Read Falam Chin DAAN PEKSALNAK 32 Bible Online

DAAN PEKSALNAK 32 - Falam Chin bible

DAAN PEKSALNAK 32

¹“Maw lei le van, ka ṭong hi ngaihnik uh, Ka simmi hi ṭhateón theihnik uh.

²Ka thuzirhmi cu vanruah bangin surseh, Lei parah dai bangin tlaseh. Ka ṭong cu thingkung note parah, Ruahhmai bangin tlaseh. Ruah neemte bangin hrampi note parah surseh.

³BAWIPA ih hmin cu ka thangṭhat ding, Nannih in a maksaknak thu nan sim ding.

⁴“BAWIPA cu nanmah ṭantu bawi cak bik a si, A tuahmi tinkim hi a dik ih a famkim a si. Nan Pathian cu a dikmi le rinsantlak a si, A dikmi le a famkimmi lawng a tuah.

⁵Asinain nannih hlawhhlang phun, A minung si dingah a tlak lomi, Misual le mibum hmang phun nan si.

⁶Hitión maw BAWIPA ih parah nan nun ding? Mi-aa le theihthiamnak nei lo minung pawl! Amah cu a lo Siamtu nan Pa a si, Miphun phun khatih a lo tuahtu cu Amah a si.

⁷“A cem ciami tikcu khi vun ruatsal hnik uh. Hlanlaipi ih tikcu caan kha. Nan pa sut uhla a lo sim ding, Nan patar pawl dil uhla an phuang ding.

⁸Cungnungbik in miphun pawl ram a pek hai, An umnak dingah hmun a zem. Mi phun hrangah ramri a bun sak, Israel ih fapa pawl, An tam an mal zoh in a zem.

⁹Asinain Jakob tefa pawl cu Amah hrangah a hril.

¹⁰“Nelrawn ah vakvai in an tawi kha a hmu, Thlaleer ramṭhing ih thlika nelrawn ah. A humhim ih a kilkhawi hai, Amah ih mitmu a kilkhawi tlukin.

¹¹Muvanlai in a bu a hnin ih, a fano tlun ah a zam; Cule a fano cu zuan a zirh ih, Himtein a thla parih a cawi bangin, BAWIPA in Israel mi cu, Himteón a cawi a si.

¹²BAWIPA lawngin a minung pawl cu a hruai, Ramdang khawzing tel loin.

¹³“Leitlun ih hmunsang pawl cu a ukter ih, Lo sungih a suakmi pawl an ei. Lung tumpipi lakah khuaitizu an tong ih, Lung sepsel lakih olif kung ṭha siti thawn a cawm hai.

¹⁴An caw le an me pawl ih hnawi cu a tam, Tuu, me le caw ṭha bik pawl an nei. Sangvut lakah sangvut ṭha bik an ei ih, Sabit lakih sabit thaw bik an in.

¹⁵“BAWIPA ih minung Jeshurun [8] pawl cu An lian ih an puarthau, Rawl an khopzet ih an thau. Anmah Seemsuahtu an Pathian cu dung an tun ih, An Runtu Lungpi maksak an hnong.

¹⁶Milem an biaknak BAWIPA in a thiik ih, Thil borhhlawh an tuah ruangah a thin a heng.

¹⁷An raithawinak cu Pathian hnen si loin, Khawsia hnenah an pek, Israel mi pawl in an biak dah lomi khawzing hnen ah, An pupa pawl ih an ṭihzah lomi, Tubaite a ra thlengmi pathian lem hnen ahcun.

¹⁸Nanmah lo Seemsuahtu Lungpi cu nan thlauthla, Nanmah lo hringtu Pathian maksak nan hngilh.

¹⁹“Cumi cu BAWIPA in a hmu ih a thin a heng, Amah ih fanu le fapa pawl in an hnon ruangah.

²⁰‘Annih ih hmu lo dingah ka hmai ka thup ding, Ziang an cang ding ti ka zohhnik pei,’ a ti. Hi tefa mibum hmang le mi zuangzam pawl!

²¹Pathian a si lomi ruangah ka thiik a si, An milem pawl ruangah ka thin a heng. Curuangah siartlaklo miphun hmangin, An thin ka hengter ding ih, Mi hlothlau phun ruangah, An thiik ka siatter ding.

²²Ka thinhengnak cu mei bangin a alh ding ih, Leilung le a thuaiih a um hmuah a kang ṭheh ding. Lei le a thlairawl a kang ding, Tlang pawl ih hram ṭoh-nak cu a kang ṭheh ding.

²³“An parah catbaang loin, Vanduainak ka thlenter ding ih, Anmah donak ah ka conkiang pawl ka hmang ding.

²⁴Rilrawnnak le khurhnat in an thi ding ih, Tuksumza natsia in an thi ding. Ramsa hrang pawl anmah dehtu dingah ka thlah ding ih, Mi cuk hrang turnei rul pawl an lakah ka vakter ding.

²⁵Raldonak ruangah lamzin tluanah an thi ding ih, Thinlau in innsung khalah an thi ding. Fala tlangval pawl an thi ding ih, Nauno le patar pawl tla an luat lo ding.

