Read Falam Chin DAAN PEKSALNAK 28 Bible Online

DAAN PEKSALNAK 28 - Falam Chin bible

DAAN PEKSALNAK 28

¹“Tuih sunih ka lo pekmi thukham pawl hi feltein nan thlun ih BAWIPA nan Pathian thu nan ngai a si ahcun leitlunih miphun hmuahhmuah hnakin hmun sang deuh ah a lo ret hai ding.

²BAWIPA nan Pathian ih thu ngai uhla hi thlawsuah a phunphun hi nan co ding.

³“BAWIPA in nan khua le nan ram pawl thlawsuahnak a pe ding.

⁴“BAWIPA in fanu fapa, rawl a phunphun le caw le tuurual thlawsuahnak a lo pe ding.

⁵“BAWIPA in na bawm le na kheng tla thlawsuahnak a pe ding.

⁶“BAWIPA in na ṭuan na hawlnak kipah mal a lo sawm ding.

⁷“A lo dotu na ral pawl cu BAWIPA in a lo nehsak ding. Hmun khatih an lo nor hmanah hmun sarih in an tlan ding.

⁸“BAWIPA in na hnaṭuannak cu a thlawsuah ding ih na cuam pawl cu rawl an khat ṭheh ding. A lo pek dingmi ram sungah thlawsuah na ngah ding.

⁹“BAWIPA nan Pathian thu nan ngai ih a thupekmi hmuahhmuah nan thlun ih a lamzin in nan feh a si ahcun a lo kam zo vekin amah ih minung ah a lo tuah hai ding.

¹⁰Cutikah leilung tlunih miphun hmuahhmuah in BAWIPA in amah ih minung si dingah a lo hril kha an hmuh tikah an lo ṭih ding.

¹¹BAWIPA in nan pu le nan pa hnenih a rak tiamkammi ram sungah thlawsuah a lo pe ding ih nan neinungzet ding: tefa tampi, ṭilva tampi le rawl tampi nan nei ding.

¹²BAWIPA in vanih a robawm, van khi ong tahrat in a tikcu caante-ah ruah a run surter ding ih nan hnaṭuanmi hmuahhmuahah hlawhtlinnak a lo pe ding. Cuticun miphun tampi hnenah thilri nan coih ding; asinain nannih cun nan cawi lo ding.

¹³BAWIPA nan Pathian in miphun tampi lakah hruaitu-ah a lo tuah hai ding; thluntu cu nan si lo ding. Tuih sunih ka lo pekmi thukham pawl hi feltein nan thlun a si ahcun nan ṭhangso ringring ding; a ṭumsuk lam cu nan si dah lo ding.

¹⁴Hi daan pawl cu ziangtik hmanah bal hlah uh; khawzing dangdang tla bia in rian hlah uh.”

¹⁵“Sikhalsehla tuih sunih ka lo pekmi daan le thukham pawl hi feltein nan thlun lo ih BAWIPA nan Pathian thu nan ngai lo a si ahcun hi camsiatnak pawl hi nan parah a thleng ding ih nan hnenah a caam ding.

¹⁶“BAWIPA ih camsiatnak cu nan khua le nan ramah a thleng ding.

¹⁷“BAWIPA ih camsiatnak cu nan bawm le sangphut nan nawnnak nan khengah a thleng ding.

¹⁸“BAWIPA ih camsiatnak cu nan sungsuak nan tefa parah siseh, nan lo rawl parah siseh, nan caw le nan tuu faate parah siseh a thleng ding.

¹⁹“BAWIPA ih camsiatnak cu nan luh-nakah a thleng ding ih nan suah-nak khalah a thleng ding.

²⁰“Thil ṭha lo nan tuah ih BAWIPA nan dungtun a si ahcun nan hlohral thluh hlan lo BAWIPA in nan parah vansiat malmaknak, buainak a phunphun le awloksongnak a thlenter ding.

²¹Nan luah dingmi ram sungah pakhat hman nan taan nawn lo tiangin nan parah tlangrai natsia pakhat hnu pakhat a thlenter ding.

²²BAWIPA in mi suanthei natnak, thlinnat le khurhnat pawl a thlenter ding; nan thlairawl pawl cu an ro, an caar, an ngau ding ih siatsuah thluh an si ding. Hi harsatnak pawl cu nan thih thluh hlan lo nan hnenah a um ringring ding.

²³Nan tlunih van khi daar bangin a khal kang ding ih nan ke hnuai ih leilung cu thir tlukin a hak ding.

²⁴Nan siatral thluh hlan lo BAWIPA in leivut le vunnel cu ruah aiah a surter ding.

²⁵“BAWIPA cun nan ral pawl hnenah nanmah lo nehnak a pe ding. Hmun khatión nan nor khalle hmun sarih in nan tlan ding; cule ramih kipah nan vakvai ding ih mi hmuahhmuah hrangah rapthlakza nan si ding.

