Read Falam Chin DAAN PEKSALNAK 21 Bible Online

DAAN PEKSALNAK 21 - Falam Chin bible

DAAN PEKSALNAK 21

¹“BAWIPA nan Pathian in nan luah dingih a lo pek dingmi ram sungah mi pakhatkhat hramlakah an that ih a thattu nan thei lo a si ahcun,

²nan hotu le nan thuṭhentu pawl cu cuih miruak umnak ah an feh pei ih a kiangkapih ummi khua pawl ziangzat a hla ti kha an tah vivo pei.

³Cun ruak umnak ihsin a nai bik khua ih khawsung upa pawl in hna an ṭuanter dah hrih lomi, cawkawn a hngawng ih khih dah hrih lomi caw note pakhat an hril pei.

⁴An hruai pei ih a kang dah lomi tiva ah an vun fehpi pei ih tivakap leileh dah lomi le rawl ciin dah lonak hmunah a hngawng in an bilh that pei.

⁵Cule Levi hrin puithiam pawl an ra ding, ziangahtile tawh-awk thu-ah siseh, lukuai hnacat thu ah siseh, anmah cu thuṭhentu ding an si. BAWIPA nan Pathian in amah ih hnaṭuan dingah le amah ih hminin thlawsuahnak petu dingah a hrilmi an si.

⁶Cule miruak umnak ihsin a nai bik khua ih khawsung upa pawl in an thahmi caw parah cun an kut an kholh pei ih,

⁷‘Hi mipa thattu cu kannih kan si lo; a thattu zo a si ti thutheitu khal kan si lo.

⁸Curuangah maw BAWIPA, Izipt ram ihsin na runsuakmi Israel na minung pawl cu ngaithiam hai aw. Mawh nei loih thisen cu kan parah thlenter hram hlah awla in ngaithiam hram aw,’ an ti pei.

⁹Cutiin BAWIPAÓI hmaika-ah thildik nan tuah nak thawngin mawh nei lo pa-ih thisen suah ruangih mawhphurhnak ihsin an luat ding.”

¹⁰“BAWIPA nan Pathian in nan ral pawl ih tlunah nehnak a lo pek tikah nan kaihmi tampi an um ding.

¹¹Nanmah lakah pakhatkhat in nan kaihmi lakah nunau hmel ṭha pakhat a hmu ih ṭhit a duh a si ahcun,

¹²a inn ah tlunpi sehla cuih nunau cun a sam meet in a tin tan seh.

¹³A hnipuan tla thleng thluh seh. Cule raldonak ih a thimi a nu le a pa ngai in thla khat pumpi sung mipa inn ahcun a um pei. Cuih hnu lawngah a ṭhi ding ih a nupi a si ding; anih khal a pasal a si ding.

¹⁴Neh hnuah a nupi dingih a duh nawn lo a si ahcun daitein a fehter pei. A thang a siatter zo ruangah sal vekin a tisiat lo pei ih a zuar fawn lo pei.”

¹⁵“Thuṭhimnak ah mipa pakhat in nupi pahnih a nei ih an pahnih in fapa an hring veve; asinain a duh deuh lomi a nupi ih hrinmi fapa cu upa deuh a si.

¹⁶Cuti a si ahcun a faale hnenih ro a ṭhen hai tikah duh hleimi nei hlah seh; fapa upa bikih co ding ro kha fapatir a si lomi a nupi duh deuhih fa hnenah pe hlah seh.

¹⁷A duh deuhmi a nupi ih fa a si lo hmanah a fapatir cu mi dangih comi let hnih in a rothil sungin a pek pei. Ziangahtile a cithlah hmaisa bik fapa a si hrangah fapatir covo cu amah ih ta a si.”

¹⁸“Mi pakhat in fapa a nei ih cuih a fapa cu an sim an hrem rero naón a nu le a pa ih thu a ngai lo ih ziangti hman in an ti thei nawn lo.

¹⁹Cuti a si ahcun a nu le a pa in khawsung upa hnenah an rak hruai pei ih thuṭhennak hmun kotka kiangah a thu cu an rel pei.

²⁰A nu le a pa in khawsung upa hnenah, ‘Hi kan fapa cu mi-luhlul, sim theih lo minung a si ih kan thu a ngai hrimhrim lo; zu a ri ringring ih kan neihmi hmuahhmuah a ei-ek thluh zo,’ an ti pei.

²¹Cule khawsungmi pawl in cupa cu lungto in an deengthat pei ih cubangtuk thil ṭha lo cu a reh ding. Israel mi pawl in an thei ṭheh ding ih an ralring ding.”

²²“Amah ih sual ruangah mi pakhat cu an that ih a ruak cu thingparih an thlai a si ahcun,

²³cutawkah zan tiang umter ding a si lo. A cuih sunah nan phum ding, ziangahtile thingparih ruak thlai cu Pathian siatcam tuar a si. BAWIPA nan Pathian ih a lo pek dingmi ram nan borhhlawhter lonak dingah ruak cu nan phum pei.