Read Falam Chin DAAN PEKSALNAK 31 Bible Online

DAAN PEKSALNAK 31 - Falam Chin bible

DAAN PEKSALNAK 31

¹Moses in a thusim cu a pehzom sal ih an hnenah,

²“Kei cu kum za le kum kul ka si zo ih ka duh vekin zianghman ka ti thei nawn lo. Cuih tlunah BAWIPA in Jordan Tiva cu na tan lo ding, i ti zo fawn.

³BAWIPA nan Pathian cu nan hmaiah a feh ding ih cuih ram cu a siatsuah hnuah nannih in nan luah ding. Cule BAWIPA ih a sim zo bangin Joshua cu nan hotu a si ding.

⁴BAWIPA in Amor siangpahrang Sihon le Og a neh ih an ram tla a siatsuah thluh bangin hi miphun pawl cu a neh ding ih an ram tla a siatsuah thluh ding.

⁵BAWIPA in an tlunih nehnak cu nan hnenah a pek pei ih ka lo sim cia zo bangtuk in an parah nan tuah ding.

⁶Cakzet le ralṭha zetin um uh. Hi miphun pawl cu ṭih hlah uh. Nan Pathian BAWIPA amah rori cu nanmah thawn a feh ding. A lo tlansan lo ding ih a lo hnong lo ding,” tiah a ti.

⁷Cun Moses in Joshua cu a ko ih Israel misenpi hmaiah cun a hnenah, “Cakzet le ralṭha zetin um aw. BAWIPA in nan pu le nan pa hnenih thu a kam bangtuk in khi ram an luah theinak dingah hi misenpi pawl a hruaitu cu nangmah na si ding.

⁸BAWIPA amah cu na hnenah a um ding ih a lo hruai ding. A lo tlansan lo ding ih a lo hnong lo ding; curuangah na thinnau hlah seh, na thin khal phang hlah seh,” tiah a ti.

⁹Cun Moses in Pathian ih Daan cu a ngan ṭheh ih BAWIPA ih thukham kuang a kilvengtu Levi mi puithiam pawl le Israel hotu pawl hnenah a pek.

¹⁰An hnenah, “Kum sarih ah voikhat, Leiba Daih Kum a thlen tinte hi Daan cu Puanthlam Puai caan ah ring zetin nan siar pei.

¹¹Israel mi pawl biaknak hmunah BAWIPA bia dingih an rat tikah an hmaiah nan siar pei.

¹²Zokhal in an thei ih BAWIPA nan Pathian ṭihzah an thiamnak dingah le a thu an ngainak dingah mipa, nunau, nauhak le nan lakih um ramdangmi tla an zatein kokhawm ṭheh uh.

¹³BAWIPA nan Pathian ih Daan a thei dah lomi nan tefa pawl tla in an thei ding. Cuticun Jordan tivaral ram an luah ih an um sung hmuahhmuah ah BAWIPA ṭihzah an thiam ding,” tiah thu a pek.

¹⁴Cun BAWIPA in Moses hnenah, “Rei na nung nawn lo ding. Joshua ko awla Puanthlam ah ratpi aw, sim ṭulmi ka sim ding,” a ti. Moses le Joshua cu Puanthlam ahcun an feh ih,

¹⁵BAWIPA cu an hnenah mero tom in a rung lang ih mero tom cu Puanthlam sangka ahcun a ding.

¹⁶Cutikah BAWIPA in Moses hnenah, “Nang cu na thi cing ding; na thih hnuah cun hi Israel mi pawl in anmah thawn thukamnak ka tuahmi cu an bal ding ih hlawhhlang phun ah an cang ding. An luah ding ramih khawzing pawl an bia ding ih kei cu in hnong ding.

¹⁷Cuvek thil a thlen tikah cun an parah ka thin a heng ding, ka dungtun hai ding ih siatsuah thluh an si ding. Natsia a phunphun an parah a thleng ding ih cutikah, ‘Pathian kanmah hnenih a um lo ruangah si lo maw hiti ih kan tuar?’ tiah an ti ding.

¹⁸Cutiih thil ṭha lo an tuah ih khawzing dang an biak ruangah cun an hmuh lo dingah ka hmai ka thup ding.

¹⁹Curuangah hi hla hi ngan aw. An lamah ka ṭang lo ti hminsinnak ah Israel mi hnenah zirh awla an kaa sungah ret aw.

²⁰An pu le an pa hnenih ka thukam bangin hi ram cawhnawi le khuaitizu luannak ramah cun ka thlenpi hai ding. Cuih ramah an duhzat rawl ei ding an nei ding ih puarzet le nuamzetin an um ding. Cutikah kei cu in dungtun ding ih khawzing dangdang an bia ding. Kei cu in hnong ding ih ka thukam cu an bal ding.

²¹Cule natsia a phunphun an parah a thleng ding. Cutikah hi hla cu anmah ka ṭanpi lonak langtertu-ah a cang ding; ziangahtile an tefa pawl khal in an sak ringring dingmi hla a si. Atu khalah ka tiam ciami ram an thlen hlan hmanah hin an thinlung khuilam a hoi, ti cu ka thei zo a si,” tiah a ti.

²²Cuih ni rori ah Moses in cuih hla cu a ngan ih Israel mi pawl a zirh.

²³Cule BAWIPA in Nun ih fapa Joshua hnenah, “Cakzet le ralṭha zetin um aw. Ka tiam ciami ramah cun Israel mi pawl na fehpi ding ih na hnenah ka um ding a si,” a ti.

²⁴Cun Moses in Pathian ih Daan pawl cu cabu sungah a ngan. A thok in a net tiang a ngan a si.

²⁵A ngan ṭheh tikah BAWIPA ih Thukam Kuang a kilvengtu Levi mi puithiam pawl hnenah,

²⁶“Hi Pathian ih Daan cabu hi lak uhla Israel mi pawl hi Pathian dodal mi an si, ti langtertu-ah BAWIPA nan Pathian ih Thukam Kuang kiangah ret uh.

²⁷Ziangvek milungruh le midodal phun an si, ti cu ka thei zo. Ka nunsung hmanah BAWIPA cu hitlukin an dodal a si ahcun ka thih hnuah cun an run dodal sinsin ding.

²⁸Nan hrin pawl sungih hotu le upa pawl hmuah cu ka hmaiah kokhawm uhla hi thuhla pawl cu ka sim thluh ding; an hnenih ka ṭan lonak theihpitu-ah lei le van ka ko ding a si.

²⁹Nannih pawl hi ka thih hnuah cun miṭha lozet ah nan cang ding ih ka lo zirhmi hmuahhmuah nan bal thluh ding, ti cu ka thei. BAWIPA ih a lo khammi nan tuah ih a thin nan hengter ruangah hmailam caanah vanduainak nan parah a thleng ding a si,” a ti.

³⁰Cun Moses in a tanglamih hla pawl cu a net tiang a seh ih Israel mi cun ṭhatein an ngai: