Read Falam Chin DAAN PEKSALNAK 24 Bible Online

DAAN PEKSALNAK 24 - Falam Chin bible

DAAN PEKSALNAK 24

¹“Mipa pakhatkhat in nupi a ṭhi ih tikcu a hung rei deuh tikah pakhatkhat a ngaih lo zawng a um ruangah nupi dingah a duh nawn lo. Cutikah maaknak ca a ngan ih a pek hnuah a inn ihsin a dawi.

²Cuih hnuah mipa dang pakhat a pasal saal.

³Hi a pasal khal cun a duh saal lo ih maaknak ca a ngan ih a pek hnuah a inn ihsin a dawi ve. Thuṭhimnak ah, a neta sawn a pasal cu a thi tisehla,

⁴ziangbangtuk thu a um khalle a hmaisaih a pasal cun a ṭhi sal hrimhrim lo pei; a hrangah nunau nu cu a borhhlawh zo a si. A ṭhi ṭhiamṭhiam a si ahcun BAWIPA ih hmaiah fihnungza a si. Hi vek sualnak ruangah BAWIPA nan Pathian ih a lo pek dingmi ramah mawhnak nan thlenter lo pei.”

⁵“Nupi ṭhi pekte cu ralkap ah fehter ding a si lo; a dang hnaṭuan ding khalah fehter ding a si lo. Inn ah um in a nupi hnangamter dingah kum khat sung cu olh ding a si.

⁶“Mi pakhatkhat in na thil a lo cawi tikah a fang rialnak lungto cu kam-awhnak ah nan laksak lo pei; ziangahtile a pumcawmnak a si.

⁷“Zokhal in a unau Israel mi a ruk ih salih a tuah, a si lole salih a zuar a si ahcun amah cu thah a si ding. Cuticun hi thil ṭha lo cu nan rehter pei.

⁸“Nan lakah phaarnat a um pang a si ahcun Levi mi puithiam ih a lo fial vekin nan tuah pei; keimah in daan ka pek thluh zo ih cuih pawl cu nan thlun pei.

⁹Izipt ram in nan suah laiah BAWIPA nan Pathian in Miriam parah ziangbangtuk in a tuah ti kha hngilh hlah uh.

¹⁰“Mi pakhat hnenah thil pakhatkhat na coih ih kam-awhnak ih a puan pek a lo tummi kha a inn sungah lut tahrat in lak hlah.

¹¹A inn lengah rak um awla amah in lo pe seh.

¹²Mi zonzai a si ahcun a puan cu zan tiang na hnenah ret hlah.

¹³Zan ihnak a neihnak dingah nitlak zawng ah khirh sal aw. Cutiin na tuah asile zanah ihnak puan a nei ding ih na parah a lung a awi ding ih BAWIPA nan Pathian tla na parah a lung a awi ding.

¹⁴“Na unau Israel mi siseh, ramdangmi siseh, na khawsungah a ummi hlawh na phalhmi mizonzai le mitlasam-ih hlawhman cu namnuai in na hreng lo pei.

¹⁵Nitinte a ni khat hlawhman cu ni tla hlanah pe aw. Cuih paisa cu a nunnak hrangah a ṭul ih cumi lawng a ring a si. Na pek lo a si ahcun BAWIPA ih hnenah a au a ngen ding ih mawhphurtu cu nangmah na si ding.

¹⁶“An faale ih sual ruangah an nu le an pa thah ding a si lo; an nu le an pa sual ruang khalah an faale thah ding a si lo. Mi pakhat cu amah ih tuah sualmi ruang lawnglawngah thah ding a si.

¹⁷“Ramdangmi le nu le pa nei lo farah pawl ih an co ding vo cu diktein nan ruahsak pei; kam-awhnak ah nuhmei nu-ih puan cu laksak hlah uh.

¹⁸Sal ih nan taannak Izipt ram in BAWIPA nan Pathian in a lo suah kha ruat ringring uh. Curuangah a si hi daan hi ka lo pek.

¹⁹“Rawl nan lak tikah nan ah ciami sungin nan khawm hrelhmi a um ahcun kirsal in va la nawn hlah uh. BAWIPA nan Pathian ih thlawsuah cu nan ṭuan nan hawlnak kipih a umnak dingah, cuih rawl cu ramdangmi, nu le pa nei lo farah le nuhmei pawl hrangah va taan uh.

²⁰Olif tla voikhat nan lak hnuah cun a leep va hawl nawn hlah uh; ramdangmi, nu le pa nei lo farah le nuhmei pawl hrangah si ko seh.

²¹Sabit na lawh tikah voikhat na lawh hnuah cun va hawl nawn hlah; a taanglaimi sabit cu ramdangmi, nu le pa nei lo farah le nuhmei pawl hrangah zuah aw.

²²Nannih tla Izipt ramih sal nan taan kha hngilh hrimhrim hlah uh. Curuangah a si hi daan hi ka lo pek.