Read Falam Chin DAAN PEKSALNAK 23 Bible Online

DAAN PEKSALNAK 23 - Falam Chin bible

DAAN PEKSALNAK 23

¹“Zohman tilpermi le zahmawh tanmi cu BAWIPA ih minung lakah siarcih a si lo pei.

²“Fasawn cu, a tefa san sanhra tiangin, BAWIPA ih minung lakah siarcih a si lo pei.

³“Ammon mi, a si lole Moab mi cu, an tefa san sanhra tiangin, BAWIPA ih minung ah siarcih an si lo pei.

⁴Izipt ram in nan suak ih nan fehnak lamzin ah ti le rawl an lo pe duh lo. Anmah in Mesopotamia ram Pethor khua in Beor ih fapa Balaam cu nanmah camsiat dingah an sawm ih hlawh an phal a si.

⁵Asinain BAWIPA nan Pathian in Balaam ih thu cu a ngai duh lo; a lo duhdawt hai ruangah Balaam ih camsiatnak cu thluasuahnak ah a canter riangri a si.

⁶Miphun pakhat nan si sungah cun hi miphun pawl bawm dingah zianghman tuah duh hlah uh; an ṭhansonak khal zianghman ngaihtuah hlah uh.

⁷“Edom mi pawl cu hmuhsuam hlah uh; nan sungkhat laicinpi an si. Cule Izipt mi tla hmuhsuam hlah uh; nan rak um dahnak ram a si.

⁸A santhumnak ih a suakmi an tefa pawl cu BAWIPA ih minung lakah an tel thei ding a si.”

⁹“Ral nan do ih riahhmun ih nan um tikah mithiang loih a lo cantertu ding hmuahhmuah cu nan hrial pei.

¹⁰Mi pakhat cu zanih mang a man ruangah a ti a suak ih mithiang loih a can tikah riahhmun in a lengah a suak pei ih cutawkah a va um pei.

¹¹Zanlam ah ti a kholh-aw pei ih nitlak zawng ah riahhmun ah a lut sal pei.

¹²“Nan riahhmun in a lengah pawngthawhnak hmun nan tuah pei ih pawngthawh nan duh tikah cunah nan feh pei.

¹³Thil dang tlunah cawhleek fate keng uhla leilung nan lai pei ih nan thawh ṭheh in nan silh sal pei.

¹⁴Nan riahhmun cu thiangfaite in ret uh, ziangahtile nanmah hum dingah le nan ral pawl tlunih nehnak petu dingah BAWIPA nan Pathian cu nan hnenah a feh ih nan riahhmun ah a um a si. BAWIPA in a lo dungtun lonak dingah a mithmuh ih a mawi lomi thil zianghman nan umter lo pei.

¹⁵“Sal pakhat cu a bawipa hnenin a tlan ih na hnenah him dingin a rat a si ahcun a bawipa hnenah rak khir sal hlah.

¹⁶A duhnak ah umseh; nanmah lakah khua pakhatkhatah nan lakah um sehla nan neh-nen lo pei.

¹⁷“Israel mi cu nunau siseh, mipa siseh, biakinn ih hlawhhlang si hrimhrim hlah hai seh.

¹⁸Cuti hlawhhlannak ihsin ngahmi paisa cu thukam kimternakah tiah BAWIPA nan Pathian ih biakinn ah rak keng hlah hai seh. Cubangtuk pawl cu BAWIPA hmaiah ningsinza an si.

¹⁹“Paisa le rawl le thil dangdang, nan unau Israel mi hnenih nan coih tikah a ṭhang va la hlah.

²⁰Ramdangmi hnenih a ṭhang na lak khalle nan unau Israel mi hnen cun la hlah. Hi daan hi thlun uhla, nan luah dingmi ramah hin nan ṭuannak le nan hawlnak tinah BAWIPA nan Pathian in mal a lo sawm ding a si.

²¹“BAWIPA nan Pathian hnenih thukamnak nan tuah ahcun cuih nan thukam cu pelh loin kimter tengteng uh. Na thukam cu BAWIPA in kimter dingih a lo duhsak hrangah na kimter lo tikah sual a si.

²²BAWIPA hnenih thukam tuah loih um cu sual a si lo;

²³asinain na lungthote in thukamnak na tuah ahcun kimter tengteng aw; BAWIPA Pathian hmaiah na hmurka in a suak zo mi thukamnak a si.

²⁴“Na unau Israel mi ih sabit hmuansung ih na feh tikah na duhzat in sabit rah cu na ei pei; asinain na bawm sungah san tahrat in zianghman na phur lo pei.

²⁵Lo sung lamzin in na feh tikah fangvui cu na feh phah in na dok thei; asinain favah cun pakhatte hman na aat lo pei.