ti kha cing ringring uh. Hi tluk kaumi nelrawn ramcaar ih nan vahvaih sung hmuahhmuah ah amah in a lo kilkhawi a si. Kum sawmli liangluang nan hnenah a um ringring ih zianghman hlawhsammi nan nei dah lo.

⁸“Curuangah Elath khua le Eziongeber khua in a rami Arabah lamzin ihsin kan pial ih Tipi Thi lamah kan feh; cutawk ihsin kan her sal ih saklam Moab ram lamah kan hung feh.

⁹Cutikah BAWIPA in, ‘Lot ih tesinfa Moab mi pawl cu hnaihnawhnak pe hlah uh. A do khal do hlah uh. Ar khawpi cu an hnenah ka pe zo ih an ram cu malte hman nan co ding a um lo a si,’ i ti,” tiah a sim.

¹⁰Ar khawpi-ah cun Emim an timi mikei vekih mi tumzetzet miphun phunkhat an rak um. Emim pawl cu Anakim pawl vekin mi saangzetzet phun an si ve.

¹¹Anakim pawl cu Refaim ti tla in an ko ih Emim pawl khal Refaim ti tla in an ko a si. Asinain Moab mi cun Emim tiah an ko.

¹²Edom ramah Hor mi pawl an rak um naón Israel mi pawl in BAWIPA ih a pekmi ram sungih a rak ummi pawl an dawisuak bangtuk in Hor mi pawl cu Esau ih tesinfa pawl in an dawisuak ih an miphun in an ti hloral ih an ram cu an run luahta.

¹³“Cun BAWIPA ih in fial vekin Zered tiva cu kan tan.

¹⁴Kadesh Barnea in kan suak ih Zered tiva kan tan tiang tikcu cu kum sawmthum le kum riat a rei. BAWIPA ih a rak sim cia bangtuk in cuih sungah ral do thei mipa hmuahhmuah cu an zate rori in an thi ṭheh a si.

¹⁵Cupawl cu pakhat hman luat lo tiangih an thih thluh hlan lo BAWIPA in a hrem.

¹⁶“Raldo thei mipa hmuahhmuah an thih ṭheh tikah,

¹⁷BAWIPA in,

¹⁸‘Tuihsun ah Ar khua lamzin in Moab ram cu nan tan phah ding a si.

¹⁹Cuih hnuah Lot ih tesinfa Ammon mi pawl ih ram kiang tiang nan thleng ding. Anmah cu hnaihnok hlah uhla a do khal do hlah uh. Ziangahtile an hnenih ka pek ciami ram cu malte hman nan hnenah ka lo pe lo ding,’ a ti,” tiah a ti.

²⁰Cuih ram cu Refaim mi pawl an rak um dah ruangah Refaim ram ti khalin an ko. Asinain Ammon mi pawl cun Zamzummim tiah an ko.

²¹Anmah tla cu Anakim pawl vekin an sang; an tamzet ih a cah khal an cak ngaingai. Asinain BAWIPA in a siatsuah thluh hai ih an ram cu Ammon mi pawl in an long ih an luah thluh.

²²Cutivek thotho in Edom tlangpar ramih a ummi Esau tesinfa Edom mi pawl parah BAWIPA in a rak tuah zo a si. Hor mi pawl cu a siatsuah thluh ih an ram cu Edom mi pawl in an long ih an luah thluh; curuangah tuihsan tiangin an um lanta.

²³Cule Krete[3] tikulh ih a ummi pawl in thlanglam ramah Gaza tiang khawteteih a ummi Avvim mi pawl an siatsuah thluh ih an ram cu an long ih an luah thluh a si.

²⁴“BAWIPA in, ‘Atu tho uhla Arnon tiva cu tan uh. Amor mi, Heshbon siangpahrang Sihon cu a ram hmuahhmuah thawn nan kut sungah ka lo pek zo. Amah cu do uhla a ram cu luah uh.

²⁵Tuihsun in khuazakip mi hmuahhmuah parah nanmah ṭihnak ka umter ding. Nan hmin an sal men hmanah mi hmuahhmuah in an ṭih an khur ding a si.’

²⁶“Cule Kedemoth nelrawn ihsin Heshbon siangpahrang Sihon hnenah palai ka thlah ih hiti in remnak thu ka cah:

²⁷‘Na ram sungin in fehter hram aw. Kan fehnak lamzin in khui hmanah pial phah loin kan lansuak mai ding.

²⁸Rawl kan eimi le tidai kan inmi man pawl cu kimtein kan lo pe ko ding. BAWIPA kan Pathian ih in pekmi ram thleng dingah Jordan tiva kan tan hlan tiang,

²⁹na ram sungin feh lan ding lawnglawng hi kan duhmi a si. Edom ih a ummi Esau tesinfa pawl le Ar ih a ummi Moab mi pawl tla in an ram sungin in lanter zo a si,’ ka ti.

³⁰“Asinain a ram sungin feh ding cu siangpahrang Sihon in a siang lo. Amah kan nehnak dingah le atuih kan luahmi a ram hi kan lak theinak dingah BAWIPA nan Pathian in a thinlung a ruhter ih midodaltu a siter.

³¹“Cun BAWIPA in ka hnenah, ‘Zohhnik, siangpahrang Sihon le a ram cu a lo do theitu ding an si nawn lo. A ram cu lak awla luah thluh aw,’ i ti.

³²Sihon le a ralkap pawl cu kanmah do dingah Jahaz khua kiangah an ra thleng.

³³Asinain BAWIPA kan Pathian in Sihon cu kan kut sungih a ret zo ruangah amah cu kan that ih a fapa pawl le a ralkap pawl khal kan that ṭheh.

³⁴Cuih tlunah an khawpi hmuahhmuah kan lak ih kan siatsuah thluh; nunau, nauhak le mipa an zatein kan that ṭheh; a luatmi pakhat hman an um lo.

³⁵An ṭilva khal kan lak ṭheh ih an khawpi pawl kan ram.

³⁶BAWIPA kan Pathian in nehnak in pe ih an khawpi hmuahhmuah, Arnon tiva kiangih ummi Aroer khua ihsin Gilead tiang, tiva kapih a ummi khua tiangin kan lak ṭheh a si. An khua kulhnak ralhruang pawl cu kan hrangah zianghman an si lo; a saangtuk timi pakhat hman an um lo.

³⁷Sikhalsehla BAWIPA kan Pathian in feh lo dingih in kham mi ram pawl - Ammon ram kiangkap, Jabbok tivakap, tlangpar ramih khawpi pawl le a dangdangah cun kan feh lo.”