Read Falam Chin DAAN PEKSALNAK 33 Bible Online

DAAN PEKSALNAK 33 - Falam Chin bible

DAAN PEKSALNAK 33

¹Pathian minung Moses cun a thih hlanah hiti in Israel mi pawl parah thlawsuah a pek:

²BAWIPA cu Sinai Tlang in a ra; Ni bangin Edom tlunin a suak ih, Paran Tlangin a minung parah a tlang. A hnenah vancungmi thawnghra an um ih, A vorhlam kutah mei alh a keng.

³BAWIPA in a minung pawl cu a duhdawt ih, Amah ih ta pawl cu a humhim a si. Curuangah a ke hramah kan kun ih, A thupekmi kan ngai a si.

⁴Moses ih in pekmi Daan cu kan thlun, Kan phunhnam ih sunloih bikmi rothil cu.

⁵BAWIPA cu a minung Jeshurun [9] pawl ih siangpahrang ah a cang, Israel hrin pawl le hotu pawl an tonkhawm tikah cun.

⁶Reuben hrin cu hiti in thlawsuah a pek: “Reuben hrin cu cimit hram hlah seh, An minung an malzet naón,” a ti.

⁷Judah hrin cu hiti in thlawsuah a pek: “Maw BAWIPA, bom an dilnak aw cu thei awla, Israel hrin dang pawl thawn kom hai aw. Maw BAWIPA, a kut khohter awla, An ral pawl cu do sak aw,” a ti.

⁸Levi hrin cu hiti in thlawsuah a pek: “Maw BAWIPA, Levi mi hnenah Na Thummim le Urim cu re aw; Rinsan tlak na minung an si. Massah ah na hniksak zo ih, Meribah tidai ah na zuam hai a si.

⁹Nangmah sawn an lo tlaihsan, An nu le an pa hnen ah: ‘Ziangah kan lo siar lo’, an ti. An unau pawl an uar hai lo ih, Anmah ih faate hman an thei duh lo. Sikhalsehla na thu cu an thlun ih, Na thukam cu ṭhatein an kilkhawi.

¹⁰Na thupek cu na mi Jakob hnenah an zirh ding, Na daan cu Israel mi hnenah. Na hmaiah rimhmui an ur ding ih Na biakṭheng ah mei-ur thawinak an pe ding,

¹¹BAWIPA, an kut thiamnak cu thluasuah pe awla, An zungthiamnak parah na lung awi hram aw. An ral pawl ih elruh vua awla, thosal nawn lo dingin, Anmah a raltu le a huatu, An ral pawl cu rialbek aw,” tiah a ti.

¹²Benjamin hrin cu hiti in thluasuah a pek: “Hi hrin cu BAWIPA ih duhmi a si ih thlangamte in a cawl. Pathian Amah in in sunvu a hum, A liang karah daitein a umter.

¹³Josef hrin cu hiti in thlawsuah a pek: “BAWIPA in an ram cu van daitla in thlawsuah hram seh. Leihnuai tidai khal in hningter in thlawsuah seh.

¹⁴Ni ih a hminter mi thingrah le, Thlatin a tikcu ih a rahmi thingrah ṭha bik in khatseh.

¹⁵Kumkhua ih a hmunmi an tlang parah cun, Mi kipih hiarmi thingrah rahseh. An tlangsaang pawl cu thingrah rahduhnak in khatseh.

¹⁶An ram cu leilung ih a suahmi thil ṭha a phunphun in khat sehla, Hrambur sungin a ṭongtu, BAWIPA ih ṭhatnak tla in ciah hram seh. Hi thlawsuah pawl Josef ih lu parah thleng seh, Ziangahtile a unau lakah hruaitu a si.

¹⁷Josef ih a lalnak cu a ropi, A thazaang cu cawcang tha vek, A ki tla cu sele ki bangtuk a si. A ki pawl cu Manasseh mi a thawng a thawng le Efraim mi a thawng ih thawngsawm tluk an si. Cuih a ki cun miphun tampi a khik ih, Leilung deng tiang a nor a si,” a ti.

¹⁸Zebulun le Issakhar hrin pawl hiti in thlawsuah a pek: “Zebulun cu tipi par sum a tuah, a suhsonak ah hlawhtling hram seh; Issakhar cu innah a lennak karhzai hram seh.

¹⁹An tlang parah miphun dangdang an sawm ih, Cutawkah felzetin thawinak an pek. Tipi ihsin an lennak an ngah ih, Tipikap vunnel ihsin a thup-awmi ro sunglawi an co” a ti.

²⁰Gad hrin cu hiti in thlawsuah a pek: “Pathian thangṭhat uh, Gad ram kauzetih a tuahtu cu. Gad cu kiosa vek a si, deh dingin a bawh. An baan le an lu pawl, bauhthlek dingah.

²¹Anmah ih hrangah ram ṭha bik an hril ih, Hotu-ih covo cu pek an si. BAWIPA ih aiah a dingmi a tuah, A thuṭhennak a kimter. Israel hotu pawl an tonkhawm awk tikah cun,” a ti.

²²Dan hrin cu hiti in thlawsuah a pek: “Dan cu kiosa no a si, Bashan in a hung suakmi kiosa,” a ti.

²³Naftali hrin cu hiti in thlawsuah a pek: “Naftali cu BAWIPA ih mithmaiṭha a co, A thlawsuahnak tla tampi a dong. An ram cu Galilee tili ihsin thlanglam tiang a thleng,” a ti.

²⁴Asher hrin cu hiti in thlawsuah a pek: “Asher cun hrindang hnakin thlawsuahnak tam deuh a dong, A unau ih duh bikmi si hram seh. A ram cu olif kungin khatseh.

²⁵A khawpi pawl ih kotka hrolh cu thir le daar lawnglawng sisehla, A nunsung hnangamzet ih khawsa mi si hram seh,” a ti.

²⁶Maw Israel[10] mi pawl: Nan Pathian bangtuk Pathian dang a um lo, Van ah khin huham neizet in a um. A sunlawinak mero parin nanmah bom duh ah a ra.

²⁷BAWIPA cu a kumkhua in nan beunak a si ih, Kumkhua ih a baan a pharmi cu nan hngauhsanmi baan a si. Hmailamih nan nor tikah nan ral pawl cu a dawisuak hai ih, that thluh dingin thu a lo pek.

²⁸Curuangah Israel tefa pawl cu hnangamzet le himzet in an um. Jakob ih tesinfa pawl cu phan ding zianghman an nei lo. Rawl le sabit tamnak ram, Van in leilungah dai a tlakternak hmunah cun.

²⁹Maw Israel mi pawl: Ziangtluk mivanṭha so nan si! Nanmah bangtuk zotal an um maw? BAWIPA ih runsuakmi hi! BAWIPA amah cu nan phaw le nan nam a si, A lo ṭantu le nehtu siter dingah; Nan ral pawl cu zaangfahnak dil dingah an ra ding naón, Nan ke hnuai ah nan pal cih ding.