Read Falam Chin DAAN PEKSALNAK 26 Bible Online

DAAN PEKSALNAK 26 - Falam Chin bible

DAAN PEKSALNAK 26

¹“BAWIPA nan Pathian in ro ih a lo pekmi ram nan luah ih nan um hnuah,

²nan leiram ihsin a suak ih nan neihmi rawl thar hmuahhmuah cu bawm sungah nan san pei ih nan Pathian biaknak hmunah nan keng pei.

³Cutawkih hnaṭuantu puithiam hnenah, ‘Kan pu le kan pa hnenah pe dingih a rak tiam zomi hi ramah ka thleng zo a si, ti langternak ah hi thil cu BAWIPA ka Pathian hnenah ka pek a si,’ tiah a ti pei.

⁴“Cutikah na bawm cu puithiam in a cawi pei ih BAWIPA na Pathian ih biakṭheng hmaiah cun a ret pei.

⁵Cule BAWIPA na Pathian ih hmaiah nang in, ‘Ka pu cu Aram mi a si ih, inn nei lo mivakvai a rak si. Izipt ramih a vung feh tikah a innsang cu mi malte lawng an si. Asinain Izipt ram sungah mi tamzet le miphun tumzet ah an cang.

⁶Cule Izipt mi pawl in in tisiat ih salah in tuah; hnaṭuan khung in ṭuanter.

⁷BAWIPA, kan pu le kan pa ih Pathian hnenah kan au ih kan aunak aw cu a thei; kan tuarnak, kan harsatnak le kan zonzaihnak a hmu.

⁸Curuangah a huham le a cahnak baan phar in mangbangza thil khawruahhar le rapthlakza thil pawl cu a tuah ih Izipt ram ihsin in runsuak.

⁹Hi ram ah in thlenpi ih cawhnawi le khuaitizu a luannak ram hi in pek.

¹⁰Curuangah amah BAWIPA ih in pekmi rawl thar pawl cu BAWIPA hnenah ka pek a si,’ tiah ṭihzahnak thawn na ti pei. “Cun BAWIPA na Pathian hmaiah cun na bawm cu na ṭhum pei ih BAWIPA cu lukuun in na biak pei.

¹¹Cule BAWIPA nan Pathian in thlawsuah a phunphun a lo pek ruangah na innsang le Levi mi pawl le nanmah lakih a ummi ramdangmi pawl thawn lungawi aipuang in nan lawm pei.

¹²“Kum thumnak ah nan lo rawl ṭhenhra-ih ṭhenkhat cu Levi mi, ramdangmi, nu le pa nei lo farah le nuhmei pawl hnenah nan pek pei. Cuticun an ṭul zat in cuih khawsungah ei ding an nei ciar ding a si. Cutiih nan tuah ṭheh tikah,

¹³BAWIPA nan Pathian ih hnenah, ‘ṭhenhra ṭhenkhat thianghlim cu ka inn ah zianghman a taang nawn lo; Levi mi, ramdangmi, nu le pa nei lo farah le nuhmei pawl hnenah thu i pek bangtuk in ka pe thluh zo. A thiangmi ṭhenhra ṭhenkhat thu-ah cun na thupek bangtuk in ka tuah thluh zo, hrelhmi ka nei lo; hngilhmi khal ka nei lo.

¹⁴Mithi ngai in ka um lai ṭhenhra ṭhenkhat sungin ka eimi a um lo; mithiang lo ka si laiah ka inn ihsin hmun dangah ka thiarmi a um lo ih mithi ka siahmi khal a um fawn lo. Maw BAWIPA ka Pathian, na thu ka lo ngai ih na thupekmi cu ka tuah thluh zo.

¹⁵Vancung na umnak hmun thianghlim, vancung ihsin Israel na minung pawl cu run thlawsuah awla kan pi le kan pu hnenih na rak tiam bangtuk in hi ram - cawhnawi le khuaitizu a luannak ram - tla hi thlawsuah run pe hram aw,’ tiah nan ti pei.”

¹⁶“Tuih sunah BAWIPA nan Pathian in a lo pekmi daan hmuahhmuah thlun dingah a lo fial. Cu ruangah nan thinlung le nan nunnak zate thawn pom in thlun uh.

¹⁷Tuih sunah BAWIPA cu nan Pathian ah nan hril zo. A thu ngai dingah le a daan le a thukham pawl thlun dingah nan kam-aw zo a si.

¹⁸A lo tiamkam bangtuk in tuih sunah BAWIPA in amah ih minung taktak, a sunloih mi si dingah a lo pom hai. Curuangah a daan hmuahhmuah thlun dingin a lo fial a si.

¹⁹Leitlun ih a seemsuahmi miphun hmuahhmuah hnakin hmun sang deuh ah a lo ret hai ding. A lo tiamkam bangtuk in nannih cu amah ih miphun thianghlim nan si pei ih amah ih hmin cu a thangṭhattu le a cawimawitu nan si ding,” tiah a ti.