Read Falam Chin DAAN PEKSALNAK 29 Bible Online

DAAN PEKSALNAK 29 - Falam Chin bible

DAAN PEKSALNAK 29

¹Moab ram an um laiah cun BAWIPA in Moses hnenah a tanglam thukamnak cu Israel mi hnenih sim dingin thu a pek. Hi thukam cu BAWIPA in Sinai Tlang parah Moses hnenih a pek zomi hlei ah a pek beetmi a si.

²Moses in Israel misenpi pawl cu a kokhawm ih an hnenah, “BAWIPA in Izipt siangpahrang parah le a kuthnuai bawi pawl le a ram pumpi parih a tuahmi cu nan mit rori in nan hmu zo.

³Rapthlakza natsia a phunphun, BAWIPA ih tuahmi mangbangza le khawruahhar a phunphun tla nan hmu zo.

⁴Sikhalsehla hi thil nan ton ciami pawl ih a tican nan theih theinak dingah BAWIPA cu a zuam rero naón nan thei thei hrih thotho lo.

⁵BAWIPA in kum sawmli sung rori nelrawn ramṭhing ah a lo hruai hai ih nan hnipuan le nan kedam pakhat hman a ṭet lo.

⁶Ei dingah sang nan nei lo ih in dingah sabit le zu tla nan nei lo; asinain BAWIPA in amah cu nan Pathian a sinak nan theih theinak dingah nan ṭulmi hmuahhmuah cu a lo pek.

⁷Cule hitawk ram kan thlen tikah Heshbon siangpahrang Sihon le Bashan siangpahrang Og cun in rak do. Asinain kan neh ih,

⁸an ram cu kan lak ih Reuben hrin, Gad hrin le Manasseh hrin a hrek hnenah kan pe a si.

⁹Curuangah nan hnaṭuannak kipih nan hlawh a tlinnak dingah hi thukam cu felzetin nan thlun pei.

¹⁰“Tuih sunah nan zatein nan hotu pawl le nan upa pawl, mipa,

¹¹nunau le nauhak, nan lakah a ummi nan hrangih zanthing a hlamtu le tidai a khaitu ramdangmi pawl thawn BAWIPA nan Pathian ih hmaiah nan ding a si.

¹²Nan pupa Abraham, Isaak le Jakob hnenah a kam bangin le nan hnenih a kam bangtuk in nannih cu BAWIPA in amah ih minung ih a lo tuahnak dingah le nanmah ih BAWIPA a sinak dingah tuih sunah hin BAWIPA nan Pathian ih thukamnak sungah lut uhla a lo tiammi pawl cu pom uh.

¹⁴Hi thukamnak le tiamnak pawl cu nanmah hnen lawngah BAWIPA in a tuah a si lo.

¹⁵BAWIPA ih hmaiah tuih sunih a dingmi kan zate hnenah le a seem hrih lomi kan tefa pawl hnen khalah hi thukamnak cu a tuah a si.

¹⁶“Izipt ram sungih khawsak daan le miphun dangdang ram sungih khualtlawn cu ziangvek a si, ti nan thei thluh zo.

¹⁷Sui le ngun, lung le thingih tuahmi fihnungza an milem pawl tla nan hmu ṭheh zo.

¹⁸Hitawkih a dingmi mipa, nunau, innsang le hrin pawl zovek hman BAWIPA kan Pathian dungtun tahrat in miphun dangdangih khawzing pawl bia lo dingah fimkhur zetin nung uh. Cubangtuk BAWIPA dungtun tahratih miphun dang khawzing a betu cu a hram ihsin a hung cerhmi a khaa ih tur nei thingkung bangtuk nan si ding.

¹⁹Tuih sunah hivek siatcam thukamnak thei tahrat in mahih thulungkhen neih ruangah, ‘Ka duh bangin ka feh ding ih ka lamzin cu a tluang ko ding,’ tiih a zumtu nan um lonak dingah feltein ruat uh. Cubangtuk milai nan um a si ahcun hi misenpi miṭha thawn miṭha lo thawn, a siatsuahtu nan si ding.

²⁰Cubangtuk milai cu BAWIPA in a ngaithiam hrimhrim lo ding. BAWIPA ih thinhengnak cu a parah meisa bangin a alh ding ih leilung parih sin a hmin a hlohral hlan lo hi cabu sungih nganmi vanduainak le camsiatnak cu pakhat hnu pakhat a parah a thleng ding.

²¹Israel misenpi ralrin peknak ah BAWIPA in amah hrimhrim cu a hmang ding ih BAWIPA ih thukamnak sungih nganmi siatserhnak hmuahhmuah cu a parah a thleng ding.

²²“Hmailam san tampi sungah nan tefa pawl le lamhlapi ih a ummi ramdangmi pawl in nan khua le nan ram parih BAWIPA ih thil a tuahmi harsatnak le vanduainak pawl cu an hmu ding.

²³Nan ram cu a kolh ṭheh ding ih kaat le ci in a khat ding; zianghman ciin theih a si lo ding ih belh hman a kho thei lo ding. Nan ram cu BAWIPA a thin a heng ih a rak siatsuah mi Sodom le Gomorrah, Admah le Zeboiim khua pawl a bang ding a si.

²⁴Cutikah leilung tlun miphun hmuahhmuah in, ‘Ziangah so BAWIPA in an ram cu hi bangtuk lawmmam in a tuah? Ziangruangah so BAWIPA cu a thin a heng?’ tiah thu an sut ding.

²⁵Cule thulehnak cu, ‘BAWIPA, an pu le an pa ih Pathian in Izipt ram ihsin a runsuak laiih anmah thawn thukamnak a tuahmi kha an bal ruangah a si.

²⁶Pathian dangdang nan biak lo pei, tiah BAWIPA in a khammi, a hlan khalah an biak dah lomi khawzing cu an biak ih a hna an ṭuan.

²⁷Curuangah BAWIPA cu a minung parah a thin a heng ih an ramah hi cabu sungih nganmi camsiatnak pawl cu a thlenter.

²⁸BAWIPA cu a thin a hengzet ih a minung pawl cu an ram ihsin a phih suak hai ih ramdang ah a hlon; tuih sun tiang cunah an umta a si,” ti a si ding.

²⁹“BAWIPA kan Pathian in a phuan lomi thuthup tampi a hnenah a um. Asinain a Daan cu a phuang zo ih kannih le kan tefa pawl in sanikhuk in kan thlun dingmi a si.”