Read Falam Chin DAAN PEKSALNAK 27 Bible Online

DAAN PEKSALNAK 27 - Falam Chin bible

DAAN PEKSALNAK 27

¹Cun Moses le Israel hotu pawl in misenpi hnenah, “Tuih sunih kan lo pek mi thukham hmuahhmuah cu nan thlun thluh pei.

²Jordan Tiva nan tan ih BAWIPA nan Pathian ih a lo pekmi ram nan thlen ni ah lungpheng tumpipi nan phun pei ih si nan hnih hnuah,

³hi daan le thuzirhnak hmuahhmuah hi nan ngan pei. BAWIPA, nan pu le nan pa ih Pathian in a lo tiamkam bangin cawhnawi le khuaitizu a luannak ram ah nan luh ih,

⁴Jordan Tiva ral nan thlen tikah hi lungpheng tumpipi cu tuih sunih ka lo ti bangtuk in Ebal Tlang parah nan phun pei ih si nan hnih pei.

⁵Thir hriamhrei ih ser lomi lungto in biakṭheng nan dawl pei;

⁶ziangahtile BAWIPA nan Pathian hrangih nan dawlmi biakṭheng cu thir hriamhrei ih ser lomi lungto in a si ding. Cutawkah mei-ur thawinak le,

⁷remnak thawinak pawl tla nan pek pei ih BAWIPA nan Pathian hmaiah lungawite in nan ei tlang pei.

⁸Si nan hnihmi lungto parah cun BAWIPA ih pekmi daan pawl hmuahhmuah cu felte le kimzetin nan ngan pei,” tiah an ti.

⁹Cun Moses le Levi mi puithiam pawl in misenpi hnenah, “Maw Israel mi pawl, daitein um uhla ṭhatein ngaihnik uh. Atu ihsin BAWIPA nan Pathian ih minung ah nan cang zo;

¹⁰curuangah tuih sunih kan lo pekmi daan hmuahhmuah hi pom uhla thlun uh,” tiah an ti.

¹¹Cule Moses in Israel misenpi hnenah,

¹²“Jordan Tiva nan tan hnuah misenpi parih thlawsuah pek a si tikah a tanglam hrin pawl cu Gerizim Tlangah an ding pei: Simeon hrin, Levi hrin, Judah hrin, Issakhar hrin, Josef hrin le Benjamin hrin an si pei.

¹³Cule camsiatnak pek a si tikah a tanglam hrin pawl - Reuben hrin, Gad hrin, Asher hrin, Zebulun hrin, Dan hrin le Naftali hrin cu Ebal Tlangah an ding pei.

¹⁴Cun Levi mi pawl in hiti in ringzet in an au pei:

¹⁵“‘Lungto in siseh, thir in siseh, milem tuah tahrat in a thupte in a betu cu Pathian ih camsiatnak tuar seh; BAWIPA in milem biak cu a hua a si.’ an ti tikah, “Miseenpi pawl in, ‘Amen,’ an ti pei.

¹⁶“‘A nu a si lole a pa ningzahnak a tuahtu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

¹⁷“‘A unau Israel mi-ih ramri a ṭhinsaktu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

¹⁸“‘Mitcaw zinpeng a zawhtertu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

¹⁹“‘Ramdangmi le nu le pa nei lo farah le nuhmei pawl a namnuaitu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

²⁰“‘A pa ih nupi pakhatkhat a sualpitu cu Pathian ih camsiatnak tuar seh; ziangahtile a pa mual a photer a si,’ an ti tikah, “Miseenpi pawl in ‘Amen,’ an ti pei.

²¹“‘Ṭilva a sualpitu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

²²“‘A farnu maw, a farnuseu maw, a sualpitu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

²³“‘A pizon a sualpitu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

²⁴“‘A thupte-ih mi a thattu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

²⁵“‘Mawh nei lomi that dingah nawhthuh paisa a eitu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.

²⁶“‘Pathian ih pekmi daan le thukham pawl a thlun thluh lotu cu Pathian ih camsiatnak tuar seh!’ an ti tikah, “Miseenpi pawl in ‘Amen,’ an ti pei.”