Read Falam Chin DAAN PEKSALNAK 25 Bible Online

DAAN PEKSALNAK 25 - Falam Chin bible

DAAN PEKSALNAK 25

¹“Thuṭhimnak ah Israel mi pahnih cu thu an neih ruangah thurelnak hmun an thleng ih thureltu pawl in an thu an ṭhen tikah pakhat cu a mawh an ti ding ih a dang pakhat cu a mawh lo an ti ding.

²A mawhtu pa cu misenpi hmaiih vuak dingin an rel a si ahcun thuṭhentu in leilungah a bokter ding ih amah cu vuak a si ding. Voi ziangzat vuak ding a si ti cu ziangtlukin a mawh ti parah lairel a si ding.

³Voi sawmli tiang an vuak thei; cuhnak tam cu an vuak thei lo. Cuhnak tam an vuak a si ahcun nan unau misenpi hmaiah mual nan photer tuk ding a si.

⁴“Cawcang cu fang a ciil laiah a hmur nan ṭem lo pei.”

⁵“Unau pahnih hmun khatah an um ih pakhat deuh cu fapa pakhat hman nei loin a thih ahcun a nupi cu an sungkhat sung siar lo a lengah pasal a nei thei lo ding; a pasal ih unau pa cun a ṭhit ding a si.

⁶Cutiin an ṭhi-aw ih fapa a neih a si ahcun a thimi a u-pa ih fapa ah siar a si ding; cuticun a hnam a hlo lo ding.

⁷Sikhalsehla a unau in a ṭhit duh lo a si ahcun nunau nu cu khawsung upa hnenah a feh pei ih, ‘I ruahpi hnik uh; ka pasal ih unau pa in a ṭuanvo a la duh lo; Israel mi lakah a unau-ih hmin cu a nunter tum lo a si,’ a ti pei.

⁸Cutikah khawsung upa pawl in cupa cu an ko pei ih an sim pei. Aṭhi duh ṭhiamṭhiam lo a si ahcun,

⁹a unau-ih nupi in khawsung upa pawl hmaiah cun cupa cu a pan ding ih a kedam pakhat kha a lak sak pei ih, ‘A unau hrangih tefa neih a duh lotu cu hiti in tuah ding a si,’ a ti hnuah a hmai ah cil a phui pei.

¹⁰Israel mi lakah a innsang cu ‘Kedam Lon Mipa-ih Innsang,’ tiah kawh a si ding.”

¹¹“Mipa pahnih an sual-aw ih pakhat pa cu a nupi in a ra run ih a dang pa-ih tilbawr in a dirhsak a si ahcun,

¹²a kut cu tan ding a si; zaangfah ding a si lo.

¹³Nan dip sungah cuailung a ritmi le a zaangmi tiah pahnih nei hlah uh; nan rawl tahnak reel tla a tum le a te tiin nei hlah uh.

¹⁵BAWIPA nan Pathian in a lo pek dingmi ram sungah reipi nungdamih nan umnak dingah a dikmi cuailung nei uhla a dikmi rawl reel nei uh.

¹⁶Cubangtuk ih thil a tuah ih mi bumtu cu BAWIPA in a hua a si.”

¹⁷“Izipt ram in nan suah laiah Amalek mi pawl in nan parih thil an tuahmi kha vun ruat hnik uh.

¹⁸Pathian ṭihzahnak an neih lo ruangah nan tha a bang ih nan colhnom laifangah nan dunglam in an lo dawi ih midang a man thei lo pawl kha an lo thah sak thluh a si.

¹⁹Curuangah BAWIPA nan Pathian in a lo pekmi ram nan thlen ih ral do ding nan neih nawn lo tikah Amalek mi pawl cu nan that thluh pei. An miphun hmin khal khawhra vanhnuai ah um nawn lo dingin nan cimih thluh pei. Himi cu hngilh hrimhrim hlah uh.”