²⁶Nan thih tikah nan ruak pawl cu leilungih a vakmi ramsa siseh, vanih a zuangmi vate pawl in siseh, an ra ei ding; a dawitu zohman an um lo ding.

²⁷Izipt mi hnenih a thlenter bangin BAWIPA in nan parah khuaihli hma a thlenter ding. Nan taksa parah hnai an khuar hluahhlo ding; nan ruang cu thakpherh hma in a khat ṭheh ding ih an thakzet ding; asinain a dam thei lomi an si ding.

²⁸BAWIPA in nan thinlung cu aa ko in a tuah ding; mitcawtnak nan tuar ding ih thinlung aanhai in nan um ding.

²⁹Mitcaw bangin sunlai ah nan vak ding ih nan lamzin nan hawl thei lo ding. Ziangvek thil nan tuah hmanah nan hlawhtling hrimhrim lo ding. Namnuaimi le thil lon a tuarmi nan si ringring ding ih zohman runtu nan nei lo ding.

³⁰“Fala pakhat na ham khalle midang in an sualpi ding. Inn pakhat na sak khalle a sungah na um dah lo ding. Sabit hmuan na tuah khalle sabit rah na ei dah lo ding.

³¹Na caw pawl cu na mithmuh rori-ah an lo thahsak ding ih a sa cu na co dah lo ding. Na laak pawl cu na hmuhhngan rori-ah an lo dirhsak ding ih an lo pe sal nawn lo ding. Na tuu pawl cu na ral pawl hnenah pek an si ding ih zohman in an lo run lo ding.

³²Na fanu le na fapa pawl cu na mithmuh rori-ah ramdangmi hnenah pek an si ding. Na mit kham duahdo in an rakir pei maw, tiah nitinte na cuan ding naón na con man a um lo ding.

³³Thlairawl harsa zetih na ciinmi pawl cu ramdangmi in an lo long ding ih na ngahmi zianghman um loin hmuhsuamnak le tisiatnak lawng na tong ringring ding.

³⁴Cutiih na hmuhtonmi ruangah na molh phah ding.

³⁵BAWIPA in na ke pawl cu a dam thei lo, a na zetmi hma in a khahter ding. Na luthlung in na kezim tiang cubangtuk hma a khat ṭheh ding.

³⁶“BAWIPA in nanmah siseh, nanmah a lo uktu hrangih nan retmi nan siangpahrang siseh, nan pupa pawl hman an rak um dah lonak, miphun dangih ramah a lo dawihlo hai ding. Cutawkah cun thing le lungih tuahmi milem pawl nan biak ding.

³⁷BAWIPA in ramkipah a lo ṭhekdarh hai ding ih cumi cu mi in an hmuh tikah khawruahhar in an tuk a sum ding. Cule mi-ih dekcokmi le hmuhsuammi nan si ding.

³⁸“Thlaici tamzet nan tuh ding naón nan rawl cu kharbok in an ei ding ih nan lakmi rawl cu malte lawng a si ding.

³⁹Sabit hmuan nan tuah ding ih nan zoh ṭhazet ding naón paa-ngang in an ei thluh ding; sabit rah nan la lo ding ih sabitti khal nan in ngah lo ding.

⁴⁰Nan ram sung khuazakip ah olif thingkung an kho ding, asinain a rah cu an ṭil thluh ding ih olif siti zianghman nan ngah lo ding.

⁴¹Fanu le fapa nan nei ding naón ralkaihmi ah an cang thluh ding ih nannih ta an si lo ding.

⁴²Nan thingkung le nan rawlkung pawl cu kharbok in an ei thluh ding a si.

⁴³“Nan ram sungih a ummi ramdangmi pawl cu an ṭhangso deuhdeuh ding ih nannih cu nan ṭumsuk vivo ding.

⁴⁴Annih cu paisa coihtu an si ding ih nannih cu a cawitu nan si ding. Annih cu hotu an si ding ih nannih cu thluntu nan si ding.

⁴⁵“BAWIPA nan Pathian ih thu nan ngai lo ih a daan le thukham pawl felfai teih nan thlun lo ruangah vanduainak pakhat hnu pakhat nan parah a thleng ding ih cuticun nan hloralta ding.

⁴⁶Hi vanduainak cu nanmah le nan tesinfa pawl parah Pathian ih hremnak a thleng ti hminsinnakah a kumkhua in nan hnenah a um ding.

⁴⁷BAWIPA ih thlawsuahnak cu a phunphun in nan dong ding; asinain lungawite in nan bia lo ih thathote in a hna khal nan ṭuan lo.

⁴⁸Curuangah BAWIPA in nan hnenih a thlahmi nan ral pawl riantu-ah nannih cu nan cang ding. Tihal rilrawng in nan um ding; sinfen hnipuan nei lo lawngfangkheh in le thil dang hmuahhmuah tla tlasam ringring in nan um ding. Nan ral pawl cun an lo tisiat ding ih nan cemfai thluh hlan lo nan hngawng ah thirkawn an thlaih ding.