²⁶Ka ṭhekdarh thluh hai ding tiin ka ruat, Zohman ih an thuhla theih thei nawn lo dingin.

²⁷Asinain an ral pawl in, ‘Kanmah in kan neh ṭheh a si, Pathian cahnak zianghman a tel lo tiah, Tluangkhawng hlah hai seh,’ a ti.

²⁸“Israel cu theihthiamnak nei lo phun a si, Fimnak zianghman a nei lo.

²⁹Ziangruangah ral kan sung ti an hmu thei lo, Ziangah hiti in kan cang, ti khal an zoh thiam lo.

³⁰Ziang ruangah so mi pakhat in thawngkhat a neh ih, Mi pahnih lawngin thawnghra an dawihlo thei? BAWIPA an Pathian in a tlansan ih, An Pathian cakzet cun a dungtun hai ruangah a si.

³¹Thungai ti-ah cun, an lungpi in Kan Lungpi a tluk lo, Israel ih Pathian a tluk lo, ti kha kan ral pawl in an thei.

³²An sabit cu Sodom ihsin a rami, Gomorrah ihsin a keuhmi sabit hri, Thihsii in a khatmi rah le a khaami sabit bawr an si.

³³An sabitti cu rul pawl ih tur vek a si, ṭihnungza rulha tur vek a si.

³⁴“BAWIPA in an ral pawl ih thiltuahmi cu a thei, Anmah hrem dingah a khawl cia zo, tikcu ṭha lawng a bawh.

³⁵BAWIPA in phu a lak ding phuhlamnak cu Amah ih ta a si. An rilh an bahnak tikcu a nai zo, An siatnak ni a ra thleng cing ding.

³⁶BAWIPA in Amah ih mi pawl A minung pawl cu a run ding, An tha a cem, ti a hmuh tikah Amah riantu pawl cu a zaangfah ding, Miluat tile sal ti um cuang loin Zohman an taang nawn lo, ti a hmuh tikah cun.

³⁷Cutikah BAWIPA in, A minung pawl cu a sut ding: ‘Khuiah so nan rinsan zetmi, khawzing cakzet pawl cu an si?

³⁸Nan thawinak thau a eitu pawl le, Nan sabit thawthaw a intu pawl cu? Atu-ah ra in lo bawm hai seh, Nanmah hum dingah ra tlan hai seh.

³⁹“‘Keimah lawng, Keimah lawng rori hi Pathian cu ka si, Pathian taktak a dang zohman an um lo. Ka that ih ka nungter, ka hriam ih ka damter, Ka kut sung ihsin a dirhsuak theitu zohman an um lo.

⁴⁰Keimah cu a nungmi Pathian ka si ih, Van lamah ka baan phar in le, Ka nunnak saal in thu ka kam:

⁴¹Ka ralnam tleu cu ka taathriam ding ih, Thudik in thu ka rel ding. Ka ral pawl parah phu ka lak ding ih, I huatu pawl cu ka hrem ding.

⁴²Ka conkiang pawl cu an thisen in a ciah ding ih, Ka ralnam in i raltu pawl ka saat ding. Keimah i dotu hotu samsau pawl, zohman ka zuah lo ding ih, Hriamhma a pu mi le thawngtla mi khal, an thi ding,’ a ti ding.

⁴³“Maw leilung mi pawl, BAWIPA ih minung pawl thawn nan lung awi uh, A minung a thattu pawl cu a hrem ding ih, A ral pawl parah phu a lak ding. A minung le an ramsungih mawhnak cu, A kholhfai thluh ding a si.”

⁴⁴Moses le Nun ih fapa Joshua in hi hla cu Israel misenpi theihhngan ah an seh.

⁴⁵Moses in Pathian thukham pawl cu Israel mi pawl hnenih a sim ṭheh tikah,

⁴⁶“Tuih sunih ka lo pekmi thukham pawl hi thlun dingah ralringte in nan thinlung sungah khum uh. Nan faale pawl tla in an thlunnak dingah zirh uh.

⁴⁷Hi daan pawl hi nan hrangah tican nei lo an si lo, nan nunnak an si. Thlun uhla nan luah dingmi Jordan Tiva ral ramah reipi nan um ding,” tiah a ti.

⁴⁸Cuih ni ṭhiamṭhiam ah BAWIPA in Moses hnenah,

⁴⁹“Jerikho khawpi ihsin nisuahnak lam, Moab ramsung, Abarim Tlangtluan ah hung feh awla, Nebo Tlang parah hung kai aw; cutawkih sin Israel mi pawl ka pek dingmi Kanaan ram cu va cuan aw.

⁵⁰Na u Aaron cu Hor Tlang ah a thi zo; nang khal Nebo Tlangah na thi ding,

⁵¹ziangahtile Israel mi hmuhhnganah nan pahnih in keimah rinsan loin nan nung. Zin nelrawn, Kadesh khua kiang, tidai umnak Meribah ih nan um laiah khan Israel mi pawl hmuhhnganah upatnak pe loin ka thang in siat a si.

⁵²Kanaan ram cu hlavaang in na hei thlir ding naón Israel mi pawl ka pek dingmi ramah cun na lut lo ding,” tiah a ti.