⁴⁹BAWIPA in vanhram dengih a ummi miphun pawl cu nanmah hrem dingah a thlah ding - an ṭong hman nan theih dah lomi miphun pawl cu! Khaupi-ih ar a nam bangin an lo nam ding.

⁵⁰Mithmai ti-remrem phun, nutar patar le nauhak par khalah mizawn ruat lo le mizaangfah thiam lo phun an si ding.

⁵¹Nan ṭilva le nan rawl an ei thluh ding ih rawl loin nan thi ding. Nan hrangah rawl le sabit le olif siti, caw le tuu zianghman zuahmi an nei lo ding ih nan ci a mit ding.

⁵²BAWIPA nan Pathian ih a lo pek dingmi khawpi pawl hi pakhat taang loin an kulh ṭheh ding; an siim ding ih nan rinsanzetmi ralhruang saangzetzet hi an cim thluh ding.

⁵³“Nan ral in nan khawpi pawl an kulh ṭheh tik ahcun rawl loin nan van a saangtuk ding ih BAWIPA nan Pathian ih a lo pekmi nan faate pawl ih sa hman cu nan ei ding.

⁵⁴Ziangbangtuk mi upa, phun ṭha le phun u a si hmanah ral pawl in a khua an kulh ṭheh ih a awloksong in thinpit le vansaangih a um tikah cun rawl ei ding neih lo ruangah amah ih sungsuak a fa rori hman a ei ding; a faate ih sa cu a unau le a duhdawtmi a nupi le a taanglaimi a faate pawl hman a hlawm lo ding.

⁵⁵

⁵⁶Ziangbangtuk ih nunau phun ṭha le phun u, a lentuk ah a ke in leilung a pal dah lomi a si hmanah cubangtuk ṭhiamṭhiam in a faate ih sa cu a ei ve ding. A duhdawtmi a pasal le a fanu le a fapa pawl tla a hlawm lo ding.

⁵⁷Ral pawl in a khua an kulh tikah cun rawl loin a van a saangtuk ding ih a neih pekte a fano tla a ei ding ih amah ih suul tiangin a ei ding. Cukhal cu zohman hlawm loin a thupte in a ei ding a si.

⁵⁸“Pathian ih thupekmi, hi cabu sungih nganmi pawl hi feltein thlun uhla mangbangza le ṭihnungza a si mi BAWIPA nan Pathian ih hmin cu upat uh.

⁵⁹Nan thlun lo a si ahcun nanmah le nan tefa pawl parah a dam thei nawn lomi le ṭihnungza natnak a phunphun a tlunter ding.

⁶⁰Izipt ramih nan ton ciami natsia hmuahhmuah kha nan parah a thlenter sal ding ih nan dam thei nawn lo ding.

⁶¹Hi Pathian daan le thukham pawl ngannak cabu sungih a tel lomi natsia a phunphun nan parah a thlenter ding ih nan cem rori ding a si.

⁶²Van ih arsi zat in tam hman uhla BAWIPA nan Pathian thu nan ngai lo a si ahcun mi malte lawnglawng nan taang ding.

⁶³Nanmah a lo lenternak le a lo karhzaiternak ah hin BAWIPA cu a lung a awi ngaingai; cubangtuk in nanmah hloral dingah le siatsuah ding khalah hin a lung a awi ṭhiamṭhiam ding. Nan luah dingmi ram ihsin phorhsuak thluh nan si ding.

⁶⁴“BAWIPA cun vanhramdeng in khatlam vanhramdeng tiang a lo ṭhekdarh thluh hai ding ih cutawk ramah cun nanmah in siseh, nan pupa pawl in siseh, nan theih dah lomi le nan biak dah lomi, lung le thingih tuahmi khawzing dangdang nan bia ding.

⁶⁵Khuitawk hmanah hnangamnak nan hmu lo ding ih kan khua, kan ram timi nan nei lo ding. BAWIPA cun thlaphannak, mitmalnak, le beidong thinpihnak in a lo khahter hai ding.

⁶⁶Nan nunnak cu ṭihphannak lawnglawngin a khat ding. A sun a zan in nan ṭhia nan khur ding ih thih ṭih le thinphang in nan um ringring ding.

⁶⁷Ziangvek thil nan hmuh khalle nan hmuh vete in nan thin phang in a thir ringring ding. Zanlam a si tikah, ‘Zinglam si thlang sehla maw,’ nan ti ding ih, zinglam a si tikah ‘Zanlam si thlang sehla maw,’ nan ti lala ding.

⁶⁸Nan feh sal nawn lo ding tiah a lo kam zo naón tangphawlawng thawn BAWIPA in Izipt ramah sal ṭuan dingin a lo kuat sal hai ding. Cutawkah nan ral pawl hnenah an sal si dingih nan zuar awk rero khalle a lo leitu zohman an um lo ding,” tiah a ti.